Latest News

കടവ് – ജോണി ജെ പ്ലാത്തോട്ടം എഴുതിയ കവിത

തോട് ഒരു കടൽത്തുണ്ടാകുന്നു പരിണാമ യുഗങ്ങൾ പുറകോട്ടു നീന്തുന്നു ജീവൻ സൂക്ഷ്മരൂപം പ്രാപിക്കുന്നു ആദിമ ജലതൃഷ്ണകൾ അവനെ പൊതിയുന്നു

johny j planthottam ,poem, iemalayalam

 

കാൽപാദങ്ങൾ ഉരഞ്ഞു തേഞ്ഞ കല്പടവ്
കുളിയോർമകൾ വളർന്നു തൂർന്ന കടവോരങ്ങൾ
താളിയും സോപ്പും പെണ്മനസും കലർന്ന
പിടിതരാത്ത പരിമളങ്ങൾ

ഒച്ചകൾ അച്ചടിച്ചെടുക്കുന്ന വലിയ കല്ല്
കുളിക്കടമ്പ കടക്കും മുമ്പേ ആണാളുകൾ
പുകവലിച്ചിരിക്കുന്ന പാറപ്പരപ്പ്

അലക്കൊച്ചകൾ പടുത്തുയർത്തിയ പകൽ നേരങ്ങളിൽ
പെണ്ണാളുകൾ തൊടുത്തയക്കുന്ന ശബ്ദസന്ദേശങ്ങൾ
ഒരുവൾ വീട്ടിലേക്കു വിടുന്ന ചിറകടിയൊച്ചകൾ
കുട്ടികളെ കണ്ട് കഞ്ഞിയുടെ തിളയ‌റിഞ്ഞ്
വീട്ടുകാരനെ പാളിനോക്കി തിരികെയെത്തുന്നു
വട്ടമിട്ടു ചൂഴുന്ന ചൂളം വിളികൾക്കു
മറുകുറി നൽകുന്ന മറ്റൊരുവൾ
സ്വന്തം ദുരിതങ്ങൾക്കുമേൽ അടിച്ചടിച്ചുറയുന്നു
ഇനിയൊരു പെണ്ണാൾjohny j planthottam ,poem, iemalayalam

ബീഡിക്കുറ്റിയെറിഞ്ഞു, തോടിൻറെ വിളിക്കു വഴങ്ങി
വസ്ത്രം മാറ്റി നനച്ചിറങ്ങുന്നൊരുവൻ;
ജലത്താൽ മനസാന്തരപ്പെട്ടു
ഓടിത്തിളച്ച മനസിലെ ചൂടാറ്റി
കാഠിന്യങ്ങൾ ഉരിഞ്ഞുകളഞ്ഞു്
ഗർഭപാത്രത്തിലേക്കെന്നപോലെ
ജലഭക്തിയോടെ മുങ്ങിത്താഴുന്നു

തോട് ഒരു കടൽത്തുണ്ടാകുന്നു
പരിണാമ യുഗങ്ങൾ പുറകോട്ടു നീന്തുന്നു
ജീവൻ സൂക്ഷ്മരൂപം പ്രാപിക്കുന്നു
ആദിമ ജലതൃഷ്ണകൾ അവനെ പൊതിയുന്നു

എന്നാൽ
കുളിമറകളിലേക്കു കൂറു മാറിയവർ
മടങ്ങിയെത്താതായി
തലമുറകൾ കുളിച്ചുകയറിയ കടവ്
വഴിപാർത്തു മനം നൊന്ത്
മനോഗതങ്ങൾ ക്ഷയിച്ചു
മറവിയുടെ മൗനത്തിൽ

അക്കരെയിക്കരെ മരങ്ങൾ കൈകോർത്ത്
തോടിനെ കാത്തുവയ്ക്കുന്നു!

Get the latest Malayalam news and Literature news here. You can also read all the Literature news by following us on Twitter, Facebook and Telegram.

Web Title: Johny j plathottam poem kadavu

Next Story
പരകായം-വിനീഷ് കെ എൻ എഴുതിയ കഥvineesh k n , story, iemalayalam
The moderation of comments is automated and not cleared manually by malayalam.indianexpress.com
Best of Express