ജനാധിപത്യത്തിലെ ഭരണഘടനാപരമായ സംവിധാനങ്ങളിലൂടെയാണ് കേന്ദ്ര-സംസ്ഥാന ബന്ധങ്ങളെ നിലനിർത്തുന്നത്. സംസ്ഥാനങ്ങളുടെ വിശാല അർത്ഥത്തിലുളള സ്വാതന്ത്ര്യവും വികസന സാധ്യതകളെയും വിനിയോഗിക്കുന്നതിനായുളള പിന്തുണ നൽകേണ്ടത് ജനാധിപത്യത്തിന്‍റെ അടിസ്ഥാന ഘടകമാണ്.

സംസ്ഥാനങ്ങളുടെ സാമ്പത്തിക സ്വാതന്ത്ര്യം എന്നത് കേന്ദ്രത്തിന്‍റെ ഔദാര്യത്തിൽ നിന്നും എറിഞ്ഞുകൊടുക്കേണ്ട ഒന്നല്ല, മറിച്ച് ഭരണഘടനാപരമായ അവകാശമാണ്. എന്നാൽ, കഴിഞ്ഞ കുറച്ചുകാലമായി ഇന്ത്യയുടെ ധനപരമായ കാര്യങ്ങളിൽ സംസ്ഥാനങ്ങളോട്  കേന്ദ്രം സ്വീകരിക്കുന്ന സമീപനം ഫെഡറൽ സംവിധാനങ്ങളെ ആകെ അട്ടിമറിക്കുന്നു എന്നതാണ്  സമീപകാല ചരിത്രമെന്ന് സാമ്പത്തികരംഗത്ത് നിന്നും വിമർശനങ്ങൾ ഉയർന്നിട്ട് നാളുകളായി.

ഭരണഘടനയുടെ 270​-ാം വകുപ്പ് പ്രകാരം മൊത്തം നികുതിയുടെ നിശ്ചിത ശതമാനം വിഹിതം സംസ്ഥാനങ്ങള്‍ക്ക് നൽകാനുളള ബാധ്യത കേന്ദ്ര സർക്കാരിനുണ്ട്. അത് തീരുമാനിക്കാൻ ഭരണഘടനയുടെ 280-ാം വകുപ്പ് പ്രകാരം രൂപീകരിക്കുന്ന ഭരണഘടനാ ബാധ്യതയുളള സ്ഥാപനമാണ് ധനകാര്യ കമ്മീഷൻ. കമ്മീഷന്‍റെ ശുപാർശകളുടെ അടിസ്ഥാനത്തിലാണ് കേന്ദ്രം സംസ്ഥാനങ്ങൾക്കുളള നികുതി വിഹിതം നൽകുന്നത്. അഞ്ച് വർഷം തോറും ധനകാര്യ കമ്മീഷൻ രൂപീകരിക്കുക എന്നത് ഭരണഘടനാപരമായ   ബാധ്യതയുമാണ്. ഇതിൽ ഭരണഘടനാ ബാധ്യതയുളള കമ്മീഷൻ സംസ്ഥാനങ്ങളുടെയും കേന്ദ്രത്തിന്‍റെയും ഇടയിൽ ആര്‍ബിറ്ററേറ്ററുടെ റോളാണ് വഹിക്കുന്നത്. ആ റോളിന് മാറ്റമുണ്ടാകുന്ന സാഹചര്യമാണ് നിലവിൽ രൂപം കൊണ്ടിരിക്കുന്നത്.   കഴിഞ്ഞ കുറച്ചു കാലമായി കേന്ദ്ര സംസ്ഥാന ബന്ധങ്ങളിലെ ഫെഡറൽ സ്വഭാവം ഇല്ലാതാക്കാനുളള സാമ്പത്തിക നടപടികളാണ് കേന്ദ്രത്തിന്‍റെ ഭാഗത്ത് നിന്നും നിരന്തരം ഉണ്ടാകുന്നതെന്ന് ചൂണ്ടിക്കാണിക്കപ്പെടുന്നു.

