scorecardresearch
Latest News

മൗനം പോലെ ഒരു ഉപമ

നിന്നോടു മിണ്ടാതിരിക്കുമ്പോൾ ഞാനെന്നോടുതന്നെ മിണ്ടുന്നു

മൗനം പോലെ ഒരു ഉപമ

 

നിന്നോടു മിണ്ടാതിരിക്കുമ്പോൾ
മെഴുകുതിരിയിൽ നിന്നെന്ന പോലെ
വാക്കുകൾ
ഉരുകിവീഴാൻ തുടങ്ങും;

വലംവെച്ചു പറക്കുന്ന
മഞ്ഞപ്പൂമ്പാറ്റകളെപ്പോലെ
ഭൂമി മുഴുവൻ
നിശ്ശബ്ദതയായിരിക്കും;jayakrishnan, poem, iemalayalam

നിന്നോടു മിണ്ടാതിരിക്കുമ്പോൾ
ഞാനെന്നോടുതന്നെ മിണ്ടുന്നു:
കണ്ണാടിയിലെ നിഴലിന്റെ
കണ്ണീർ തുടയ്ക്കുന്നതുപോലെ.

നനയാതിരിക്കാൻ
വിരലുകൾ കോർത്ത്
തലമുകളിൽ
മേൽക്കൂര തീർക്കുന്നു;jayakrishnan, poem, iemalayalam

തുള്ളി വിടാതെ
ചോർന്നൊലിച്ചിട്ടും
കാൽച്ചുവട്ടിൽ
മണൽച്ചൂടെന്നറിയുന്നു;

പറയാത്ത വാക്കുകൾ
പൊടിമണ്ണിലെ രൂപങ്ങൾ പോലെ
നിന്റെ കണ്ണുകളിൽ നോക്കി നിൽക്കുന്നു

നിന്നോടു പറയാതിരുന്നതെല്ലാം
ഒരു ഉപമയിലും ഒതുങ്ങാത്തതെന്ന്
തിരിച്ചറിയുന്നതു വരെ….

Stay updated with the latest news headlines and all the latest Literature news download Indian Express Malayalam App.

Web Title: Mounam pole oru upama poem jayakrishnan