അമ്മയാകുന്നതിന് മുമ്പ് ഉംറ നിര്‍വഹിക്കാന്‍ മദീനയിലെത്തി സാനിയ മിര്‍സ

തനിക്കും ശുഐബ് മാലിക്കിനും കുഞ്ഞ് ഉണ്ടാകാന്‍ പോകുന്നെന്ന് കഴിഞ്ഞ മാസമാണ് ടെന്നിസ് താരം സാനിയ മിര്‍സ വെളിപ്പെടുത്തിയത്. തന്റെ ട്വിറ്ററിലും ഇന്‍സ്റ്റഗ്രാമിലും വ്യത്യസ്തമായൊരു പോസ്റ്റിലൂടെയാണ് താരം ഗര്‍ഭിണിയാണെന്ന വിവരം വെളിപ്പെടുത്തിയത്. മിര്‍സ, മാലിക് എന്നീ പേരെഴുതിയ വസ്ത്രത്തിന് മധ്യത്തിലായി മിര്‍സ-മാലിക് എന്ന കുഞ്ഞുടുപ്പിന്റെ ചിത്രമുള്ളൊരു പോസ്റ്റായിരുന്നു അത്.

ഇതിന് പിന്നാലെ മദീനയില്‍ മസ്ജിദ് നഖ്‌വി സന്ദര്‍ശിച്ച് ഉംറ നിര്‍വഹിച്ചു. ഇതിന്റെ ചിത്രങ്ങളും താരങ്ങള്‍ പോസ്റ്റ് ചെയ്തിട്ടുണ്ട്. സാനിയയുടെ മാതാപിതാക്കളായ നസീമ, ഇമ്രാന്‍, സഹോദരി അനാം എന്നിവരും കൂടെ ഉണ്ടായിരുന്നു.

തനിക്കും ശുഐബ് മാലിക്കിനും ഉണ്ടാവുന്ന കുഞ്ഞിന്റെ അവസാന നാമം 'മിര്‍സ മാലിക്' എന്നായിരിക്കുമെന്ന് സാനിയ മിര്‍സ നേരത്തേ പറഞ്ഞിരുന്നു. ഒരു പെണ്‍കുട്ടി ഉണ്ടാകണമെന്നാണ് ശുഐബിന് ഇഷ്ടമെന്നും സാനിയ പറഞ്ഞു.

'ഞാന്‍ നിങ്ങളോട് ഒരു രഹസ്യം പറയാം. ഞാനും ശുഐബും സംസാരിച്ച് തീരുമാനിച്ച കാര്യമാണ്. ഞങ്ങള്‍ക്ക് ഒരു കുഞ്ഞ് ഉണ്ടാവുകയാണെങ്കില്‍ കുഞ്ഞിന്റെ സര്‍നെയിം 'മാലിക്' എന്ന് മാത്രമാക്കാതെ 'മിര്‍സ മാലിക്' എന്നായിരിക്കും. അവിടെയാണ് ഞങ്ങള്‍ ഒരു കുടുംബമെന്ന നിലയില്‍ നിലകൊളളുന്നത്. ഭര്‍ത്താവിന് ഒരു പെണ്‍കുട്ടി വേണമെന്നാണ് ആഗ്രഹം', സാനിയ പറഞ്ഞു. 2018 ഗോവ ഫെസ്റ്റില്‍ 'ലിംഗ വിവേചനം' എന്ന വിഷയത്തില്‍ സംവാദത്തിനിടെയായിരുന്നു അന്ന് സാനിയ പ്രതികരിച്ചത്.

തനിക്ക് വ്യക്തിജീവിതത്തില്‍ നേരിടേണ്ടിവന്നിട്ടുള്ള ലിംഗവിവേചനവും സാനിയ പങ്കുവച്ചു. തന്റെ മാതാപിതാക്കളോട് ചില ബന്ധുക്കള്‍ നിങ്ങള്‍ക്ക് ഒരു ആണ്‍കുട്ടിയുണ്ടായിരുന്നെങ്കില്‍ കുടുംബപ്പേര് നിലനിര്‍ത്താന്‍ കഴിയുമായിരുന്നുവെന്ന് പറഞ്ഞിട്ടുണ്ടെന്ന് സാനിയ പറയുന്നു.