നോട്ട് നിരോധനമെന്ന സാംപിൾ വെടിക്കെട്ടിൽ തുടങ്ങിയ പരിഷ്കരണ നടപടികൾ ജിഎസ്ടി ആയും ധന ഉത്തരവാദിത്വ പുനഃപരിശോധനാ കമ്മിറ്റി നിർദേശങ്ങളായും ജനാധിപത്യത്തിന്‍റെ വേരറുക്കുകയാകും ഫലമെന്ന് സാമ്പത്തിക വിദഗ്‌ധർ പറയുന്നു.

ഇതിനെ പിന്നാലെയാണ് പതിനഞ്ചാം ധനകാര്യ കമ്മീഷൻ വരുന്നത്. അതിന്‍റെ പരിഗണനാ വിഷയങ്ങൾ സംസ്ഥാനങ്ങളുടെ ഫെഡറൽ അധികാരം കടന്നെടുക്കുക മാത്രമല്ല, സംസ്ഥാനങ്ങളെ കേന്ദ്രത്തിന്‍റെ ഭൃത്യരാക്കുന്ന സമീപനവുമാണ്.

സംസ്ഥാനങ്ങളെ സാമ്പത്തികമായി ഞെരുക്കി തകർക്കുന്ന നിലപാടുകളുടെ സൂചനയാണ് പുതിയ ധനകമ്മീഷന്‍റെ പരിഗണനാവിഷയങ്ങളിൽ ഇടം പിടിച്ചിരിക്കുന്നത്. ആസൂത്രണ കമ്മീഷൻ പിരിച്ചുവിടുകയും സംസ്ഥാനങ്ങൾക്കുളള പദ്ധതി സഹായം ഇല്ലാതാക്കുകയും ചെയ്തതിന് പിന്നാലെയാണ് ഈ നീക്കം. ഇതിനിടയിൽ നടപ്പാക്കിയ ജിഎസ്ടിയായിരുന്നു മറ്റൊന്ന്.

പതിനാലാം ധനകമ്മീഷൻ നടപ്പിലാക്കിയത് മുതലുളള കേന്ദ്ര നീക്കങ്ങൾ എങ്ങനെ സംസ്ഥാനങ്ങൾക്ക് സാമ്പത്തിക ബാധ്യതയായി എന്ന് കൂടി പരിശോധിച്ചാല്‍ മാത്രമേ പതിനഞ്ചാം ധനകാര്യ കമ്മീഷനിലെ പരിഗണനാ വിഷയങ്ങൾ എങ്ങനെയാണ്  സംസ്ഥാനങ്ങളെ സാമ്പത്തിക അടിമകളാക്കി മാറ്റുന്നതെന്ന് തെളിയുകയുളളൂ.

മൻമോഹൻ സിങ്ങിന്‍റെ രണ്ടാം സർക്കാരിന്‍റെ കാലത്താണ് വൈ.വി.റെഡ്ഢി അധ്യക്ഷനായ പതിനാലാം ധനകമ്മീഷൻ  നിയോഗിക്കപ്പെട്ടതെങ്കിലും അത് നടപ്പാക്കുന്നത് മോദി സർക്കാരിന്‍റെ കാലത്താണ്. പതിമൂന്നാം ധനകാര്യ കമ്മീഷൻ 32 ശതമാനമാണ് നികുതി വിഹിതം അനുവദിച്ചതെങ്കിൽ പതിനാലാം ധനകമ്മീഷൻ 42 ശതമാനം അനുവദിച്ചു. ഇത് സംസ്ഥാനങ്ങൾക്ക് ചില ഘടകങ്ങളുടെ അടിസ്ഥാനത്തിൽ വിഭജിച്ച് നൽകും.

എന്നാൽ പതിമൂന്നാം ധനകമ്മീഷ​ൻ 32 ശതമാനം നൽകുന്ന കാലത്ത് ഈ​ നികുതി വിഹിതം നൽകുന്നതിന് പുറമെ നൽകിയിരുന്ന പദ്ധതി വിഹിതം, കേന്ദ്രാവിഷ്കൃത പദ്ധതികളിൽ കേന്ദ്രം വഹിക്കുന്ന തുകയിൽ കുറവ് വരുത്തുകയും അതിന് സംസ്ഥാനങ്ങളുടെ ബാധ്യത വർധിപ്പിക്കുകയും ചെയ്തു. അതായത് പതിനാലാം ധനകാര്യ കമ്മീഷൻ പത്ത് ശതമാനം വർധിപ്പിച്ചുവെങ്കിലും സംസ്ഥാനങ്ങൾക്ക് ലഭിക്കുന്ന കേന്ദ്രത്തിൽ നിന്നും ലഭിക്കുന്ന അധിക തുക രണ്ട് ശതമാനം മുതൽ മൂന്ന് ശതമാനം വരെയുളള​ വർധനവേയുളളൂ.

