ലാവൻഡർ തോട്ടത്തിൽ ചാക്കോച്ചൻ ധരിച്ച ക്യൂട്ട് ടീഷർട്ട്; വിലയറിയാമോ?

മലയാള സിനിമയിലെ ചോക്ലേറ്റ് ഹീറോയെന്നാണ് കുഞ്ചാക്കോ ബോബനെ വിശേഷിപ്പിക്കുന്നത്. 'അനിയത്തിപ്രാവി'ലൂടെ മലയാള സിനിമയിലേക്ക് എത്തിയ ചാക്കോച്ചന് പയ്യൻ ഇമേജ് നിലനിർത്താൻ ഇപ്പോഴും കഴിയുന്നുണ്ട്. താരത്തിന്റെ ഡ്രെസ്സിങ്ങ് സെൻസാണ് അതിനുള്ള പ്രധാന പങ്ക് വഹിക്കുന്നത്. ട്രെൻഡിന് അനുസരിച്ച് വസ്ത്രങ്ങൾ തിരഞ്ഞെടുക്കാൻ ചാക്കോച്ചൻ ശ്രദ്ധിക്കാറുണ്ട്. ഓരേ തരത്തിലുള്ള സ്റ്റൈലിങ്ങിൽ ഒതുങ്ങി നിൽക്കാതെ വ്യത്യസ്തമാർന്ന രീതികളാണ് ചാക്കോച്ചൻ എപ്പോഴും തിരഞ്ഞെടുക്കുന്നത്.

കുറച്ച് ദിവസങ്ങളായി യുറോപ്പ് യാത്രയിലാണ് ചാക്കോച്ചൻ. മഞ്ജു വാര്യരും പിഷാരടിയും താരത്തിനൊപ്പമുണ്ടായിരുന്നു. സുഹൃത്തുകൾക്കൊപ്പം ലണ്ടനിലെ ലാവൻഡർ തോട്ടത്തിലെത്തിയ ചാക്കോച്ചന്റെ ചിത്രങ്ങൾ സോഷ്യൽ മീഡിയയിൽ വൈറലായിരുന്നു. എന്നാൽ പൂവുകളിലേക്കല്ല മറിച്ച് ചാക്കോച്ചൻ ധരിച്ച ടീഷർട്ടിലേക്കാണ് ഒരു വിഭാഗം ആരാധകരുടെ കണ്ണുടക്കിയത്.

വളരെ ക്യൂട്ടായ ഒരു ഷോർട്ട് സ്ലീവ് ടീ ഷർട്ടാണ് ചാക്കോച്ചൻ അണിഞ്ഞത്. പ്രമുഖ ബ്രാൻഡായ സാറയുടെ നിറ്റ് ടീഷർട്ട് ശേഖരത്തിൽ വരുന്നതാണിത്. സ്പൺ കോട്ടണിൽ നിർമിച്ച ടീഷർട്ട് റൗണ്ട് നെക്ക് പാറ്റേണിലുള്ളതാണ്. വെള്ള നിറത്തിലുള്ള പാന്റ്സിനൊപ്പമാണ് ടീഷർട്ട് സ്റ്റൈൽ ചെയ്തിരിക്കുന്നത്. 1800 രൂപയാണ് ടീഷർട്ടിന്റെ വില.

സെന്ന ഹെഗ്ഡെയുടെ സംവിധാനത്തിൽ ഒരുങ്ങിയ 'പദ്മിനി'യാണ് ചാക്കോച്ചന്റെ റിലീസിനെത്തിയ പുതിയ ചിത്രം. അപർണ ബാലമുരളി, വിൻസി, മഡോണ എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. പദ്മിനിയുടെ നിർമാതാക്കളിൽ ഓരാളായ സുവിൻ കെ വർക്കി കുറച്ച് ദിവസങ്ങൾക്കു മുൻപ് ചാക്കോച്ചനെതിരെ ആരോപണങ്ങൾ ഉയർത്തിയിരുന്നു. താരം ഇതുവരെ ആരോപണങ്ങളോട് പ്രതികരിച്ചിട്ടില്ല.