ലോകത്തിന്റെ അവസാനം കാണാം, പെൻഗ്വിനെ കാണാം: ഉഷുവയ കാഴ്ചകൾ സൂപ്പറാണ്

ലോകത്തിലെ അവസാന നഗരമെന്ന് അറിയപ്പെടുന്ന ഒരു സ്ഥലമുണ്ട്, ഉഷുവയ. എന്തുകൊണ്ടാണ്, ലോകത്തിലെ അവസാന നഗരമെന്ന വിശേഷണം ഉഷുവയ അറിയപ്പെടുന്നത് എന്നറിയാമോ? ലോകത്തിന്റെ ഏറ്റവും തെക്കേ അറ്റത്താണ് ഈ നഗരം സ്ഥിതി ചെയ്യുന്നത്. ഉഷുവയ പിന്നിട്ടാൽ പിന്നെ അന്റാർട്ടിക്ക ആണ്. അതുകൊണ്ടു കൂടിയാണ് ഈ നഗരത്തെ ലോകത്തിലെ അവസാന നഗരം എന്നു വിളിക്കുന്നത്.

അർജന്റീന പ്രവിശ്യയായ ടിയറ ഡെൽ ഫ്യൂഗോയുടെ തലസ്ഥാനമാണ് ഉഷുവയ. സമുദ്ര നിരപ്പിൽ നിന്നും വെറും ആറു മീറ്റർ ഉയരത്തിലാണ് ഈ നഗരം സ്ഥിതിചെയ്യുന്നത്.

അന്താരാഷ്ട്രതലത്തിൽ അംഗീകരിക്കപ്പെട്ട അഞ്ച് അന്റാർട്ടിക്കൻ ഗേറ്റ് വേ നഗരങ്ങളിൽ ഒന്നാണ് ഇവിടം. ഉഷുവയയിൽ നിന്നും തെക്കെ ദിശയിലൂടെ 48 കിലോമീറ്റർ സഞ്ചരിച്ചാൽ അന്റാർട്ടിക്കയിൽ എത്തിച്ചേരുവാൻ സാധിക്കും.

കുത്തനെയുള്ള കുന്നിൻ മുകളിൽ സ്ഥിതി ചെയ്യുന്ന ഈ പട്ടണത്തിൽ നിന്നും പെൻഗ്വിൻ ദ്വീപിലേക്കും അന്റാർട്ടിക്കയിലേയ്ക്കും നേരിട്ടുള്ള പ്രവേശനം സാധ്യമാണ്.

ഉഷുവയയിലെ ജയിൽ കുപ്രസിദ്ധമാണ്. അർജന്റീനയിലെ ഏറ്റവും അപകടകാരികളായ കുറ്റവാളികളെയും രാഷ്ട്രീയ തടവുകാരെയും പാർപ്പിച്ചിരിക്കുന്നത് ഇവിടെയാണ്. അർജന്റീനയിലെ അൽകാട്രാസ് (Alcatraz of Argentina) എന്നും ഈ ജയിൽ അറിയപ്പെടുന്നു.

അർജന്റീനയുടെ പ്രധാന വിനോദ സഞ്ചാര കേന്ദ്രങ്ങളിൽ ഒന്നാണ് ഉഷുവയ ഇന്ന്. മഞ്ഞ് മൂടിയ പർവ്വതങ്ങളാൽ ചുറ്റപ്പെട്ട ഉഷുവയയ്ക്ക് അതിർത്തി തീർക്കുന്നത് പാറ്റഗോണിയൻ മരുഭൂമിയും ബീഗിൾ ചാനലുമാണ്.

നഗരത്തെ പൊതിഞ്ഞ നിൽക്കുന്ന പർവ്വതങ്ങളും, മഞ്ഞ് മൂടിയ താഴ്‌വരെയും പെൻഗ്വിൻ കുട്ടങ്ങളും ഉഷുവയ നഗരത്തിന് മാസ്മരിക സൗന്ദര്യം പകരുന്നു.

ടിയറ ഡെൽ ഫ്യൂഗോ ദേശീയോദ്യാനം, പർവതങ്ങൾ, തടാകങ്ങൾ, നദികൾ, ഹിമാനികൾ എന്നിവയും ഇവിടെ കാണാം.

ഏൻഡ് ഓഫ് ദി വേൾഡ് ട്രെയിന്റെ അവസാന സ്റ്റോപ്പും ഈ കൊച്ചു നഗരത്തിലാണ്.

ധാരാളം ഔട്ട്ഡോർ ആക്റ്റിവിറ്റികളും ഉഷുവയിൽ നടത്താം. അന്റാർട്ടിക്കയിലേക്ക് പോകുന്ന കപ്പലിൽ സവാരി ചെയ്യുകയോ, മാർഷ്യൽ ഗ്ലേസിയർ ഉൾക്കടലിൽ ബോട്ട് സഫാരി നടത്തുകയോ ചെയ്യാം.

ബേർഡ് ഐലൻഡ്, സീ ലയൺ ദ്വീപ്, അർജന്റീനയുടെ തെക്കേ അറ്റമെന്നു സൂചിപ്പിക്കുന്ന ലെസ് എക്ലെയേഴ്സ് ലൈറ്റ്ഹൗസ് എന്നിവ കാണാനായി ഉഷുവയിൽ നിന്നും ബീഗിൾ ചാനലിലേക്ക് യാത്ര നടത്തുകയുമാവാം.

ബ്യൂണസ് അയേഴ്സിൽ നിന്ന് 3,068 കിലോമീറ്റർ അകലെയാണ് ഉഷുവയ സ്ഥിതി ചെയ്യുന്നത്.

പെൻഗ്വിൻ ദ്വീപിലെത്തിയാൽ നിങ്ങൾക്ക് കൂട്ടം കൂട്ടമായി വിഹരിക്കുന്ന പെൻഗ്വിനുകളെയും കാണാം.