അത്  സംഭവിച്ചത് ഇങ്ങനെയാണ്. കേന്ദ്രാവിഷ്കൃത പദ്ധതികളിൽ മുൻകാലങ്ങളിൽ കേന്ദ്രം 75​ശതമാനവും സംസ്ഥാനങ്ങൾ 25 ശതമാനവുമാണ് ചെലവാക്കിയിരുന്നത്. എന്നാൽ മോദി സർക്കാർ കേന്ദ്രവിഹിതം 60 ശതമാനമാക്കി കുറയ്ക്കുകയും സംസ്ഥാന വിഹിതം 40​ശതമാനമാക്കി വർധിപ്പിക്കുകയും ചെയ്തു.

ദുരന്ത നിവാരണ പദ്ധതികളുടെ കേന്ദ്ര സംസ്ഥാന അനുപാതം 90: 10 എന്നാക്കണം എന്ന്  പതിനാലാം ധനകാര്യ കമ്മീഷൻ ശുപാർശ ചെയ്തത് ഇപ്പോഴും നടപ്പാക്കാതെ 75: 25 എന്ന് തന്നെ തുടരുന്നു. ആസൂത്രണ കമ്മീഷൻ ഇല്ലാതായതോടെ പദ്ധതി ഗ്രാന്റുകൾ ഇല്ലാതായി. ഉദാഹരണത്തിന് പതിമൂന്നാം ധനകാര്യ കമ്മീഷൻ ശുപാർശയിൽ 32ശതമാനം നികുതി വിഹിതം അനുവദിച്ച കാലത്ത് കേന്ദ്രാവിഷ്കൃത പദ്ധതികളിലെ കേന്ദ്ര വിഹിതവും പദ്ധതി അസിസ്റ്റൻസ് തുകയുമൊക്കെയായി ഏഴ് മുതൽ എട്ട് ശതമാനം വരെ ലഭിക്കുമായിരുന്നു. അതായത് 32 ശതമാനം കേന്ദ്ര നികുതിവിഹിതത്തോടൊപ്പം ഈ തുക കൂടി ചേരുമ്പോൾ 39 മുതൽ 40 ശതമാനം വരെ തുകയുടെ വിഹിതം സംസ്ഥാനങ്ങൾക്ക് ലഭിക്കും.  അതായത്  പതിനാലാം ധനകാര്യ കമ്മീഷൻ നടപ്പാക്കിയപ്പോൾ പത്ത് ശതമാനത്തിന്‍റെ കൂടുതൽ ഉണ്ടായെങ്കിലും മറ്റുളള സാമ്പത്തിക സഹായങ്ങളില്ലാതാക്കിയതോടെ  സാമ്പത്തിക പിന്തുണ എന്നത് രണ്ട് മുതൽ മൂന്ന് ശതമാനംവരെയുളള വർധനയിൽ ചുരുങ്ങി എന്നതാണ് യാഥാർത്ഥ്യം.

പതിനാലാം ധനകമ്മീഷൻ ശുപാർശയിൽ കേരളത്തിന് ലഭിച്ചത് രണ്ടര ശതമാനം നികുതി വിഹിതമായിരുന്നു. നേരത്തെ ആസൂത്രണ കമ്മീഷൻ വഴി പദ്ധതി ഗ്രാന്റും കേന്ദ്രാവിഷ്കൃത പദ്ധതികളുടെ ഗ്രാന്റുമൊക്കെയായി സംസ്ഥാനത്തിന് ഈ തുക മോശമാകുമായിരുന്നില്ല.​ എന്നാൽ​ പദ്ധതി ഗ്രാന്റും കേന്ദ്രാവിഷ്കൃത പദ്ധതികളിൽ സംസ്ഥാനം ചെലവഴിക്കേണ്ടുന്ന തുകയുടെ അളവ് കൂടിയതും കേരളത്തെ സംബന്ധിച്ച് കനത്ത തിരിച്ചടി തന്നെയാണ്.

