ഫെയ്സ്മാസ്ക് മുതൽ ടോണർ വരെ; ഇഞ്ചി ഉണ്ടെങ്കിൽ ചർമ്മം തിളങ്ങാൻ മാർഗങ്ങൾ അനവധി

അടുക്കളയിൽ സ്ഥിര ഉപയോഗിത്തിനപ്പുറം ധാരാളം ഔഷധ ഗുണങ്ങളുള്ള ഒരു കിഴങ്ങു വർഗമാണ് ഇഞ്ചി. ഇത് ചർമ്മ സംരക്ഷണത്തിനും ഏറെ ഗുണകരമാണ്. ആൻ്റിഓക്സിഡൻ്റുകൾ, വിറ്റാമിനുകൾ, എന്നിവയുടെ സമ്പന്നമായ ഉറവിടാണ് ഇഞ്ചി. 

ഇഞ്ചിയുടെ ആൻ്റി ഇൻഫ്ലമേറ്ററി, ആൻ്റി മൈക്രോയബിയൽ സവിശേഷതകൾ മുഖക്കുരു, മങ്ങൽ, അകാല വാർധക്യം എന്നിങ്ങനെയുള്ള ചർമ്മ പ്രശ്നങ്ങളെ പ്രതിരോധിക്കാൻ സഹായിക്കും. രക്ത ചംക്രമണം മെച്ചപ്പെടുത്തുകയും അതിലൂടെ ചർമ്മത്തിൻ്റെ തിളക്കം നിലനിർത്താനും കഴിയും. 

ചർമ്മത്തിനുണ്ടാകുന്ന മങ്ങൽ തടഞ്ഞ് പാടുകൾ അകറ്റുന്നതിനും ഇഞ്ചിയിൽ അടങ്ങിയിരിക്കുന്ന സവിശേഷതകൾ സഹായിക്കും. ഫെയ്സ്മാസ്ക്, ഫെയ്സ് സ്ക്രബ്, എണ്ണ എന്നിങ്ങനെ വ്യത്യസ്ത തരത്തിൽ ഇഞ്ചി ചർമ്മ പരിചരണത്തിൽ ഉൾപ്പെടുത്താവുന്നതാണ്. 

ഇഞ്ചി തേൻ ഫെയ്സ് മാസ്ക്

ഒരു ടീസ്പൂൺ ഇഞ്ചി നീരിലേയ്ക്ക് ഒരു ടേബിൾസ്പൂൺ തേൻ ചേർത്തിളക്കി യോജിപ്പിക്കാം. ഈ മിശ്രിതം മുഖത്ത് പുരട്ടി 15 മിനിറ്റ് വിശ്രമിക്കാം. ശേഷം തണുത്ത വെള്ളത്തിൽ കഴുകി കളയാം. 

മഞ്ഞൾ ഇഞ്ചി ഫെയ്സ് പാക്

ഒരു ടീസ്പൂൺ ഇഞ്ചി നീരിലേയ്ക്ക് അര ടീസ്പൂൺ മഞ്ഞൾപ്പൊടി, ഒരു ടേബിൾസ്പൂൺ തൈര് എന്നിവ ചേർത്തിളക്കി യോജിപ്പിക്കാം. ഈ മിശ്രിതം മുഖത്ത് പുരട്ടാം. 15 മിനിറ്റിനു ശേഷം തണുത്ത വെള്ളത്തിൽ കഴുകി കളയാം. ഇഞ്ചിയ്ക്കു പുറമെ മഞ്ഞൾ ചർമ്മത്തിലെ വീക്കം മുഖക്കുരു അതിൻ്റെ പാടുകൾ എന്നിവ അകറ്റാൻ ഗുണകരമായിരിക്കും.

ഇഞ്ചി നാരങ്ങ സ്ക്രബ്

ഒരു ടീസ്പൂൺ ഇഞ്ചി ഉണക്കി പൊടിച്ചതിലേയ്ക്ക് ഒരു ടേബിൾസ്പൂൺ നാരങ്ങാ നീരും, രണ്ട് ടേബിൾസ്പൂൺ പഞ്ചസാരയും ചേർത്തിളക്കി യോജിപ്പിക്കാം. വൃത്തിയായി കഴുകിയ മുഖത്ത് ആ മിശ്രിതം പുരട്ടാം. കുറച്ച് സമയം മൃദുവായി മസാജ് ചെയ്യാം. 15 മിനിറ്റിനു ശേഷം തണുത്ത വെള്ളത്തിൽ കഴുകി കളയാം. പഞ്ചസാര ഒരു മികച്ച എക്സ്ഫോളിയേറ്ററാണ്, നാരങ്ങ പ്രകൃതിദത്തമായ ബ്ലീച്ചായി പ്രവർത്തിക്കുന്നു. 

കറ്റാർവാഴ ഇഞ്ചി ജെൽ

ഒരു ടീസ്പൂൺ ഇഞ്ചി നീരിലേയ്ക്ക് രണ്ട് ടേബിൾസ്പൂൺ കറ്റാർവാഴ ജെൽ ചേർത്തിളക്കി യോജിപ്പിക്കാം. ഇത് മുഖത്ത് പുരട്ടി 15 മുതൽ 20 മിനിറ്റു വരെ വിശ്രമിക്കാം. ശേഷം തണുത്ത വെള്ളത്തിൽ കഴുകി കളയാം. 

ഇഞ്ചി എണ്ണ

വെളിച്ചെണ്ണയിലേയ്ക്ക് ഏതാനും തുള്ളി ഇഞ്ചിയെണ്ണ ചേർത്തിളക്കി യോജിപ്പിക്കാം. ഇത് മുഖത്ത് പുരട്ടി മൃദുവായി മസാജ് ചെയ്യാം. രക്ത ചംക്രമണം വർധിപ്പിക്കാനും വീക്കം കുറയ്ക്കാനും, തിളക്കമുള്ള ചർമ്മം ലഭിക്കുന്നതിനും ഇത് ഗുണകരമാണ്. 

ഇഞ്ചി ഗ്രീൻ ടീ ടോണർ

ഗ്രീൻ ടീ തയ്യാറാക്കി തണുക്കാൻ മാറ്റി വയ്ക്കാം. ഒരു ടീസ്പൂൺ ഇഞ്ചി നീര് അര കപ്പ് ഗ്രീൻ ടീയിലേയ്ക്കു ചേർത്തിളക്കി യോജിപ്പിക്കാം. ഇത് ഒരു പഞ്ഞിയിൽ മുക്കി മുഖത്ത് പുരട്ടാം. ഗ്രീൻ ടീയിൽ ധാരാളം ആൻ്റി ഓക്സിഡൻ്റുകൾ അടങ്ങിയിട്ടുണ്ട്. അത് ചർമ്മത്തിൻ്റെ പ്രകൃതം തന്നെ മെച്ചപ്പെടുത്തും. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• അമിതമായ രോമ വളർച്ച തടയാൻ ഇതാ 5 നുറുങ്ങു വിദ്യകൾ
• വൈകിയിട്ടില്ല, 30കളിലും തുടങ്ങാം ചർമ്മ സംരക്ഷണം
• കരുത്തുറ്റ മുടി മുതൽ പാദങ്ങളിലെ വിണ്ടു കീറൽ വരെ; സൗന്ദര്യ പരിചരണത്തിന് കറ്റാർവാഴ കൊണ്ട് 5 ടിപ്സ്
• ഉലുവയും കടുകും ഉണ്ടോ? താരനകറ്റാം എളുപ്പത്തിൽ