മേഘാലയിൽ അഫ്‌സ്‌പാ നിയമം പിൻവലിച്ചു; അരുണാചലില്‍ എട്ട് പൊലീസ് സ്റ്റേഷന്‍ പരിധിയിലും ഒഴിവാക്കി

ഷില്ലോങ്: മേഘാലയിൽ പൂർണമായും അരുണാചൽ പ്രദേശിലെ എട്ട് പൊലീസ് സ്റ്റേഷൻ പരിധിയിലും നിലനിന്നിരുന്ന അഫ്‌സ്പാ (പ്രത്യേക സൈനികാധികാര നിയമം 1958) പിൻവലിച്ചു. കേന്ദ്ര ആഭ്യന്തരവകുപ്പിന്റെ ഇന്ന് പുറത്തിറങ്ങിയ ഗസറ്റ് വിജ്ഞാപനത്തിലൂടെയാണ് ഈ​ നടപടി.

വടക്ക് കിഴക്കൻ സംസ്ഥാനങ്ങളിൽ ദീർഘകാലമായി നടപ്പാക്കിയിരുന്നു പ്രത്യേക സൈനികാധികാര നിയമം ഏറെക്കാലമായി ഒട്ടേറെ വിവാദങ്ങളും പ്രക്ഷോഭങ്ങൾക്കും  വഴിയൊരുക്കിയിട്ടുളളതായിരുന്നു. മണിപ്പൂരിൽ ഈ നിയമത്തിനെതിരെ സുദീർഘമായ പോരാട്ടമായിരുന്നു പതിനഞ്ച് വർഷത്തിലേറെ നിരാഹരമനുഷ്ഠിച്ച ഇറോം ശർമ്മിളയുടെ  പോരാട്ടം ലോക ശ്രദ്ധ പിടിച്ചുപറ്റിയിരുന്നു.

2017 സെപ്തംബർവരെ നാൽപത് ശതമാനം ജനങ്ങളെയാണ് മേഘലായയിൽ അഫ്‌സ്‌പാ നിയമത്തിന് കീഴിലായിരുന്നു. സംസ്ഥാന സർക്കാരുമായുളള ചർച്ചയ്ക്കു ശേഷമാണ് ഈ നിയമം പിൻവലിക്കാൻ കേന്ദ്ര ആഭ്യന്തര മന്ത്രാലയം തീരുമാനിച്ചത്.

മേഘലായത്തിൽ അഫ്‌സ്‌പാ പിൻവലിക്കുകയും അരുണാചൽ പ്രദേശിൽ എട്ട് പൊലീസ് സ്റ്റേഷൻ പരിധിയിൽ നിന്നും ഈ​ നിയമം ഒഴിവാക്കുകയും ചെയ്തതു. അരുണാലചലിലെ പതിനാറ് പൊലീസ് സ്റ്റേഷനുകളാണ് അഫ്‌സ്‌പായുടെ പരിധിയിൽ ഉൾപ്പെടുത്തിയിരുന്നത്. ഇതിൽ എട്ട് പൊലീസ് സ്റ്റേഷൻ പരിധികളിൽ നിന്നാണ് ആ നിയമം പിൻവലിച്ചത്. ഇതിന്  പിന്നാലെ മറ്റ് ചില ഇളവുകളും ഈ​ വിജ്ഞാപനത്തിലുണ്ട്.

മണിപ്പൂർ, മിസോറം, നാഗലാൻണ്ട് എന്നീ സംസ്ഥാനങ്ങൾ സന്ദർശിക്കുന്നതിന് വിദേശ സഞ്ചാരികൾക്ക് ഏർപ്പെടുത്തിയിരുന്ന​ നിയന്ത്രണങ്ങൾക്കും ഇളവുകൾ അനുവദിച്ചിട്ടുണ്ട്. എന്നാൽ “കൺട്രീസ് ഓഫ് കൺസേൺ” എന്ന വിഭാഗത്തിൽ പെടുന്ന രാജ്യങ്ങളിൽ നിന്നും വരുന്ന വിനോദ സഞ്ചാരികളുടെ കാര്യത്തിൽ ​നിലവിലുളള നിയന്ത്രണങ്ങൾ തുടരും. പാകിസ്ഥാൻ, അഫ്ഗാനിസ്ഥാൻ, ചൈന എന്നീ രാജ്യങ്ങളാണ് ഈ​ പട്ടികയിൽ ഉൾപ്പെടുന്നവ.

ഈ നിയമത്തിന്റെ പരിധിയിൽ അസ്വസ്ഥ പ്രദേശങ്ങൾ എന്ന് നിശ്ചയിക്കപ്പെട്ടയിടങ്ങളിൽ സൈന്യത്തിന് പൗരന്മാരെ അറസ്റ്റ് ചെയ്യാനും റെയ്ഡ് നടത്താനും സ്വയരക്ഷയ്ക്കായി സൈനികാക്രമണം നടത്താനും അനുമതി നൽകിയിരുന്നു.

ഈ​ മേഖലയിൽ കഴിഞ്ഞ നാല് വർഷത്തിനുളളിൽ കലാപവുമായി ബന്ധപ്പെട്ട സംഭവങ്ങളിൽ 63 ശതമാനം കുറവ് വന്നിട്ടുണ്ടെന്ന് ആഭ്യന്തര മന്ത്രാലയത്തിന്റെ പ്രസ്താവനയിൽ അവകാശപ്പെടുന്നു. ഈ​ മേഖലയിൽ 2017 ൽ തദ്ദേശീയരുടെ മണരത്തിൽ അളവിലും 83 ശതമാനം കുറവുണ്ടായി. സൈനികർക്കുണ്ടാകുന്ന അത്യാഹിതങ്ങളിലും 43 ശതമാനം കുറവുണ്ടായി. കലാപവുമായി ബന്ധപ്പെട്ട ഉണ്ടാകുന്ന സംഭവങ്ങളിൽ 2017ൽ ​85 ശതമാനം കുറവുണ്ടായതായെന്നും ഇതിലെല്ലാമുപരി സൈനികർ നേരിടുന്ന അത്യാഹിത നിരക്കിൽ​ 1997 നെ അപേക്ഷിച്ച് 96 ശതമാനം കുറവുണ്ടായതായും ആഭ്യന്തര മന്ത്രാലയത്തിന്റെ പ്രസ്താവയനിൽ പറയുന്നു.

ഈ നിയമവുമായി ബന്ധപ്പെട്ട നടപടികൾ ഈ പ്രദേശങ്ങളിൽ മാത്രമല്ല, രാജ്യത്തും വിദേശത്തും ശക്തമായ എതിർപ്പുകൾ ഉയർത്തിയിരുന്നു. മണിക് സർക്കാരിന്റെ കാലത്ത് കഴിഞ്ഞ വർഷം ത്രിപുരയിൽ അഫ്‌സ്‌പാ പിൻവലിച്ചിരുന്നു.