തിളക്കമുള്ള കരുത്തുറ്റ മുടി വേണോ? ഈ 5 കാര്യങ്ങൾ ശ്രദ്ധിക്കൂ

നമ്മുടെ ശരീരസൗന്ദര്യത്തിൽ ഏറ്റവും പ്രധാനപ്പെട്ട ഒന്നാണ് സമൃദ്ധമായ മുടി. നീളമുള്ളതും ആരോഗ്യവുമുള്ളതുമായ മുടി എന്നത് ഏതൊരാളുടെയും സ്വപ്നമാണ്. എന്നാൽ ഇന്നത്തെ മലിനീകരണവും, തെറ്റായ ഭക്ഷണക്രമവും, മാനസിക സമ്മർദ്ദവും മുടിയുടെ ആരോഗ്യത്തെ പ്രതികൂലമായി ബാധിക്കുന്നുണ്ട്. മുടി പെട്ടെന്ന് വളരാൻ അത്ഭുത മരുന്നുകളോ വിപണിയിൽ ലഭിക്കുന്ന വിലകൂടിയ എണ്ണകളോ മാത്രം മതിയാകില്ല. മറിച്ച്, നാം മുടിയെ എങ്ങനെ പരിഗണിക്കുന്നു എന്നതും നമ്മുടെ ശരീരത്തിന് നൽകുന്ന പോഷണങ്ങളുമാണ് മുടിയുടെ ആരോഗ്യത്തെ നിർണ്ണയിക്കുന്നത്.

ശരിയായ രീതിയിലുള്ള പരിചരണവും നല്ല ശീലങ്ങളും പിന്തുടർന്നാൽ ഏതൊരാൾക്കും മുടിയുടെ കട്ടിയും തിളക്കവും വർദ്ധിപ്പിക്കാൻ സാധിക്കും.

Also Read: കരീന കപൂറിൻ്റെ തിളങ്ങുന്ന കരുത്തുറ്റ തലമുടിക്ക് പിന്നിൽ ഈ ഒരൊറ്റ പൊടിക്കൈ മാത്രം

ഉള്ളിൽ നിന്ന് പോഷണം നൽകാം

മുടി വളർച്ചയുടെ തുടക്കം ശരീരത്തിനുള്ളിൽ നിന്നാണ്. പോഷകങ്ങളുടെ കുറവ് മുടിയുടെ കരുത്ത് കുറയ്ക്കുന്നതിനും കൊഴിച്ചിലിനും കാരണമാകും

• പ്രോട്ടീൻ: മുട്ട, പരിപ്പ് വർഗ്ഗങ്ങൾ, പനീർ, മത്സ്യം എന്നിവ ഭക്ഷണത്തിൽ ഉൾപ്പെടുത്തുക.
  
• ഇരുമ്പ്: ചീര, ഈന്തപ്പഴം എന്നിവ കഴിക്കുന്നത് മുടിക്ക് ഗുണകരമാണ്.
  
• ബയോട്ടിൻ & സിങ്ക്: നട്‌സ്, വിത്തുകൾ എന്നിവ ശീലമാക്കുക.
  
• ഒമേഗ-3: വാൾനട്ട്, ഫ്ളാക്സ് സീഡ്‌സ് എന്നിവ മുടിക്ക് തിളക്കം നൽകും.
  ധാരാളം വെള്ളം കുടിക്കുന്നത് മുടി പൊട്ടിപ്പോകുന്നത് തടയാൻ സഹായിക്കും.

ശിരോചർമ്മം വൃത്തിയായി സൂക്ഷിക്കുക

ആരോഗ്യമുള്ള തലയോട്ടിയിലാണ് മുടി നന്നായി വളരുന്നത്. ആഴ്ചയിൽ ഒന്നോ രണ്ടോ തവണ എണ്ണ ഉപയോഗിച്ച് തല മസാജ് ചെയ്യാം. ഇത് രക്തയോട്ടം വർദ്ധിപ്പിക്കും. താരൻ ഉള്ളവർ അധികമായി എണ്ണ തേക്കുന്നത് ഒഴിവാക്കണം. വീര്യം കുറഞ്ഞ ഷാംപൂ ഉപയോഗിക്കാൻ ശ്രദ്ധിക്കാം.

Also Read: "ഇത് എന്റെ മുടിയുടെ സ്വാഭാവിക നിറമാണ്"; തലമുടിയഴകിനു പിന്നിലെ രഹസ്യം വെളിപ്പെടുത്തി ശ്രുതി ഹാസൻ

ചൂടും സ്റ്റൈലിംഗും കുറയ്ക്കാം

അമിതമായി ഹീറ്റ് സ്റ്റൈലിംഗ് ഉപകരണങ്ങൾ ഉപയോഗിക്കുന്നത് മുടിയുടെ ബലം കുറയ്ക്കും. സ്ട്രെയ്റ്റനർ, ബ്ലോ ഡ്രയർ എന്നിവയുടെ ഉപയോഗം പരിമിതപ്പെടുത്തുക.
മുടി വല്ലാതെ വലിച്ചുമുറുക്കി കെട്ടുന്നത് ഒഴിവാക്കുക.

കൃത്യസമയത്ത് മുടി വെട്ടാം

മുടി വെട്ടുന്നത് കൊണ്ട് മുടി വേഗത്തിൽ വളരില്ല. എന്നാൽ മുടിയുടെ അറ്റം പിളരുന്നത് തടയാൻ ഇത് സഹായിക്കും. അറ്റം പിളരുന്നത് മുടി പൊട്ടിപ്പോകാനും നീളം കുറയാനും കാരണമാകും. നനഞ്ഞ മുടിയെ ശ്രദ്ധയോടെ കൈകാര്യം ചെയ്യുക. മുടി നനഞ്ഞിരിക്കുമ്പോൾ പെട്ടെന്ന് കേടുപാടുകൾ സംഭവിക്കാൻ സാധ്യതയുണ്ട്. നനഞ്ഞിരിക്കുമ്പോൾ മുടി ചീകരുത്. പല്ലകലം കൂടിയ ചീർപ്പ് ഉപയോഗിക്കുക. തൂവാല കൊണ്ട് മുടി അമർത്തി തിരുമ്മാതെ പതുക്കെ ഒപ്പി ഉണക്കുക.

Also Read: നര അകറ്റാം ഒപ്പം മുടികൊഴിച്ചിലും തടയാം, ഇതാ പ്രതിവിധി

മാനസികസമ്മർദ്ദവും ഉറക്കവും

അമിതമായ മാനസികസമ്മർദ്ദവും ഉറക്കമില്ലായ്മയും മുടി കൊഴിച്ചിലിന് പ്രധാന കാരണങ്ങളാണ്. ദിവസവും 7–8 മണിക്കൂർ ഉറങ്ങാൻ ശ്രമിക്കുക. യോഗയോ നടക്കലോ ശീലമാക്കുന്നത് സമ്മർദ്ദം കുറയ്ക്കാൻ സഹായിക്കും.

DISCLAIMER: മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായിപ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക

Read More: മുരിങ്ങയില ഒരു പിടി മതി, മുടി തിളക്കമുള്ളതും കരുത്തുറ്റതുമാകും