Latest News
സംസ്ഥാനത്ത് കൂടുതല്‍ ഇളവുകള്‍ നാളെ മുതല്‍
UEFA EURO 2020: സ്കോട്ട്ലന്‍ഡിനെ കീഴടക്കി ക്രൊയേഷ്യ; ഇംഗ്ലണ്ടിനും ജയം
ഡെൽറ്റ പ്ലസ് വകഭേദം: കേരളം അടക്കം മൂന്ന് സംസ്ഥാനങ്ങൾക്ക് ജാഗ്രതാ നിർദേശം
രാജ്യദ്രോഹ കേസ്: ഐഷ സുല്‍ത്താനയെ വീണ്ടും ചോദ്യം ചെയ്യും
രാജ്യത്തെ കോവി‍ഡ് കേസുകള്‍ മൂന്ന് കോടി കവിഞ്ഞു
സംസ്ഥാനത്ത് ആദ്യ ഡോസ് വാക്സിന്‍ സ്വീകരിച്ചവര്‍ ഒരു കോടിയിലധികം; കൂടുതലും സ്ത്രീകള്‍

ഇമ്മക്കുട്ടി-മുബശ്ശിർ സിപി എഴുതിയ കവിത

ഇമ്മയുടെ ചുണ്ടിൽ കെടാനൊരുങ്ങുന്നു പെടുന്നനെ തീർന്ന് പോയൊരു ബാല്യകാലം.

mubashir cp , poem, iemalayalam

 

ആദ്യമായ്
ട്രെയിൻ കയറിയപ്പം
കട്ടിക്കണ്ണടയും
നീളൻ പർദ്ദയുമുടുത്ത ഇമ്മ
ഇളം കാലിൽ
കടൽ തിരകളാദ്യമായ്
തൊട്ടപോലുള്ള കുഞ്ഞായി.
ഒഴിഞ്ഞ സീറ്റുകളിലൊന്നുമിരിക്കാതെ
ഉപ്പ് മണലിലോടും കുഞ്ഞു പോൽ
ഇടക്കിടെ
ഞാനിരിക്കുന്നിടത്ത് വന്ന് ചിരിച്ചും
വീണ്ടുമോടിയും
ബോഗിയുടെ ഒരു തലക്കൽ നിന്നും
മറു തലക്കിലേക്ക് പറന്നു കളിച്ചു.

കാലം വരച്ചിട്ട
കൈ തണ്ടയിലെ തൊലിച്ചുളിവ് കണ്ട്
കൂടെയിരുന്നവർ
“ഇതെന്ത് തള്ളയെന്ന്”
മുഖം കറുപ്പിക്കവേ
പട്ടത്തിനൊപ്പം പാഞ്ഞ
കുഞ്ഞിനെ പിടിച്ചിരുത്തും പോലെ
ഇമ്മയെ പിടിച്ച്
എന്നോട് ചേർത്തിരുത്തി.

തീവണ്ടിയിൽ തൊട്ട്
പുറത്തൊരു കാട് കടന്നു പോകവേ
വേരറ്റതായിട്ടും
നരച്ച മുടിയിഴകളിൽ നിന്നും
ചൂടി നടന്നൊരു മുല്ലപ്പൂവിന്റെ
പൂ മണം ചുറ്റിലും പടർന്നു.mubashir cp , poem, iemalayalam

കണ്ണടച്ചില്ലുകളിൽ
വെയിൽ കുത്തുമ്പോൾ
കണ്ണ് ചിമ്മുകയും
പുഴ കാണുമ്പോൾ
കൈ കൊട്ടിച്ചിരിക്കുകയും ചെയ്തു.

ദാഹിക്കുന്നതിന്
വെള്ളം നീട്ടിയിട്ടും വേണ്ടന്നും
അത് വഴി വന്ന
ഐസ് ക്രീം തന്നെ വേണമെന്നും
അപ്പുറത്തിരുന്ന പെൺകൊച്ച്
കണ്ട് ചിരിച്ചുകൊണ്ടിരുന്ന
കാർട്ടൂൺ
ഇനിക്കും വെച്ച് താന്നും
എന്നോട് വാശിപിടിച്ചു.
കുട്ടിത്തം സഹിക്കവയ്യാതെ
ഞാൻ
ഇമ്മാനിം കൂട്ടി
അടുത്ത സ്റ്റേഷനിലിറങ്ങി.

ഒഴുകിത്തീർന്നൊരു പുഴയെ
ഭൂമി പൊറുക്കും പോൽ
കാൽപാട് തീർന്നൊരു
കുറിയൻ കാലും വലിച്ച്
മുതുക് നന്നേ വളച്ച്
പ്ലാറ്റ്ഫോം മുറിച്ചു നടക്കവേ
ഇമ്മയുടെ ചുണ്ടിൽ
കെടാനൊരുങ്ങുന്നു
പെടുന്നനെ തീർന്ന് പോയൊരു
ബാല്യകാലം.

ഇമ്മാനെ ഇനി ആദ്യായിട്ട്
കടല് കാണിക്കാൻ കൊണ്ടോണം.

Get the latest Malayalam news and Literature news here. You can also read all the Literature news by following us on Twitter, Facebook and Telegram.

Web Title: Mubashir cp poem immakutty

Next Story
ലൂയിസ് ഗ്ലക്ക്: കവിതയുടെ തീക്ഷ്ണ സൗന്ദര്യംlouise glück, ലൂയിസ് ഗ്ലക്ക്, nobel prize literature,സാഹിത്യത്തിനുള്ള നൊബേൽ സമ്മാനം, louise gluck nobel prize for literature,ലൂയിസ് ഗ്ലക്കിന് സാഹിത്യത്തിനുള്ള നൊബേൽ സമ്മാനം, nobel prize literature 2020, സാഹിത്യത്തിനുള്ള നൊബേൽ സമ്മാനം 2020, american poet louise gluck, അമേരിക്കന്‍ കവയിത്രി ലൂയിസ് ഗ്ലക്ക്, louise glück's books, ലൂയിസ് ഗ്ലക്കിന്റെ കൃതികൾ, louise glück profile, ലൂയിസ് ഗ്ലക്ക് ജീവചരിത്രം, , nobel prize literature 2020 news, സാഹിത്യത്തിനുള്ള നൊബേൽ സമ്മാനം 2020 വാർത്തകൾ, indian express malayalam, ഇന്ത്യൻ എക്‌സ്‌പ്രസ്  മലയാളം, ie malayalam, ഐഇ മലയാളം
The moderation of comments is automated and not cleared manually by malayalam.indianexpress.com