തെരുവുകളിൽ പൂത്തിറങ്ങിയ പ്രണയം; സോഷ്യൽ മീഡിയയിൽ തരംഗമായി കൊച്ചിയിലെ പിങ്ക് ട്രംപറ്റ് പൂക്കാലം

അറബിക്കടലിന്റെ റാണിയായ കൊച്ചിക്ക് എന്നും സഞ്ചാരികളെ ആകർഷിക്കുന്ന നൂറു കണക്കിന് കാഴ്ചകളുണ്ട്. എന്നാൽ കഴിഞ്ഞ ഏതാനും വർഷങ്ങളായി ജനുവരി, ഫെബ്രുവരി മാസങ്ങളിൽ കൊച്ചി നഗരം മറ്റൊരു അത്യപൂർവ്വ സൗന്ദര്യത്തിലേക്ക് വഴിമാറുന്നു. നഗരത്തിലെ തിരക്കേറിയ റോഡുകൾക്കും കരിങ്കൽ പാകിയ നടപ്പാതകൾക്കും മുകളിൽ പിങ്ക് നിറത്തിലുള്ള പൂക്കൾ ഒരു വലിയ പരവതാനി പോലെ വിരിഞ്ഞുനിൽക്കുന്ന കാഴ്ച ആരുടെയും മനം കുളിർപ്പിക്കുന്നതാണ്. 

ജപ്പാനിലെ 'ചെറി ബ്ലോസം' വസന്തത്തെ ഓർമ്മിപ്പിക്കുന്ന ഈ പ്രതിഭാസം കൊച്ചിയുടെ നഗരക്കാഴ്ചകളെ അന്താരാഷ്ട്ര നിലവാരത്തിലേക്ക് ഉയർത്തുന്നു. പനമ്പിള്ളി നഗറിലെയും, കണ്ടെയ്നർ റോഡിൻ്റെയും അരികുകളിൽ ഈ പൂക്കൾ വിരിഞ്ഞു നിൽക്കുമ്പോൾ, അവ കാണാനും ചിത്രങ്ങൾ പകർത്താനുമായി ദൂരദേശങ്ങളിൽ നിന്ന് പോലും ആളുകൾ ഒഴുകിയെത്തുന്നു. 

Also Read: കാശ്മീർ വരെ പോകേണ്ട, ടുലിപ് പൂക്കൾ ഇനി ഇവിടെ കാണാം

തബെബുയ റോസിയ (Tabebuia rosea) എന്ന മരങ്ങളിലാണിവ. ഇവ യഥാർത്ഥത്തിൽ ഇന്ത്യയിലെ സസ്യങ്ങളല്ല. മധ്യ-തെക്കേ അമേരിക്കൻ രാജ്യങ്ങളായ മെക്സിക്കോ, വെനിസ്വേല, ഇക്വഡോർ എന്നിവിടങ്ങളാണ് ഈ മരങ്ങളുടെ ജന്മദേശം.

പൂക്കളുടെ നിറം കാരണം ഈ മരം 'പിങ്ക് ട്രംപറ്റ് ട്രീ' (Pink Trumpet Tree) അല്ലെങ്കിൽ 'പർപ്പിൾ ട്രംപറ്റ് ട്രീ' (Purple Trumpet Tree) എന്ന് അറിയപ്പെടുന്നു. ഇംഗ്ലീഷിൽ ഇതിനെ ഐപെ (Ipe), തഹീബോ (Taheebo), പർപ്പിൾ തബൊബിയ (Purple Tabebuia) എന്നും വിളിക്കുന്നു. പോർച്ചുഗീസ് ഭാഷയിൽ 'വില്ല് മരം' എന്നർത്ഥം വരുന്ന 'പൗ ഡി ആർകോ' (Pau d’arco) എന്നും ഇത് അറിയപ്പെടുന്നു.

കാണാൻ അതീവ സുന്ദരമായ ഈ മരം ഏകദേശം 30 മീറ്റർ ഉയരം വരെ വളരും. വേനൽക്കാലത്ത് ഇലകൾ പൂർണ്ണമായും പൊഴിക്കുന്ന സ്വഭാവമാണ് ഇതിനുള്ളത്. വിരലുകൾ പോലെ വിടർന്നു നിൽക്കുന്ന പച്ച ഇലകളാണ് മറ്റൊരു പ്രത്യേകത.

വസന്തകാലത്താണ് ഈ മരത്തിൽ മനോഹരമായ പർപ്പിൾ അല്ലെങ്കിൽ പിങ്ക് നിറത്തിലുള്ള പൂക്കൾ വിരിയുന്നത്. പൂക്കൾക്ക് ഒരു ട്രംപറ്റിൻ്റെ (Trumpet) ആകൃതിയാണുള്ളത്. 

