മഞ്ഞിൽ പുതച്ച് തണുത്തുറഞ്ഞ കുന്നുകളും തേയിലത്തോട്ടങ്ങളും, 'ചിൽ മൂഡി'ൽ മൂന്നാർ

കേരളത്തിന്റെ കാശ്മീർ എന്നറിയപ്പെടുന്ന മൂന്നാർ മഞ്ഞിൽ പുതഞ്ഞു നിൽക്കുന്ന മനോഹരമായ കാഴ്ചകളാണ് സോഷ്യൽ മീഡിയയിലാകെ.

സമീപവർഷങ്ങളിലെ ഏറ്റവും കുറഞ്ഞ താപനിലയാണ് കഴിഞ്ഞ ദിവസങ്ങളിൽ മൂന്നാറിൽ രേഖപ്പെടുത്തിയത്. ഇതോടെയാണ് മൂന്നാറിന്റെ ഭംഗി ആസ്വദിക്കുവാൻ സഞ്ചാരികളുടെ ഒഴുക്ക് വർധിച്ചത്.

മൂന്നാറിലെ സെവൻമലയിൽ ഈ സീസണിലെ ഏറ്റവും കുറഞ്ഞ താപനിലയായ -1 ഡിഗ്രി സെൽഷ്യസ് കഴിഞ്ഞ ശനിയാഴ്ച രേഖപ്പെടുത്തി. താപനില പൂജ്യം ഡിഗ്രിക്ക് താഴെയെത്തിയതോടെ പുൽമേടുകളും താഴ്‌വാരങ്ങളും മഞ്ഞ് പുതച്ച നിലയിലാണ്.

യുണൈറ്റഡ് പ്ലാന്റേഴ്‌സ് അസോസിയേഷൻ ഓഫ് സൗത്ത് ഇന്ത്യ ടീ റിസർച്ച് ഫൗണ്ടേഷന്റെ കണക്കുകൾ പ്രകാരം ചെണ്ടുവരൈ, സൈലന്റ് വാലി, ലക്ഷ്മി, ദേവികുളം, നല്ലതണ്ണി എന്നിവിടങ്ങളിൽ താപനില പൂജ്യം ഡിഗ്രി സെൽഷ്യസിലെത്തി.ദേവികുളത്ത് ഒരു ഡിഗ്രിയും മാട്ടുപ്പെട്ടിയിലെ ആർ ആൻഡ് ഡി സെന്ററിൽ രണ്ട് ഡിഗ്രി സെൽഷ്യസുമാണ് രേഖപ്പെടുത്തിയത്.

പുലർച്ചെ സമയങ്ങളിൽ കനത്ത കോടമഞ്ഞുള്ളതിനാൽ കാഴ്ച പരിധി വളരെ കുറവായിരിക്കും. അതിനാൽ മൂന്നാർ യാത്രയിൽ വാഹനങ്ങളുടെ ഫോഗ് ലാമ്പുകൾ പ്രവർത്തിക്കുന്നുണ്ടെന്ന് ഉറപ്പുവരുത്തുക.