നാടിന് തീ പിടിക്കുമ്പോൾ

തോക്കിനോടെന്തുത്തരമെന്ന്

ചോദിച്ചു മുമ്പാരോ.....

തോക്കിന് തോക്കല്ലാതെ മറ്റെ- ന്തുത്തരമെന്നുത്തരം '

തോക്കിനെ തോക്കാൽ നേരിട്ട ചോര -

പ്പുഴകൾ നീന്തിക്കയറുന്നു നാം ...

വീണ്ടും സ്വന്തം ചോരയിൽ കുതിർന്ന

കൊടിയുയരുന്നു കാമ്പസിൽ

അവൾ, പഴയ കയ്യൂരബൂബക്കറിന്റെ ' കുഞ്ഞുമോളല്ലാതെ മറ്റാര് ?

പേരും പരിചിത, മദ്രുമാന്റെ മകൾ,

പഴയ പട്ടുപാവാടക്കാരി ..

അവളുടെ പിന്നിലുയരുന്നു നൂറുനൂറ് പ്ലക്കാർഡുകൾ, മുദ്രാകാവ്യങ്ങൾ:

ഹേ റാം, ജയ്ഭീം, തക്ബീറി,ങ്ക്വിലാബ്,

ജയ്ഹിന്ദിന്റെ മഴവിൽ പതാകകൾ

തോക്കിനോട് തോക്കല്ലുത്തരo, തോക്കി -

നേക്കാൾ കൂർത്തൊരു ചൂണ്ടുവിരൽ ..

ഹായ് കൈ നീട്ടുന്നു പരസ്പരം ഗാന്ധിയുമoബേദ്ക്കറും ...

വാക്കാണ് തോക്കല്ല ,ചൂണ്ടുവിര-

ലുത്തരം കുഞ്ഞുങ്ങളേ ...

തുപ്പുന്നു വീണ്ടും തോക്ക് വിഷപ്പുകയും

പെല്ലറ്റും ഘുമുഘുമേ ...

ഉയരുന്നു ചൂണ്ടു വിരലുകളായിരമാകാശ -

ത്തിനും ഭൂമിക്കുമിടയിൽ ... തീയണയ്ക്കാനോടിയെത്താനെന്തി -

നാധാറും ജനന സർടിഫിക്കറ്റും ? പ്രായപൂർത്തിയാവാൻ കാത്തു നിൽക്കുന്നതെന്തിന്

നാടിന് തീ പിടിക്കുമ്പോൾ ........