ഉഷ്ണമേഖലാ കാലാവസ്ഥയിൽ നന്നായി വളരുന്ന ഈ മരങ്ങൾ കേരളത്തിലെ കാലാവസ്ഥയുമായി വേഗത്തിൽ പൊരുത്തപ്പെട്ടു. മരത്തിലെ ഇലകൾ പൂർണ്ണമായും കൊഴിഞ്ഞുപോയ ശേഷം ശാഖകൾ നിറയെ പൂക്കൾ വിരിയുന്നതാണ് ഇതിന്റെ ഏറ്റവും വലിയ പ്രത്യേകത.

Also Read: കുറഞ്ഞ ചിലവിൽ കായലോരത്ത് വീക്കെൻഡ് ആസ്വദിക്കാം, എഴുപുന്നയിലേയ്ക്ക് പോന്നോളൂ

സിമന്റ് കെട്ടിടങ്ങൾക്കും തിരക്കേറിയ വാഹനങ്ങൾക്കും ഇടയിൽ പ്രകൃതി ഒരുക്കുന്ന ഈ പിങ്ക് വിസ്മയം നഗരജീവിതത്തിലെ പിരിമുറുക്കങ്ങൾക്കിടയിൽ ഒരു തണലായും ആശ്വാസമായും മാറുന്നു. വെയിലുദിച്ചു നിൽക്കുന്ന പകലുകളിൽ ഇളം കാറ്റിൽ അടർന്നു വീഴുന്ന ഈ പൂക്കൾ കൊച്ചിക്ക് നൽകുന്ന മനോഹാരിത ചെറുതല്ല. വെറും മരങ്ങൾ എന്നതിലുപരി, കൊച്ചിയുടെ അടയാളമായി ഈ പിങ്ക് പൂക്കൾ മാറിക്കഴിഞ്ഞു. 

സാധാരണയായി ജനുവരി പകുതിയോടെ പൂവിട്ടു തുടങ്ങുന്ന ഈ മരങ്ങൾ ഫെബ്രുവരി മാസത്തിൽ അതിന്റെ പൂർണ്ണ സൗന്ദര്യത്തിലെത്തുന്നു. മാർച്ച് മാസത്തോടെ പൂക്കൾ കൊഴിഞ്ഞു തീരും. വെറുമൊരു അലങ്കാര സസ്യം എന്നതിലുപരി, നഗരത്തിലെ മലിനീകരണം കുറയ്ക്കാനും അന്തരീക്ഷ താപനില ക്രമീകരിക്കാനും തബെബുയ മരങ്ങൾ സഹായിക്കുന്നു. കടുത്ത വേനലിലും നഗരത്തിന് തണൽ നൽകാൻ ഇവയ്ക്ക് കഴിയും.

Also Read: തേക്കടിയേക്കാൾ സുന്ദരം; ഇടുക്കിയിലെ ഈ ഹിഡൻ സ്പോട്ടുകൾ ആരേയും അമ്പരപ്പിക്കും

കൊച്ചിയിലെ എളംകുളം, പനമ്പിള്ളി നഗർ, കണ്ടെയ്നർ റോഡ്, സീപോർട്ട്-എയർപോർട്ട് റോഡ് എന്നിവിടങ്ങളിൽ ഈ മരങ്ങൾ നട്ടുപിടിപ്പിച്ചത് നഗരസൗന്ദര്യവൽക്കരണത്തിന്റെ ഭാഗമായാണ്. ഇത് ഇന്ന് കേരളത്തിലെ പ്രധാനപ്പെട്ട ഒരു ഫോട്ടോ സ്പോട്ടായി മാറിയിട്ടുണ്ട്.

ബെംഗളൂരുവിലെ റോഡ് സൈഡുകളിലും ഇവ മനോഹരമായ കാഴ്ച ഒരുക്കാറുണ്ട്. ബെംഗളൂർ, മുംബൈ പോലുള്ള ഉദ്യാന നഗരങ്ങളിൽ ഈ മരങ്ങൾക്ക് വലിയ സ്ഥാനമുണ്ട്. ഒരു അലങ്കാര ചെടി എന്നതിലുപരി ഇതൊരു അധിനിവേശ സസ്യം കൂടിയാണിത്. ഭാവിയിൽ ഇവ മറ്റ് ചെടികൾക്ക് ഭീഷണിയായി മാറിയേക്കാം എന്ന ആശങ്കയുമുണ്ട്. 

Read More: ഇല പൊഴിച്ച് ഉടൽ നിറയെ പൂക്കളുമായി തബെബുയ മരങ്ങൾ; മുംബൈ നഗരത്തിൽ ​പിങ്ക് വസന്തം