ഇല പൊഴിച്ച് ഉടൽ നിറയെ പൂക്കളുമായി തബെബുയ മരങ്ങൾ; മുംബൈ നഗരത്തിൽ ​പിങ്ക് വസന്തം

നഗരത്തിരക്കുകൾക്കിടയിലും പ്രകൃതിയുടെ മാന്ത്രിക സ്പർശം തൊട്ടറിയാൻ കഴിയുന്ന അപൂർവ്വം കാഴ്ചകളിലൊന്നാണ് ബസന്ത് റാണി അല്ലെങ്കിൽ തബെബുയ എന്നറിയപ്പെടുന്ന ട്രംപറ്റ് മരങ്ങളുടെ പൂക്കാലം. മധ്യ അമേരിക്ക സ്വദേശിയായ ഈ മരങ്ങൾ, വസന്തമെത്തുമ്പോൾ നഗരവീഥികളെ മനോഹരമാക്കുന്നു. മുംബൈ നഗരത്തിൻ്റെ അടയാളമായി മാറിയ ഈ മരങ്ങൾ പൂത്തുനിൽക്കുന്നത് കണ്ടാൽ ജപ്പാനിലെ പ്രശസ്തമായ 'ചെറി ബ്ലോസം' കാഴ്ചകളോട് സാമ്യം തോന്നിപ്പോകും.

ബെംഗളൂരുവിലെ റോഡ് സൈഡുകളിലും ഇവ മനോഹരമായ കാഴ്ച ഒരുക്കാറുണ്ട്. ബെംഗളൂർ, മുംബൈ പോലുള്ള ഉദ്യാന നഗരങ്ങളിൽ ഈ മരങ്ങൾക്ക് വലിയ സ്ഥാനമുണ്ട്. കേവലം കാഴ്ചാ ഭംഗിക്ക് അപ്പുറം, നഗരത്തിലെ മലിനീകരണത്തെ പ്രതിരോധിക്കാനും അന്തരീക്ഷത്തിലെ ഓക്സിജന്റെ അളവ് വർദ്ധിപ്പിക്കാനും ഇവ സഹായിക്കുന്നു. നഗരസൗന്ദര്യവൽക്കരണത്തിന്റെ ഭാഗമായി പാതയോരങ്ങളിലും പാർക്കുകളിലും വനംവകുപ്പും ഹോർട്ടികൾച്ചർ വിഭാഗവും ഈ മരങ്ങൾ നട്ടുപിടിപ്പിക്കുന്നു. ഇവ നഗരത്തിലെ ജൈവവൈവിധ്യത്തെ നിലനിർത്തുന്നതിൽ നിർണ്ണായക പങ്കുവഹിക്കുന്നു.

ഡിസംബർ അവസാനത്തോടെ ഇലകൾ പൊഴിച്ചു തുടങ്ങുന്ന ഈ മരങ്ങൾ, ജനുവരി പകുതിയോടെ പൂർണ്ണമായും പൂക്കളാൽ മൂടപ്പെടുന്നു.

ഫെബ്രുവരി, മാർച്ച് മാസങ്ങളിലാണ് ഇവ അതിന്റെ പൂർണ്ണമായ ഭംഗിയിൽ എത്തുന്നത്. പിങ്ക്, മഞ്ഞ, വെള്ള നിറങ്ങളിലാണ് പ്രധാനമായും ഇവ കാണപ്പെടുന്നത്.

കേരളത്തിലാകട്ടെ, തിരുവനന്തപുരത്തിന്റെ ഹൃദയഭാഗത്തുള്ള കനകക്കുന്ന് കൊട്ടാര വളപ്പിലെത്തുന്ന ഏതൊരു സഞ്ചാരിയെയും ആകർഷിക്കുന്ന ഒന്നാണ് അവിടെ പൂത്തുനിൽക്കുന്ന തബെബുയ റോസിയ മരങ്ങൾ. ശ്രീമൂലം തിരുനാൾ രാമവർമ്മയുടെ ഭരണകാലത്താണ് ഈ മരം മധ്യ അമേരിക്കൻ മേഖലയിൽ നിന്നും തിരുവനന്തപുരത്ത് എത്തിച്ചതെന്ന് വിശ്വസിക്കപ്പെടുന്നു. അതുകൊണ്ട് തന്നെ ഇതിന് ഏകദേശം 150 വർഷത്തിലധികം പഴക്കമുണ്ടെന്ന് കരുതപ്പെടുന്നു.

തൃശ്ശൂർ നടത്തറയിൽ ദേശീയപാതയോരത്ത് നിന്നിരുന്ന പതിറ്റാണ്ടുകൾ പഴക്കമുള്ള തബെബുയ മരങ്ങളുടെ മരക്കൊമ്പുകൾ 2023ൽ വെട്ടിനശിപ്പിച്ചത് ഏറെ വിവാദമായിരുന്നു. കേരളത്തിലെ പല ദേശീയപാതകളിലും മീഡിയനുകൾക്ക് ഭംഗി കൂട്ടാൻ ഇന്ന് വ്യാപകമായി ഈ മരങ്ങൾ വെച്ചുപിടിപ്പിക്കാറുണ്ട്.