പൊലീസ് ഉദ്യോഗസ്ഥനെ തട്ടിക്കൊണ്ടു പോയി കൊലപ്പെടുത്തിയ മൂന്ന് ഭീകരരെ സൈന്യം വധിച്ചു

ശ്രീനഗര്‍: കശ്മീരിലെ കുല്‍ഗാമില്‍ നിന്നും പൊലീസ് കോണ്‍സ്റ്റബിളിനെ തട്ടിക്കൊണ്ടു പോയി കൊലപ്പെടുത്തിയ മൂന്ന് ഭീകരരെ സൈന്യം വധിച്ചു. കൊല്ലപ്പെട്ട മൂന്ന് ഭീകരരും പാക്കിസ്ഥാന്‍ സ്വദേശികളാണെന്നാണ് പൊലീസ് സംശയിക്കുന്നത്. പൊലീസ് കോണ്‍സ്റ്റബിളാായ സലീം അഹമ്മദ് ഷായുടെ മൃതദേഹം ശനിയാഴ്ച്ച വൈകിട്ട് കണ്ടെത്തിയിരുന്നു. മൃതദേഹം കണ്ടെത്തിയ പ്രദേശത്ത് നിന്നും 2 കി.മി. മാത്രം അകലെയാണ് ഏറ്റുമുട്ടല്‍ നടന്നത്. സിആര്‍പിഎഫും സൈന്യവും സംയുക്തമായി കുല്‍ഗാം പ്രദേശത്ത് തിരച്ചില്‍ തുടരുകയാണ്.

കത്തുവയില്‍ പൊലീസ് പരിശീലനത്തിലുണ്ടായിരുന്ന ഉദ്യോഗസ്ഥന്‍ വീട്ടില്‍ അവധിക്ക് വന്നപ്പോഴാണ് ഭീകരര്‍ തട്ടിക്കൊണ്ടു പോയത്വെള്ളിയാഴ്ച്ച രാത്രി സ്വന്തം വീട്ടില്‍ വെച്ചാണ് അദ്ദേഹത്തെ തട്ടിക്കൊണ്ടു പോയത്. തുടര്‍ന്ന് സൈന്യവും പൊലീസും തിരച്ചില്‍ നടത്തിയെങ്കിലും സലീമിനെ കൊണ്ട്പോയത് എങ്ങോട്ടാണെന്ന് കണ്ടെത്താന്‍ കഴിഞ്ഞില്ല.

പിന്നീട് ഒഡിപൊര എന്ന സ്ഥലത്താണ് പോലീസ് ഉദ്യോഗസ്ഥന്‍റെ മൃതദേഹം കണ്ടെത്തിയത്. മുന്‍പ് സ്പെഷ്യല്‍ ഓഫീസറായി ജോലി ചെയ്തിരുന്ന മുഹമ്മദിന് സമീപകാലത്താണ് സ്ഥാനക്കയറ്റം ലഭിച്ചത്. സൈനീകനായ ഔറംഗസേബിനെ ഭീകരര്‍ തട്ടിക്കൊണ്ട് പോയി കൊലപ്പെടുത്തി ഒരു മാസം ആകുമ്പോഴാണ് വീണ്ടും ഒരു സുരക്ഷാ ഉദ്യോഗസ്ഥനെ സമാനമായ രീതിയില്‍ കൊലപ്പെടുത്തുന്നത്.

മുമ്പ് ജാവേദ് അഹമ്മദ് എന്ന സൈനികനേയും ഷോപ്പിയാനില്‍ നിന്ന് ഭീകരര്‍ തട്ടിക്കൊണ്ട് പോയി വധിച്ചിരുന്നു. വീടുകളിലേക്ക് അവധിക്കായി പോകുന്ന സുരക്ഷാ ഉദ്യോഗസ്ഥരോട് ജാഗ്രതപാലിക്കണമെന്ന് അധികൃതര്‍ നിര്‍ദേശം നല്‍കിയിട്ടുണ്ട്.