വെറുംവയറ്റിൽ വെള്ളം കുടിക്കുന്നത് ശരീരഭാരം കുറയ്ക്കുമോ?

രാവിലെ ഉണർന്ന ഉടനെ വെള്ളം കുടിക്കുന്നത് അത്ര നിസാരകാര്യമല്ല. വെള്ളം കുടിക്കുന്നതുമായി ബന്ധപ്പെട്ട ഒരു തെറാപ്പി തന്നെ ജപ്പാനിൽ നിലനിൽക്കുന്നുണ്ട്. ശരീരത്തിന്റെ മൊത്തത്തിലുള്ള ആരോഗ്യത്തിനായി ജലത്തെ ഗുണകരമായി പ്രയോജനപ്പെടുത്തുന്നതാണ് ഈ ജാപ്പനീസ് വാട്ടർ തെറാപ്പി. രാവിലെ ഉണർന്ന ഉടൻ തന്നെ വെള്ളം കുടിച്ചാലുള്ള ഗുണങ്ങൾ എന്താണ്? ഫോർട്ടിസ് എസ്‌കോർട്ട്‌സ് ഹോസ്പിറ്റലിലെ ചീഫ് ഡയറ്റീഷ്യൻ ഡോ കിരൺ ദലാൽ പറയുന്നതു കേൾക്കാം.

ജാപ്പനീസ് വാട്ടർ തെറാപ്പി എങ്ങനെ പ്രവർത്തിക്കുന്നു?

ഉണർന്ന ഉടനെ, മറ്റേതെങ്കിലും പ്രവർത്തനങ്ങളിൽ ഏർപ്പെടുന്നതിന് മുൻപായി, നാല് മുതൽ ആറ് ഗ്ലാസ് വെള്ളം (ഏകദേശം 160-200 മില്ലി വീതം) കുടിക്കുക. വെള്ളം സാവധാനത്തിൽ കുടിക്കണം, ഇത് ജലം ഫലപ്രദമായി ആഗിരണം ചെയ്യാൻ അനുവദിക്കുന്നു. ഏതെങ്കിലും ഭക്ഷണമോ പാനീയങ്ങളോ കഴിക്കുന്നതിന്, കുറഞ്ഞത് 45 മിനിറ്റെങ്കിലും വേണം വെള്ളം കുടിക്കാൻ. ഇത് ശരീരത്തെ പോഷകങ്ങൾ കൂടുതൽ കാര്യക്ഷമമായി ആഗിരണം ചെയ്യാൻ അനുവദിക്കുമെന്ന് വിശ്വസിക്കപ്പെടുന്നു.

ശ്രദ്ധാപൂർവം ഭക്ഷണം കഴിക്കുന്നത് ശീലമാക്കാൻ നിർദ്ദേശിക്കുന്നു. ഭക്ഷണം നന്നായി ചവച്ചരച്ച് കഴിക്കുക, കൂടാതെ ദഹനത്തെ സഹായിക്കുന്നതിന് ഭക്ഷണ സമയത്ത് ധാരാളം വെള്ളം കുടിക്കുന്നത് ഒഴിവാക്കുക.

ജാപ്പനീസ് വാട്ടർ തെറാപ്പിയുടെ പ്രയോജനങ്ങൾ എന്തൊക്കെയാണ്?

മെച്ചപ്പെട്ട ദഹനം: വെറും വയറ്റിൽ വെള്ളം കുടിക്കുന്നത് ദഹനവ്യവസ്ഥയെ ഉത്തേജിപ്പിക്കാനും സ്ഥിരത പ്രോത്സാഹിപ്പിക്കാനും സഹായിക്കും. കാരണം, ഭക്ഷണം വിഘടിപ്പിക്കാനും ദഹനനാളത്തിലൂടെ കൂടുതൽ കാര്യക്ഷമമായി നീങ്ങാനും വെള്ളം സഹായിക്കുന്നു.

ശരീരഭാരം കുറയ്ക്കുന്നു

ഭക്ഷണത്തിന് മുമ്പ് വെള്ളം കുടിക്കുന്നത് കലോറി ഉപഭോഗം കുറയ്ക്കാൻ സഹായിക്കും. കാരണം, വെള്ളം വയറിൽ ഇടം പിടിക്കുന്നതോടെ കൂടുതൽ നേരം പൂർണ്ണത അനുഭവപ്പെടുന്നു. ഇത് ഭക്ഷണം കുറയ്ക്കുന്നു.

ചർമ്മ ആരോഗ്യം മെച്ചപ്പെടുത്തുന്നു

ധാരാളം വെള്ളം കുടിക്കുന്നത് ചർമ്മത്തിൽ ജലാംശം നിലനിർത്താനും, ചർമ്മത്തെ ആരോഗ്യകരവും തിളക്കമുള്ളതുമാക്കി നിലനിർത്താനും സഹായിക്കുന്നു.

ഊർജ്ജത്തിന്റെ തോത് വർദ്ധിപ്പിക്കുന്നു

നിർജ്ജലീകരണം ക്ഷീണത്തിനും കുറഞ്ഞ ഊർജ്ജ നിലയ്ക്കും ഇടയാക്കും. ധാരാളം വെള്ളം കുടിക്കുന്നത് ഇതിനെ ചെറുക്കാനും നിങ്ങളുടെ മൊത്തത്തിലുള്ള ഊർജ്ജ നില മെച്ചപ്പെടുത്താനും സഹായിക്കും.

വൃക്കയിലെ കല്ലുകൾ ഉണ്ടാകാനുള്ള സാധ്യത കുറയ്ക്കുന്നു

വെള്ളം കുടിക്കുന്നത് വൃക്കകളിൽ നിന്ന് വിഷവസ്തുക്കളെ പുറന്തള്ളാനും വൃക്കയിലെ കല്ലുകൾ ഉണ്ടാകാനുള്ള സാധ്യത കുറയ്ക്കാനും സഹായിക്കുന്നു.

അമിതമാവരുത്

കൂടിയ അളവിൽ വെള്ളം കുടിക്കുന്നതിനെയും ഡോ കിരൺ ദലാൽ എതിർക്കുന്നു. കാരണം ഇത് ഓവർഹൈഡ്രേഷന് ഇടയാക്കും, മാത്രമല്ല തലവേദന, ഓക്കാനം, തലകറക്കം തുടങ്ങിയ ലക്ഷണങ്ങളിലേക്ക് നയിക്കുന്നു.