ജനപ്രതിനിധികള്‍ക്കെതിരായ ക്രിമിനല്‍ കേസുകള്‍; കേരളത്തിലും ബിഹാറിലും പ്രത്യേക കോടതികള്‍ക്ക് സുപ്രീം കോടതി ഉത്തരവ്

ന്യൂഡല്‍ഹി: എംപിമാര്‍ക്കും എംഎല്‍എമാര്‍ക്കുമെതിരായ ക്രിമിനല്‍ കേസുകളുടെ വിചാരണയ്ക്കായി കേരളത്തിലും ബിഹാറിലും എല്ലാ ജില്ലകളിലും പ്രത്യേക കോടതികള്‍ രൂപീകരിക്കാന്‍ സുപ്രീം കോടതി നിർദേശം.

ചീഫ് ജസ്റ്റിസ് രഞ്ജന്‍ ഗോഗോയിയും ജസ്റ്റിസുമാരായ എസ്‌.കെ.കൗളും കെ.എം.ജോസഫും ഉള്‍പ്പെടുന്ന ബെഞ്ചിന്റേതാണ് ഉത്തരവ്. രണ്ട് സംസ്ഥാനങ്ങളിലേയും പരാതികളിന്മേലുള്ള റിപ്പോര്‍ട്ടുകള്‍ ഡിസംബര്‍ 14 ന് സമര്‍പ്പിക്കാനും സുപ്രീം കോടതി ആവശ്യപ്പെട്ടിട്ടുണ്ട്.

ജനപ്രതിനിധികള്‍ക്കെതിരായ കേസുകളില്‍ വിചാരണയ്ക്കായി രണ്ട് സംസ്ഥാനങ്ങളിലും ആവശ്യത്തിന് പ്രത്യേക കോടതികള്‍ സ്ഥാപിക്കാനുള്ള അനുമതിയും സുപ്രീം കോടതി നല്‍കിയിട്ടുണ്ട്. നേരത്തെ രൂപീകരിച്ച പ്രത്യേക കോടതികളില്‍ നിന്നും അതത് ജില്ലാ കോടതികളിലേക്ക് കേസുകള്‍ അയയ്ക്കാനും സുപ്രീം കോടതി ഹൈക്കോടതിക്ക് നിർദേശം നല്‍കിയിട്ടുണ്ട്.

എംപിമാര്‍ക്കും എംഎല്‍എമാര്‍ക്കുമെതിരായ കേസുകളില്‍ ജീവപര്യന്തം ശിക്ഷയ്ക്ക് സാധ്യതയുള്ള കേസുകള്‍ക്ക് പ്രാധാന്യം കൊടുക്കണമെന്നും സുപ്രീം കോടതി പറഞ്ഞു. വക്കീലും ബിജെപി നേതാവുമായ അശ്വിനി ഉപാധ്യയുടെ ഹര്‍ജിയിന്മേല്‍ വാദം കേള്‍ക്കുകയായിരുന്നു സുപ്രീം കോടതി. ക്രിമിനല്‍ കേസുകളില്‍ ഉള്‍പ്പെട്ട എംപിമാരേയും എംഎല്‍എമാരേയും ആജീവനാന്തമായി വിലക്കണമെന്നാണ് ഹര്‍ജിയില്‍ ആവശ്യപ്പെടുന്നത്.