ഇത് മിക്കവാറും എല്ലാ സംസ്ഥാനങ്ങളുടെയും സാമ്പത്തിക അവസ്ഥയെ ബാധിച്ച നിലയിലാണ്.  ഇതിന് മുകളിലേയ്ക്കാണ് നോട്ട് നിരോധനം മുതൽ ജിഎസ്ടി വരെയുളള സാമ്പത്തികാസ്ഥിരതയുണ്ടാക്കിയ നടപടികൾ ഉണ്ടായത്. ഈ പശ്ചാത്തലത്തിലാണ് പതിനഞ്ചാം ധനകാര്യ കമ്മീഷന്‍റെ  പരിഗണനാ വിഷയങ്ങളെ പരിശോധിക്കേണ്ടത്.

ഭരണഘടന വിഭാവനം ചെയ്യുന്ന റോളിൽ നിന്നും പിന്മാറുകയും പകരം കേന്ദ്ര ഏജൻസി  എന്ന നിലയിലേയ്ക്ക് ധനകാര്യ കമ്മീഷൻ എന്ന ഭരണഘടനാ സ്ഥാപനം പരിമിതപ്പെടുകയും ചെയ്യുകയാകുമെന്ന് അതിന്‍റെ പരിഗണനാ വിഷയങ്ങൾ ചൂണ്ടിക്കാണിക്കപ്പെടുന്നു.

കമ്മീഷന് അധികാരമില്ലാത്ത കാര്യങ്ങളാണ് കമ്മീഷന്‍റെ പരിഗണനാ വിഷയങ്ങളിൽ ഉൾപ്പെടുത്തിയിരിക്കുന്ന പലതുമെന്ന വിമർശനം ഉയർന്നിട്ടുണ്ട്. കമ്മീഷന്‍റെ പരിഗണനാ വിഷയത്തിലെ ഏഴാം വകുപ്പ് (Viii)  പറയുന്നത് സംസ്ഥാന സർക്കാരുകളുടെ ജനതാൽപര്യ നയങ്ങളെ നിയന്ത്രിക്കുന്നതിനെ കുറിച്ചാണ്. കമ്മീഷന്‍റെ അധികാര പരിധിയിൽ സംസ്ഥാനങ്ങളിൽ ജനപ്രാതിനിധ്യ നിയമപ്രകാരം അധികാരത്തിൽ​ വന്ന സർക്കാരുകൾ സ്വീകരിക്കുന്ന ജനക്ഷേമ പരിപാടികളെ നിയന്ത്രിക്കുന്നതിനെ കുറിച്ച് അന്വേഷിക്കാനുളള​ അധികാരമുണ്ടോ?

ഉദാഹരണമായി എടുത്താൽ വിവിധ തരം ക്ഷേമ പെൻഷനുകൾ ഏതാണ്ട് കൃത്യതയോടെ നൽകുന്ന സംസ്ഥാനമാണ് കേരളം. അതുപോലെ തന്നെ മറ്റ് പല ക്ഷേമ പദ്ധതികളും വിവിധ സംസ്ഥാന സർക്കാരുകൾ നടപ്പാക്കുന്നുണ്ട്. ഇവയെ ‘പോപ്പുലിസ്റ്റ്’ എന്ന പേരിൽ നിയന്ത്രിക്കണം എന്ന്  പറയുന്നത് ഒഴിവാക്കുന്നതിന്‍റെ പ്രാഥമിക ഘട്ടമാണ്. അതിനേക്കാളുപരി ഇത് സംസ്ഥാനത്തിന് നയം നടപ്പിലാക്കാനുളള ഭരണഘടനാപരവും ജനാധിപത്യപവരും ഫെഡറൽ സ്വാതന്ത്ര്യത്തിന് മേലുളള കൈകടത്തലാണ്.

