ശ്വാസം

1
ആട്ടിൻ ചൂരുള്ള കമ്പിളിയിൽ നിന്നും രണ്ട് ശ്വാസങ്ങൾ
മുകളിലേക്കുയരുന്നു.
ശ്വാസം കൊണ്ട് മീട്ടാവുന്ന
ഉപകരണങ്ങളായി
രണ്ടുടലുകൾ മുറിയ്ക്കുള്ളിൽ.

2
അടിവയറിന്റെ ചൂടിന്
ഗർഭകാലത്തിന്റെ മണമുണ്ട്.
ഇരുട്ടു കൊത്തി തിന്നുന്ന
മീനുകളുടെ നദി
മണത്തിലലിഞ്ഞിട്ടുണ്ട്
ഗുഹാ ചിത്രങ്ങളെക്കാൾ
പ്രാചീനമായ ലിപികളുടെ ജ്യാമിതിയിലാണ്
അടിവയർ മടക്കുകളുടെ ആമുഖം.

avinash udayabhanu,poem

3
വയറിൽ നിന്നും മുലകളിലേക്ക്
നീളുന്ന
ശ്വാസത്തിന്റെ തുരങ്കം.
പിങ്ക് നിറത്തിൽ മുലക്കണ്ണുകളുടെ
വഴിവെളിച്ചം.

4
ഓരോ ശ്വാസത്തിലും വികസിക്കുന്ന
രാത്രിയുടെ ബലൂൺ.
കൈത്തണ്ടയിൽ നിന്നും ബലൂണിലേക്ക്
മിന്നാമിനുങ്ങുകളുടെ ചരട്.
ശ്വാസത്തിന്റെ കാവലിൽ രാത്രിയുറങ്ങുന്നു.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook