മേഘാലയയിലെ ഹണിമൂൺ കൊലപാതകം; ഭാര്യയെ കുരുക്കി തെളിവായത് ട്രോളി ബാഗ്

ഷില്ലോങ്: മേഘാലയയിൽ നടന്ന ഒരു കൊലപാതകത്തിന്റെ ചുരുളഴിയാൻ കാരണമായത് വഴിയിൽ ഉപേക്ഷിക്കപ്പെട്ട ഒരു കറുത്ത ട്രോളി ബാഗ്. കഴിഞ്ഞ മേയ് മാസത്തിൽ ഹണിമൂണിനായി മേഘാലയയിലെത്തിയ ഇൻഡോർ സ്വദേശിയായ രാജ രഘുവംശിയുടെ കൊലപാതകവുമായി ബന്ധപ്പെട്ട കൂടുതൽ വിവരങ്ങളാണ് ഇപ്പോൾ പുറത്തുവരുന്നത്. പ്രതിയായ ഭാര്യ സോനം രഘുവംശിക്കെതിരെ പോലീസ് കുറ്റപത്രം സമർപ്പിച്ചു.

മെയ് 11-ന് വിവാഹിതരായ രാജയും സോനവും 20-ാം തീയതിയാണ് ഹണിമൂണിനായി മേഘാലയയിലെത്തുന്നത്. മേയ് 23-ന് ദമ്പതികളെ കാണാതാവുകയായിരുന്നു. ജൂൺ രണ്ടിന് ഷില്ലോങ്ങിലെ ഒരു കൊക്കയിൽ നിന്ന് രാജയുടെ അഴുകിയ മൃതദേഹം കണ്ടെടുത്തു. കാണാതായ സോനം പിന്നീട് ഉത്തർപ്രദേശിലെ ഗാസിപൂരിൽ നാടകീയമായി കീഴടങ്ങുകയായിരുന്നു.

Also Read: അസമിൽ ട്രെയിനിടിച്ച് എട്ട് ആനകൾ ചരിഞ്ഞു; രാജധാനി എക്സ്പ്രസ് പാളം തെറ്റി

കറുത്ത ട്രോളി ബാഗ്

കൊലപാതകത്തിന് ശേഷം സോനം ഉപേക്ഷിച്ച കറുത്ത ട്രോളി ബാഗാണ് കേസിൽ നിർണായക തെളിവായത്. ഇൻഡോറിലെ ഒരു വിജനമായ പ്രദേശത്ത് നിന്ന് പോലീസ് ഈ ബാഗ് കണ്ടെടുത്തു. സോനത്തിന്റെ സഹായികൾ ഇത് കത്തിക്കാൻ ശ്രമിച്ചിരുന്നെങ്കിലും ഭാഗികമായി മാത്രം കത്തിയ നിലയിലായിരുന്നു ബാഗ് കണ്ടെടുത്തത്. ഈ ബാഗിനുള്ളിൽ നിന്ന് രാജയുടെ സ്വർണാഭരണങ്ങൾ, മൊബൈൽ ഫോണുകൾ, മറ്റ് വ്യക്തിഗത രേഖകൾ എന്നിവയുടെ അവശിഷ്ടങ്ങൾ ഫോറൻസിക് പരിശോധനയിൽ കണ്ടെത്തി. 

Also Read: ഡിഎംകെയേക്കാൾ ടിവികെയെ ഭയം എഐഎഡിഎംകെയ്ക്ക്; തമിഴ് രാഷ്ട്രീയത്തിൽ വിജയ് പയറ്റുന്ന തന്ത്രങ്ങൾ

പ്രണയപ്പകയും ആസൂത്രിത കൊലപാതകവും

തന്റെ കാമുകനായ രാജ് കുശ്വാഹയുമായി ചേർന്നാണ് സോനം കൊലപാതകം ആസൂത്രണം ചെയ്തതെന്ന് പോലീസ് പറയുന്നു. കുടുംബത്തിന്റെ നിർബന്ധത്തിന് വഴങ്ങിയാണ് രാജയെ വിവാഹം കഴിച്ചതെങ്കിലും, വിവാഹത്തിന് മുൻപേ സോനം രാജിനോടൊപ്പം ചേർന്ന് കൊലപാതകം പ്ലാൻ ചെയ്തിരുന്നു. ഹണിമൂണിനായി മേഘാലയ തിരഞ്ഞെടുക്കുന്നതും, അവിടെ വിജനമായ സ്ഥലത്തേക്ക് ഭർത്താവിനെ എത്തിക്കുന്നതും ഇതിന്റെ ഭാഗമായിരുന്നു.

Also Read: ഗായകൻ സുബീൻ ഗാർഗിന്റെ മരണം: കൊലപാതക സാധ്യത തള്ളി സിംഗപ്പൂർ പൊലീസ്

തെളിവായത് മംഗല്യസൂത്രവും മോതിരവും

താമസിച്ചിരുന്ന ഹോംസ്റ്റേയിൽ തന്റെ മംഗല്യസൂത്രവും മോതിരവും സോനം ഉപേക്ഷിച്ചിരുന്നു. പുതുതായി വിവാഹം കഴിഞ്ഞ ഒരു സ്ത്രീ തന്റെ താലി ഉപേക്ഷിച്ചു പോയത് പോലീസിൽ വലിയ സംശയമുണ്ടാക്കി. തുടർന്ന് നടത്തിയ അന്വേഷണത്തിലാണ് കൊലപാതകത്തിന്റെ ചുരുളഴിയുന്നത്. മൂന്ന് വാടകക്കൊലയാളികളെ ഉപയോഗിച്ചാണ് രാജയെ കൊലപ്പെടുത്തിയതെന്ന് കുറ്റപത്രത്തിൽ പറയുന്നു.

നിലവിൽ സോനവും കാമുകനും ഉൾപ്പെടെ അഞ്ചോളം പേർ പോലീസ് കസ്റ്റഡിയിലാണ്. ആസൂത്രിതമായ ഈ കൊലപാതകം രാജ്യത്തെ തന്നെ ഞെട്ടിച്ച സംഭവങ്ങളിൽ ഒന്നാണ്.

Read More: ലിവ്-ഇൻ റിലേഷനിലുള്ളവരുടെ ജീവന് സംരക്ഷണം നൽകാൻ സ്റ്റേറ്റിന് ഉത്തരവാദിത്വമുണ്ടെന്ന് ഹൈക്കോടതി