നീലവാക പൂത്ത വഴികളിലൂടെ യാത്ര പോവാം; മൂന്നാറിൽ വീണ്ടും ജക്കരന്ത വസന്തം

മൂന്നാറിന്റെ സൗന്ദര്യത്തിന് മാറ്റുകൂട്ടികൊണ്ട് ജക്കരന്ത മരങ്ങൾ പൂത്തുതുടങ്ങി. മൂന്നാറിൽ പൂത്തുലഞ്ഞു വയലറ്റ് വസന്തം തീർക്കുന്ന ജക്കരന്ത മരങ്ങളുടെ ആകാശദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ വൈറലാവുന്നത്.

ഒരു വിദേശവൃക്ഷമാണ് ജക്കരന്ത, മലയാളികൾ സ്നേഹത്തോടെ നീല വാക എന്നു വിളിക്കുന്ന ഈ മരത്തിന്റെ ശാസ്ത്രീയ നാമം ജക്കരന്ത മിമോസിഫോളിയ എന്നാണ്. തെക്കേ അമേരിക്കൻ സ്വദേശിയാണ് കക്ഷി. 50 അടിയിലേറെ ഉയരത്തിൽ വളരുന്ന ജക്കരന്ത മരങ്ങളിൽ പൂക്കൾ നിറയുന്നത് മാർച്ച്, ഏപ്രിൽ മാസങ്ങളിലാണ്.

നൂറ്റാണ്ടുകൾക്കു മുൻപ്, കണ്ണന്‍ദേവന്‍ മലനിരകളില്‍ തേയില ചെടികൾ നട്ട ഇംഗ്ലീഷ് ഈസ്റ്റ് ഇന്ത്യ കമ്പനി പ്ലാന്റര്‍മാര്‍ യൂറോപ്പില്‍ നിന്ന് കൊണ്ടുവന്ന് നട്ടതാണ് ജക്കരന്ത മരങ്ങള്‍. തോട്ടങ്ങളുടെയും ബംഗ്ലാവുകളുടെയും സൗന്ദര്യവൽക്കരണത്തിനു വേണ്ടി പാതയോരങ്ങളിലും ബംഗ്ലാവുകളുടെ മുറ്റത്തുമെല്ലാം യൂറോപ്യർ ജക്കരന്ത മരങ്ങൾ വച്ചുപിടിപ്പിച്ചു.

എല്ലാ വര്‍ഷവും ജക്കരന്ത മരങ്ങൾ പൂത്തുലയും. ഏതാനും വർഷങ്ങളായി ജക്കരന്ത വസന്തം കാണാൻ മാത്രമായി മൂന്നാറിലേക്ക് എത്തുന്ന സഞ്ചാരികളുടെ എണ്ണത്തിലും വർധനവ് ഉണ്ടായിട്ടുണ്ട്.

മൂന്നാറിൽ നിന്ന് ഉടുമല്‍പേട്ട വരെയുള്ള 85 കിമീ പാതയോരത്തെ പ്രധാന ആകർഷണമാണ് തേയില തോട്ടങ്ങളില്‍ പൂത്തുലഞ്ഞു നിൽക്കുന്ന  ജക്കരന്ത മരങ്ങൾ. മൂന്നാറിൽ മാത്രമല്ല, മറയൂരിലും ജക്കരന്ത മരങ്ങൾ വ്യാപകമായി കാണാൻ സാധിക്കും.

എക്സാം ട്രീ എന്നും ഇവയ്ക്ക് പേരുണ്ട്.  സൗത്ത് ആഫ്രിക്കയിലെ പ്രിട്ടോറിയ സര്‍വകലാശാലയിലെ വിദ്യാര്‍ത്ഥികള്‍ ഇതിനെ പരീക്ഷാപൂക്കള്‍ എന്നാണ് വിളിക്കുന്നത്. അതിനു പിന്നിൽ രസകരമായൊരു വിശ്വാസം തന്നെയുണ്ട്. ആകാശനീലിമയുള്ള ഈ പൂക്കള്‍ ശിരസിലോ ശരീരത്തിലോ പതിച്ചാല്‍ പരീക്ഷ ജയിക്കുമെന്നാണ് വിശ്വാസം. പൂക്കൾ വിരിയുന്നത് പരീക്ഷാചൂട് കത്തിനിൽക്കുന്ന മാർച്ച് മാസത്തിൽ ആയതിനാൽ ഇവയെ എക്സാം ട്രീ എന്നും വിളിക്കുന്നു.