‘ടേംസ് ഓഫ് റഫറൻസി’ലെ അഞ്ചിൽ റവന്യൂ കമ്മി ഗ്രാന്റ് കൊടുക്കണോ വേണ്ടയോ എന്ന് ധനകാര്യ കമ്മീഷൻ പറയണമെന്നതാണ്. ഭരണഘടനയുടെ 275-ാം വകുപ്പ് പ്രകാരം ഒന്നാം ധനകാര്യ കമ്മീഷന്‍റെ കാലം മുതൽ നൽകി വരുന്ന ഗ്രാന്റ് ഇല്ലാതാക്കുന്നതിലേയ്ക്കാണ്  ഈ പരിഗണനാ വിഷയം വിരൽ ചൂണ്ടുന്നത്.

മറ്റൊരു വിഷയം വരുന്നത് ഏഴിലാണ്. സംസ്ഥാനങ്ങളുടെ പെർഫോമൻസ് വിലയിരുത്തി ധനകാര്യ കമ്മീഷൻ സാമ്പത്തിക സഹായം നിർദേശിക്കും എന്നാണ്  അതിന്‍റെ സൂചന. ഇത് ധനകാര്യ കമ്മീഷൻ സംസ്ഥാനങ്ങൾക്ക് മാർക്ക് ഇടുന്നതിന് തുല്യമാണെന്ന് വിമർശനം രാഷ്ട്രീയ പാർട്ടികൾ കക്ഷിഭേദമില്ലാതെ ഉയർത്തിയിരുന്നു.

ജനാധിപത്യപരമായി തിരഞ്ഞെടുത്ത സർക്കാരിന് മാർക്കിടുന്നത് തിരഞ്ഞെടുപ്പുകളിൽ ജനങ്ങളാണ്. ആ അധികാരത്തെ  രാഷ്ട്രീയം കൊണ്ടും ഉദ്യോഗസ്ഥാധികാരം കൊണ്ടും മറികടക്കാനുളള​ കുറുക്കുവഴി ജനാധിപത്യത്തിന്‍റെ കാതൽ മുറിച്ചു മാറ്റുന്നതാണ്. കേന്ദ്ര സംസ്ഥാന ബന്ധങ്ങൾ തമ്മിലുളള വ്യവഹാരങ്ങളെ കുറിച്ചുളള സങ്കൽപ്പങ്ങളെ മാറ്റി മറിക്കുന്നതാണ് ഈ നടപടികൾ.

ഓരോ സംസ്ഥാനങ്ങളും ഓരോ വിഷയങ്ങളിലും നേരിടുന്ന പ്രശ്നങ്ങൾക്ക് വ്യത്യസ്ത അവിടുത്തെ സാമൂഹിക, സാമ്പത്തിക, പാരിസ്ഥിതിക വിഷയങ്ങൾ കൊണ്ട് ഉണ്ടാകുമെന്നത് പോലും പരിഗണിക്കാതെയാണ്  ഇങ്ങനെയൊരു നിർദേശം പരിഗണനാവിഷയത്തിനുളളിൽ ഉൾപ്പെടുത്തിയിരിക്കുന്നത്. ഇത് സംസ്ഥാനങ്ങളുടെ ഫെഡറൽ അധികാരത്തെ മാത്രമല്ല, വ്യക്തികളുടെ സ്വാതന്ത്ര്യത്തിലേയ്ക്ക് പോലും കടന്നു കയറുന്നതിലേയ്ക്ക് വ്യാപിക്കാം.

പരിഗണനാ വിഷയം എട്ടിൽ പറയുന്നത് 2011 ലെ ജനസംഖ്യ അടിസ്ഥാനമാക്കണം എന്നതാണ്. ഇത് ഇതുവരെ ചെയ്യാതിരുന്ന ഒരു കാര്യമാണ്. ചില നിർദേശങ്ങൾ മാത്രമായിരിക്കും കാലയളവ് സംബന്ധിച്ച് വയ്ക്കുക. അത് പല സംസ്ഥാനങ്ങളുടെ സാധ്യതകളും പരിമിതികളും പരിഗണിച്ച് എല്ലാവരോടും നീതി കാണിക്കുന്നതിനാണ്.