”ഞങ്ങള്‍ രണ്ടു സഹോദരിമാരായിരുന്നു, ഒരു സഹോദരന്‍ വേണമെന്ന് ഞങ്ങള്‍ ആഗ്രഹിച്ചിട്ടില്ല. മാതാപിതാക്കളോട് നിങ്ങള്‍ക്ക് മകനുണ്ടായിരുന്നെങ്കില്‍ എന്നു പറയുന്ന അങ്കിള്‍മാരോടും ആന്‍റിമാരോടും ഞങ്ങള്‍ വഴക്കുണ്ടാക്കാറുണ്ടായിരുന്നു. ഞങ്ങള്‍ക്ക് മകള്‍ എന്നാല്‍ മകള്‍ തന്നെയായിരുന്നു, കുടുംബപ്പേര് നിലനിര്‍ത്താന്‍ മകന്‍ വേണമെന്നില്ലായിരുന്നു.” 31 കാരിയായ താരം പറയുന്നു.

വിവാഹത്തിന് ശേഷം ഞാന്‍ എന്റെ സര്‍നെയിം മാറ്റിയില്ല, ഇത് അങ്ങനെ തന്നെ ആയിരിക്കും. കുടുംബപ്പേര് നിലനില്‍ക്കും’ സാനിയ കൂട്ടിച്ചേര്‍ത്തു. കായികരംഗത്ത് പുരുഷ താരങ്ങളും വനിതാ താരങ്ങളും തമ്മില്‍ പ്രതിഫലത്തിന്റെ കാര്യത്തില്‍ വിവേചനമുണ്ടെന്നും വനിത താരങ്ങളോടുള്ള ആളുകളുടെ സമീപനത്തില്‍ മാറ്റം വരണമെന്നും താരം വ്യക്തമാക്കി.

ഏഴ് വര്‍ഷം മുമ്പാണ് സാനിയാ മിര്‍സ പാക്കിസ്ഥാന്‍ ക്രിക്കറ്റ് ടീമിന്റെ മുന്‍ നായകന്‍ ശുഐബ് മാലിക്കിനെ വിവാഹം കഴിച്ചത്. അതിന് ശേഷം ഇരുവരും നേരിടുന്ന പ്രധാനചോദ്യം കുട്ടികളാകുന്നില്ലേ എന്നാണ്. എന്നാല്‍ ഇതിനെല്ലാം സാനിയ മറുപടി പറഞ്ഞു. ഇക്കാര്യത്തില്‍ ഇതുവരെ ചര്‍ച്ച നടത്തിയിട്ടില്ല എന്നതാണ് സത്യം. ശരിക്കും പറഞ്ഞാല്‍ ഇക്കാര്യത്തില്‍ ഉത്തരം പറയാനാകില്ല. കുട്ടികള്‍ ഉണ്ടാകുമെന്നോ അവന്‍ കായികതാരമാകുമെന്നോ ആര്‍ക്ക് പറയാനാകും. എന്നാല്‍ ചിലപ്പോള്‍ അവന്‍ ഒരു നടനോ, അദ്ധ്യാപകനോ ഡോക്ടറോ ആകുമായിരിക്കും.

ഇന്ത്യക്കാരി എന്ന നിലയില്‍ ഏറെ അഭിമാനിക്കുന്നവളാണ് താനെന്നും പാക്കിസ്ഥാന്‍കാരനായതില്‍ അഭിമാനിക്കുന്നയാളാണ് തന്റെ ഭര്‍ത്താവെന്നും ഭാര്യഭര്‍ത്താക്കന്മാരായി ഇരിക്കുന്നതില്‍ അഭിമാനിക്കുന്നവരാണ് തങ്ങള്‍ ഇരുവരുമെന്നായിരുന്നു സാനിയയുടെ പ്രതികരണം. വനിതാ ഡബിള്‍സിലെ ഒന്നാം റാങ്കുകാരിയായ സാനിയ ഹൈദരാബാദില്‍ ജനിച്ചയാളും ഇന്ത്യയെ രാജ്യാന്തര തലത്തില്‍ പ്രതിനിധീകരിക്കുന്നയാളുമാണ്. ഷുഐബ് മാലിക്കാകട്ടെ പാക്കിസ്ഥാനില്‍ ജനിച്ച് അവരുടെ ടീമിനാണ് കളിക്കുന്നത്.