കിടപ്പറക്കവിതകൾ

1

നമ്മുടെ കിടക്കയിൽ

പമ്മിയിരിക്കാറുണ്ട് ഒരു കാട്ടുകുതിര

അതിൻ്റെ പ്രേതം

നമ്മിലൊരാളെ

കീഴ്പ്പെടുത്താറുമുണ്ട്.

ഞാനോ നീയോ എന്ന

പരമ രഹസ്യം

വേഴ്ചാ മുറിവുകളിൽ

നീറിയിരുന്നോട്ടെ.

2

ഒരേ കിടക്കയിൽ

പുറം തിരിഞ്ഞ് രാത്രി

കഴിച്ച് കൂട്ടുമ്പോഴും

ഒരേ പറത്തം പറക്കും

പക്ഷികളാണു നാം.

കാലമേറെക്കഴിയേണ്ട

നിൻ്റെ തൂവലുകളിൽ പറ്റിയ

എൻ്റെ വീർപ്പ് നീ കണ്ടെടുത്തേക്കും.

അന്നേരം നമുക്കുണ്ടായേക്കില്ല

ഒരേ പറത്തം

പുറന്തിരിഞ്ഞെങ്കിലുമുറങ്ങാൻ

ഒരേ രാത്രി !

3

ഉടഞ്ഞ മുലകളും തളർന്ന വൃഷണവും

വാരിയണിഞ്ഞ്

കിടക്കവിട്ടെണീറ്റ് മുഖം കഴുകി

നീ പത്രം വായിക്കാനും

ഞാൻ ചായ തിളപ്പിക്കാനും പോകും.

4

തലയണകൾക്കുള്ളിൽ

പ്രാവുകൾ കുറുകാറുണ്ട്

ഒന്നും ചെയ്യാനില്ലാത്ത

പകലുകളിൽ.

ചിലപ്പോൾ കൊമ്പുമുട്ടിച്ച്

രണ്ട് കാട്ടുമൃഗങ്ങൾ

മുക്രയിടുന്നതും കേൾക്കാം.

5

ബെഡ്ഷീറ്റിൽ

മയിലുകളുടെ ചിത്രമുണ്ട്.

അവയോടപ്പം

നീ നൃത്തം ചെയ്യാറുണ്ട്.

കിടക്കയിൽ കാട് പൂക്കാറുണ്ട്.