meenu elizbath, poem, onam

നിനക്ക് കളളു പോലെയാണ് എനിക്ക് നീ
കുടിക്കാത്ത നീയും, കുടിച്ചു വരുന്ന നീയും, രണ്ടു പേരാണെന്ന്
എനിക്കറിയാവുന്നതു പോലെ നിനക്കറിയില്ലല്ലോ ?!

ഇടക്ക് കുടി നിർത്തുമെന്നുള്ള നിന്റെ പ്രസ്താവന
എന്റെ നെഞ്ചിൽ തീ കോരിയിടുമെങ്കിലും…
കുടിക്കാത്ത നീയൊരു പിശാചായി മാറുമെങ്കിലും…
ഞാൻ നിന്നെ പ്രണയിക്കുന്നതിനാൽ
എനിക്ക് പറയാതിരിക്കാൻ കഴിയില്ലല്ലോ
പൊന്നെ ഈ മരണക്കുടിയാപാത്താണെയെന്ന്.

എനിക്ക് നിന്നെയും, നിനക്ക് കളളിനെയും, ഒഴിവാക്കാനാവാത്തത് പോലെ…
ഞാൻ പറഞ്ഞു കൊണ്ടേയിരിക്കുന്നു…നീ കുടിച്ചു കൊണ്ടേയിരിക്കുന്നു..

കുടിക്കാത്ത നീ…
ക്രൂരനും, ദുഷ്‌ടനും, ചെകുത്താനും, നീചനും, അഹങ്കാരിയും
ക്ഷിപ്രകോപിയും, കുത്തുവാക്കുകൾ കൊണ്ട് നോവിക്കുന്നവനും .
വിഷാദിയും മൗനിയും അരസികനും പിശുക്കനുമാണ്.
നീന്റെ പച്ച ദിനങ്ങളെ നരകം പോലെ വെറുത്തു ഞാൻ
കയ്പ്പ‌്‌നീർ കുടിച്ചിറക്കുന്നു .
കുടിക്കാത്ത നിനക്കെന്നെ വേഗം മടുക്കുകയും അരിശത്തോടും
വെറുപ്പോടും നീ തിരിഞ്ഞു കിടന്നു കൂർക്കം വലിക്കുകയും
രാത്രി മുഴുവൻ പിറുപിറുക്കുകയും പിച്ചുംപേയും പറയുകയും ചെയ്യുമ്പോൾ,
ഞാൻ മച്ചിലേക്ക് തുറിച്ചു നോക്കി ഉറക്കത്തെ കാത്തു.
നിനക്ക് കുടി നിർത്താൻ തോന്നിയ ശപ്തനിമിഷത്തെ ശപിച്ചു,
കയ്പ്പ്നീർ കുടിച്ചിറക്കുന്നു.

എന്നാൽ,
കുടിച്ചു വരുന്ന നീ,
നറുനിലാ പുഞ്ചിരി പൊഴിക്കുന്നവനും
വെള്ളരിപ്രാവ് പോലെ സമാധാനിയുമാകുന്നു
പ്രണയം, നിറച്ചു വെച്ചിരിക്കുന്നയാ ചുവന്ന കണ്ണുകൾ എന്നെ ഉന്മത്തയാക്കുന്നു.
ആദ്യമായി കാണുമ്പോലുള്ള മിഴിച്ചു നോട്ടം
എന്റെ കവിളുകൾ കൂടുതൽ തുടുപ്പിക്കുന്നു…
ഞാൻ നാണിച്ചു മുഖം കുനിക്കുന്നു .
വഴുതി വീഴുന്ന കൊഴവാക്കുകളിൽ നീ തേൻ തുള്ളികൾ നിറക്കുകയും. അവയെന്റെ ചുണ്ടിലേയ്ക്കിറ്റിക്കുകയും ഞാനതു അമൃത് പോലെ നുണഞ്ഞിറക്കുകയും, ചെയ്യുന്നു

മദ്യം നിനക്കെന്തൊക്കെയോ ആരൊക്കെയോ ആകുന്നതു പോൽ
നീ എനിക്കും ആരോക്കെയോ എന്തൊക്കെ ആവുന്നു..
എന്റെ ലജ്ജ കോരിക്കുടിച്ചു നീ കൂടുതൽ ഉന്മത്തനാവുകയും
നിനക്കു ഞാൻ വളരെ പ്രിയമുള്ളതാവുകയും ചെയ്യുന്നു.
എന്റെ ഓരോ ഇഞ്ചും നീ ചുംബിച്ചു ചുവപ്പിക്കുമ്പോൾ,
എന്റെ പിൻകഴുത്തിലെ കുഞ്ഞു രോമങ്ങൾ എഴുന്നേറ്റ് നിന്ന് നിന്നെ തൊഴുതുപോകുന്നു. .
നീയെന്നെ ഭൂലോകസുന്ദരിയായി വാഴിക്കുകയും
പ്രണയ കിരീടം ചൂടിക്കുകയും, ചെയ്യുന്നു
ഞാനല്ലാതെ അന്യ സ്ത്രീകൾ നിനക്കുണ്ടാവില്ലന്നെന്റെ കാതിൽ ആണയിടുമ്പോൾ
ആ നുണവാക്കുകൾ ഞാൻ നുണഞ്ഞലിയിക്കാതെ, വെള്ളം തൊടാതെ വിഴുങ്ങുന്നു..

കള്ളിന്റെ കനപ്പിലും, നിറഞ്ഞ പുഞ്ചിരി മായാതെ,
നീയൊരു കുഞ്ഞിനെപ്പോലെ കണ്ണ് പൂട്ടുന്നു.
നിന്റെ നെഞ്ചിൽകൂട്ടിൽ തല പൂഴ്ത്തി ഞാനും സുഷുപ്തിയിലാഴുന്നു.
അതെ നിനക്ക് കള്ളു പോലെയാണ്
എനിക്ക് നീ.

Get Malayalam News and latest news update from India and around the world. Stay updated with today's latest Literature news in Malayalam at Indian Expresss Malayalam.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