ഗാന്ധിജിയുടെയും ബുദ്ധന്റെയും യേശുവിന്റെയും കൂറ്റൻ പെയിന്റിംഗുകൾ; രാഹുൽ ഈശ്വറിന്റെ ലക്ഷ്വറി വീടിനുള്ളിലെ കാഴ്ചകൾ

ചാനല്‍ ചര്‍ച്ചകളിലൂടെയായി മലയാളികള്‍ക്ക് സുപരിചിതനാണ് രാഹുല്‍ ഈശ്വര്‍. അവതാരകയും നടിയുമായ ദീപ ഈശ്വറാണ് രാഹുലിന്റെ ഭാര്യ. ഇരുവരുടെയും തിരുവനന്തപുരത്തെ പുതിയ വീടിന്റെ കാഴ്ചകളും വിശേഷങ്ങളുമാണ് ഇപ്പോൾ ശ്രദ്ധ നേടുന്നത്. നിരവധി കൗതുകങ്ങളും വ്യത്യസ്തതകളുമുളള ഈ വീടിന് യാഗ് എന്നാണ് പേരിട്ടിരിക്കുന്നത്. രാഹുൽ- ദീപ ദമ്പതികളുടെ മകന്റെ പേരാണിത്.

വീടിനകത്തേക്ക് പ്രവേശിക്കുമ്പോൾ ലിവിംഗ് റൂമിലെ അലങ്കാരങ്ങൾക്കൊപ്പം ശ്രദ്ധ കവരുക ഷെൽഫിൽ അടുക്കി വച്ചിരിക്കുന്ന പുരസ്കാരങ്ങളും മൊമന്റോകളുമാണ്. സ്റ്റെയർ കെയ്സിനു അരികിലായി വലിയൊരു ബുദ്ധരൂപം കാണാം. 24 അടിയോളം പൊക്കത്തിലുള്ള ഈ ബുദ്ധരൂപം ചുമരിൽ പെയിന്റ് ചെയ്തെടുത്തിരിക്കുകയാണ്. മുകൾ നിലയിൽ നിന്നും നോക്കുമ്പോഴാണ് ഈ പെയിന്റിംഗിന്റെ ഭംഗി പൂർണമായി മനസ്സിലാവുക.

വീടിന്റെ എക്സ്റ്റീരിയർ ചുമരുകളിലൊന്നിൽ ഗാന്ധിജിയുടെ കൂറ്റൻ പെയിന്റിംഗും കാണാം. ഈ വശത്തു നിന്നുമാണ് രാഹുലിന്റെ ഓഫീസ് മുറിയിലേക്കുള്ള എൻട്രി. ഹോം തിയേറ്ററിനു അകത്തു തന്നെയാണ് ഓഫീസ് സ്പെയ്സും ക്രമീകരിച്ചിരിക്കുന്നത്.

മുകൾനിലയിൽ യേശുവിന്റെ മനോഹരമായൊരു പെയിന്റിംഗും കാണാം. വളരെ ഡീറ്റെയിൽഡായി വരച്ചിട്ടുള്ള ഈ പെയിന്റിംഗ് ആരുടെയും ശ്രദ്ധ കവരും. പത്തടിയോളം പൊക്കമുണ്ട് ഈ യേശു രൂപത്തിന്. ഇവ കൂടാതെ നിരവധി ചെറു പെയിന്റിംഗുകളും ആന്റിക് രൂപങ്ങളും വിശാലമായൊരു ലൈബ്രറിയും ഇവിടെയുണ്ട്. 10 സെന്റ് പ്ലോട്ടിലുള്ള ഈ വീടിന് 4000 സ്ക്വയർ ഫീറ്റാണ് വിസ്താരം.

വീടിന്റെ കാര്യത്തിൽ മാത്രമല്ല, കാറുകളുടെ നമ്പറുകളുടെ കാര്യത്തിലും രാഹുലിനു ചില നിബന്ധനകളുണ്ട്. എല്ലാ വാഹനങ്ങളുടെയും നമ്പർ 1947 എന്നാണ്. ബൈക്കുകളുടെയും കാറുകളുടെയും നമ്പർ എല്ലാം ഒന്നാണ്.