പ്രിയതമനു വേണ്ടി നയൻസ് ഒരുക്കിയ കേക്കിന്റെ പ്രത്യേകതകൾ

തിങ്കളാഴ്ചയായിരുന്നു സംവിധായകനും നിർമാതാവുമായ വിഘ്നേഷ് ശിവന്റെ പിറന്നാൾ. പ്രിയപ്പെട്ടവനായി വലിയൊരു പിറന്നാൾ സർപ്രൈസ് തന്നെ നയൻതാര ഒരുക്കിയിരുന്നു. നയൻതാരയ്ക്കും മക്കളായ ഉലകിനും ഉയിരിനുമൊപ്പമുള്ള വീട്ടിലെ പിറന്നാൾ ആഘോഷ ചിത്രങ്ങൾ വിഘ്നേഷ് സമൂഹമാധ്യമങ്ങളിൽ ഷെയർ ചെയ്തിരുന്നു.

നയൻതാര വിഘ്നേഷിനായി ഒരുക്കിയ പിറന്നാൾ കേക്കാണ് ഇപ്പോൾ ശ്രദ്ധ നേടുന്നത്. സിനിമയെന്ന തീമിലാണ് ഈ കേക്ക് ഒരുക്കിയിരിക്കുന്നത്. വിഘ്നേഷ് സംവിധാനം ചെയ്തതും റൗഡി പിക്ച്ചേഴ്സിന്റെ ബാനറിൽ നയൻതാരയും വിഘ്നേഷും ചേർന്ന് നിർമ്മിച്ചതുമായ സിനിമകളിൽ നിന്നുള്ള രംഗങ്ങൾ കേക്കിൽ പുനരാവിഷ്കരിച്ചിട്ടുണ്ട്.

വിക്കിയുടെ സിനിമാ യാത്രയുടെ ഒരു റീൽ തന്നെയാണ് ഈ കേക്ക്. സിനിമാലോകത്തിന് വിഘ്നേഷ് നൽകിയ ശ്രദ്ധേയ സംഭാവനകൾക്കൊരു ട്രിബ്യൂട്ട് എന്ന രീതിയിലാണ് ഈ കേക്ക് ഒരുക്കിയിരിക്കുന്നത്.

ചെന്നൈ ആസ്ഥാനമായി പ്രവർത്തിക്കുന്ന ദ ഷെഫ് ഹൗസ് ആണ് ഈ കേക്ക് ഒരുക്കിയിരിക്കുന്നത്.

വിക്കി എന്നതിലെ ആദ്യ അക്ഷരമായ W എന്ന ലെറ്ററിന്റെ രൂപത്തിലൊരുക്കിയ ഗോൾഡൻ നിറത്തിലുള്ള ഒരു കേക്കും പിറന്നാൾ ആഘോഷങ്ങളുടെ ശ്രദ്ധ കവർന്നു.

തമിഴകത്തെ പവർ കപ്പിളാണ് നയൻതാരയും വിഘ്നേഷ് ശിവനും. "എന്റെ അനുഗ്രഹമായി മാറിയവന് ജന്മദിനാശംസകൾ. ഈ പ്രത്യേക ദിനത്തിൽ നിങ്ങളെക്കുറിച്ച് ഒരുപാട് എഴുതാൻ ഞാൻ ആഗ്രഹിക്കുന്നു, പക്ഷേ ഞാൻ തുടങ്ങിയാൽ കുറച്ച് കാര്യങ്ങളിൽ മാത്രമായി നിർത്താൻ കഴിയുമെന്ന് ഞാൻ കരുതുന്നില്ല! നിങ്ങൾ എന്നിൽ ചൊരിഞ്ഞ സ്നേഹത്തിന് ഞാൻ വളരെ കടപ്പെട്ടിരിക്കുന്നു. നമ്മുടെ ബന്ധത്തോട് നിങ്ങൾക്കുള്ള ബഹുമാനത്തിന് ഞാൻ വളരെ നന്ദിയുള്ളവളാണ്! നിങ്ങൾക്ക് എന്നോടുള്ള എല്ലാത്തിനും ഞാൻ വളരെ നന്ദിയുള്ളവളാണ്. നിങ്ങളെപ്പോലെ മറ്റാരുമില്ല! എന്റെ ജീവിതത്തിലേക്ക് കടന്നുവന്നതിന് നന്ദി, ജീവിതത്തെ സ്വപ്നതുല്യവും അർത്ഥപൂർണ്ണവും മനോഹരവുമാക്കിയതിന് നന്ദി. നിങ്ങൾ ചെയ്യുന്ന എല്ലാ കാര്യങ്ങളിലും നിങ്ങളാണ് ഏറ്റവും മികച്ചത്! നിങ്ങളുടെ എല്ലാ സ്വപ്നങ്ങളും സഫലമാവട്ടെ. ലോകത്തിലെ എല്ലാ സന്തോഷങ്ങളും നിങ്ങൾക്കായി ആശംസിക്കുന്നു," എന്നായിരുന്നു വിഘ്നേഷിനുള്ള നയൻതാരയുടെ ആശംസ.

ഏഴു വര്‍ഷത്തെ പ്രണയത്തിനു ശേഷം 2022 ജൂണ്‍ 9 നാണ് വിഘ്‌നേഷ് നയന്‍താരയുടെ കഴുത്തില്‍ താലി ചാര്‍ത്തിയത്. അതേ വർഷം ഒക്ടോബറിലാണ് ഇരുവർക്കും ഇരട്ട കുട്ടികൾ ജനിച്ചത്. ഉയിർ- രുദ്രോനീൽ എൻ ശിവൻ, ഉലക് – ദൈവിക് എൻ ശിവൻ എന്നിങ്ങനെയാണ് കുഞ്ഞുങ്ങളുടെ പേരുകൾ . ‘എൻ’ എന്ന അക്ഷരം ലോകത്തെ ഏറ്റവും നല്ല അമ്മയെ സൂചിപ്പിക്കുന്നു എന്നാണ് വിഘ്നേഷ് പറഞ്ഞത്. നയൻതാരയുടെ ആദ്യ അക്ഷരമായ എൻ ആണ് പേരുകൾക്കൊപ്പം ചേർത്തിരിക്കുന്നത്.