ന്യൂഡല്‍ഹി: രാജ്യത്ത് 4,435 പേര്‍ക്ക് പുതുതായി കോവിഡ് റിപ്പോര്‍ട്ട് ചെയ്തു. 163 ദിവസത്തിനിടയിലെ ഏറ്റവും വലിയ പ്രതിദിന കോവിഡ് നിരക്കാണിത്. ഇതോടെ സജീവ കേസുകളുടെ എണ്ണം 23,091 ആയി ഉയര്‍ന്നതായി കേന്ദ്ര ആരോഗ്യ മന്ത്രാലയത്തിന്റെ കണക്കുകള്‍ വ്യക്തമാക്കുന്നു. കഴിഞ്ഞ വര്‍ഷം സെപ്റ്റംബര്‍ 25 ന് 4,777 കേസുകളാണ് റിപ്പോര്‍ട്ട് ചെയ്തത്.
പുതിയ കേസുകള്‍ക്കൊപ്പം, രാജ്യത്ത് റിപ്പോര്‍ട്ട് ചെയ്ത കോവിഡ് -19 രോഗികളുടെ എണ്ണം 4.47 കോടിയായി (4,47,33,719) ഉയര്‍ന്നു. 15 മരണങ്ങളോടെ മരണസംഖ്യ 5,30,916 ആയി ഉയര്‍ന്നു, രാവിലെ 8 മണിക്ക് അപ്ഡേറ്റ് ചെയ്ത ഡാറ്റ പ്രകാരമാണിത്. കോവിഡിനെ തുടര്‍ന്നുള്ള മരണങ്ങളില്‍മഹാരാഷ്ട്രയില്‍ നാലും ഛത്തീസ്ഗഡ്, ഡല്‍ഹി, ഗുജറാത്ത്, ഹരിയാന, കര്‍ണാടക, പുതുച്ചേരി, രാജസ്ഥാന്‍ എന്നിവിടങ്ങളില്‍ നിന്ന് ഓരോ മരണങ്ങളും റിപ്പോര്‍ട്ട് ചെയ്തു. കേരളത്തില്‍ നാല് മരണമാണ് റിപ്പോര്‍ട്ട് ചെയ്തത്.
23,091-ല്‍, സജീവമായ കേസുകള്‍ ഇപ്പോള്‍ മൊത്തം അണുബാധയുടെ 0.05 ശതമാനമാണ്. ആരോഗ്യ മന്ത്രാലയത്തിന്റെ വെബ്സൈറ്റ് അനുസരിച്ച് ദേശീയ കോവിഡ് രോഗമുക്തി നിരക്ക് 98.76 ശതമാനമായി രേഖപ്പെടുത്തിയിട്ടുണ്ട്. പ്രതിദിന പോസിറ്റിവിറ്റി നിരക്ക് 3.38 ശതമാനവും പ്രതിവാര പോസിറ്റിവിറ്റി നിരക്ക് 2.79 ശതമാനവും രേഖപ്പെടുത്തി. രോഗമുക്തി നേടിയവരുടെ എണ്ണം 4,41,79,712 ആയി ഉയര്‍ന്നപ്പോള്‍ കേസിലെ മരണനിരക്ക് 1.19 ശതമാനമാണ്. ആരോഗ്യമന്ത്രാലയത്തിന്റെ വെബ്സൈറ്റ് അനുസരിച്ച്, രാജ്യവ്യാപകമായ വാക്സിനേഷന്‍ ഡ്രൈവില്‍ ഇതുവരെ 220.66 കോടി ഡോസ് കോവിഡ് 19 വാക്സിന്‍ നല്‍കിയിട്ടുണ്ട്.