15th finance commission visit

പതിനഞ്ചാം ധനകാര്യ കമ്മീഷൻ തദ്ദേശ സ്ഥാപന പ്രതിനിധികളും ഉദ്യോഗസ്ഥരുമായി ചർച്ച നടത്തുന്നു

ഉദാഹരണത്തിന് കഴിഞ്ഞ തവണത്തെ കമ്മീഷൻ 1971ലെയും 2011ലെയും ജനസംഖ്യ പരിഗണിച്ചാണ് ധനകമ്മീഷൻ ശുപാർശ നൽകിയത്. ഇത്തവണ അത് 2011ലെ ജനസംഖ്യ മാത്രമെടുത്താൽ മാത്രം എന്ന് നിജപ്പെടുത്തിയിരിക്കുന്നു. അത് ധനകമ്മീഷനെ  ആർബിട്രേറ്റർ എന്ന നിലയിൽ നിന്നും കേന്ദ്ര ഏജൻസിയാക്കി മാറ്റുന്നതിന് ഉദാഹരണമാണ്.

ധനകാര്യ കമ്മീഷൻ അധ്യക്ഷനായ എൻ.കെ.സിങ് എന്ന മുൻ ഐഎഎസ് ഉദ്യോഗസ്ഥനും ഇപ്പോഴത്തെ ബിജെപി നേതാവും നേരത്തെ ധന ഉത്തരവാദിത്ത നിയമ പുനഃപരിശോധനാ കമ്മിറ്റിയുടെ അധ്യക്ഷനായിരുന്നു. 2017 ൽ അദ്ദേഹം ഇത് സംബന്ധിച്ച് നൽകിയ റിപ്പോർട്ടിൽ സംസ്ഥാനങ്ങൾ ധനകമ്മി കുറയ്ക്കണം എന്നാവശ്യപ്പെട്ടിട്ടുണ്ട്. ധനകമ്മി 1.7 ശതമാനമാക്കി കുറയ്ക്കണമെന്നാണ് ആ​ കമ്മിറ്റി റിപ്പോർട്ടിൽ ആവശ്യപ്പെടുന്നത്. കേരളം ഉദാഹരണമാക്കി പരിശോധിച്ചാൽ ധനകമ്മി 3.3 ശതമാനത്തോളമാണ്. ഇത് മൂന്ന് ശതമാനമാക്കി കുറയ്ക്കാൻ പോലും പറ്റാത്ത സ്ഥിതിയിലാണ് സംസ്ഥാനം. ഇത് കുറയ്ക്കണമെങ്കിൽ സംസ്ഥാനത്തിന്‍റെ ദൈനംദിന ചെലവുകൾ പോലും സ്തംഭനാവസ്ഥിലേയ്ക്ക് മാറും. മൂ ലധന, വികസന പദ്ധതികൾ മുഴുവൻ നിലയ്ക്കുന്ന അവസ്ഥയിലേയ്ക്ക് എത്തും. ഈ റിപ്പോർട്ടിലെ ഉളളടക്കത്തിന് ചേരുന്ന തരത്തിലാണ് ഇതിലെ പരിഗണനാവിഷയങ്ങളെ വരികൾക്കിടയിൽ വായിക്കുമ്പോൾ തെളിയുന്നത്.

ഭരണഘടന വിഭാവനം ചെയ്യുന്ന സംസ്ഥാനങ്ങളുടെ ഫെഡറൽ അധികാരത്തിന് മേൽ കേന്ദ്രത്തിന്‍റെ അമിതാധികാരം അടിച്ചേൽപ്പിക്കുന്ന ഏകാധിപത്യത്തിലേയ്ക്കുളള വഴിയാക്കി ഇതിനെ മാറ്റുകയാണ്. കേന്ദ്ര -സംസ്ഥാന ബന്ധങ്ങളെ ഉടമ -അടിമ ബന്ധമാക്കി മാറ്റാനുളള നീക്കമാണിതെന്ന വിമർശനം ഉയർന്നിട്ടും ഈ  വിഷയങ്ങളെ പുനഃപരിശോധിക്കാൻ തയ്യാറായിട്ടില്ല.

Get Malayalam News and latest news update from India and around the world. Stay updated with today's latest News news in Malayalam at Indian Expresss Malayalam.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