തല നന്നായി കഴുകിയാലും, പലർക്കും തലയോട്ടിയിൽ ചൊറിച്ചിൽ അനുഭവപ്പെടാറുണ്ട്. വേനൽക്കാലത്ത് ഇത് വഷളാകുന്നു.നിരുപദ്രവകരമാണെന്ന് തോന്നുമെങ്കിലും ഇവ അവഗണിക്കരുതെന്നാണ് വിദഗ്ധരുടെ മുന്നറിയിപ്പ്. കേശസംരക്ഷണ ദിനചര്യ പുനഃപരിശോധിക്കുന്നതിനൊപ്പം ഇത് ആരോഗ്യ വിദഗ്ധരെ കാണിക്കാനും അവർ നിർദേശിക്കുന്നു. ഇടയ്ക്കിടെയുള്ള ചൊറിച്ചിൽ, പ്രത്യേകിച്ച് വേനൽക്കാലത്തുള്ള ഇത്തരം പ്രശ്നങ്ങൾ തലയോട്ടിയിലെ ഫോളികുലൈറ്റിസിന്റെ ലക്ഷണമാകാം. ഇത് മുടിയ്ക്ക് ചുറ്റും ചെറിയ ചുവന്ന മുഴകളോ പഴുപ്പ് നിറഞ്ഞ കുരുകൾക്കോ കാരണമാകുന്നു.
കാരണങ്ങളും ലക്ഷണങ്ങളും
“ചൂടുള്ളതും വിയർക്കുന്നതുമായ അവസ്ഥകൾ, പോണിടെയിൽ, ബ്രെയ്‌ഡുകൾ, ഇറുകിയ തൊപ്പികളുടെയും ഹെൽമെറ്റുകളുടെയും ഉപയോഗം, ഇടയ്ക്കിടെയുള്ള ഓയിൽ മസാജ്, ഷേവിംഗ് പ്രാക്ടീസ്, എണ്ണകളുടെ ഉപയോഗം, കോമഡോജെനിക് ഹെയർ സ്പ്രേകൾ, എന്നിവയെല്ലാം ഫോളിക്കിളുകളുടെ ബാക്ടീരിയ അല്ലെങ്കിൽ ഫംഗസ് അണുബാധയായ ഫോളികുലിറ്റിസിന് കാരണമാകുന്നു, ”അപ്പോളോ ആശുപത്രിയിലെ സീനിയർ കൺസൾട്ടന്റ് ഡെർമറ്റോളജിസ്റ്റ് ഡോ. ഡി എം മഹാജൻ പറഞ്ഞു.
തലയിലെ ഇത്തരം കുരുക്കൾ മുഖത്തെ കുരുവിന് സമാനമാണ്. തലയോട്ടിയിലെ ഫോളികുലൈറ്റിസ് വിവിധ അണുബാധകൾ കാരണം രോമകൂപങ്ങൾക്ക് ചുറ്റുമുള്ള വീക്കത്തെ സൂചിപ്പിക്കുന്നു.
ഏത് പ്രായത്തിലുള്ളവർക്കും തലയോട്ടിയിലെ ഫോളികുലൈറ്റിസ് ഉണ്ടാകാമെന്ന് ഡാഡു മെഡിക്കൽ സെന്റർ സ്ഥാപകയും ചെയർമാനും ഡെർമറ്റോളജിസ്റ്റും ഡോ. നിവേദിത ദാദു പറഞ്ഞു. “സീസണിലെ വ്യതിയാനം അല്ലെങ്കിൽ അധിക എണ്ണ സ്രവണം കാരണം ഫോളിക്കിളുകളിൽ അടങ്ങിയിരിക്കുന്ന യീസ്റ്റ് പുറത്തെത്തുമ്പോൾ, ബാക്ടീരിയൽ ഫോളികുലൈറ്റിസ് പോലുള്ള മറ്റ് ചില തരത്തിലുള്ള തലയോട്ടിയിലെ ഫോളികുലൈറ്റിസ് പൊട്ടുന്നു. വേനൽക്കാലത്ത്, വിയർപ്പും എണ്ണയും അടിഞ്ഞുകൂടുന്നത് അവസ്ഥയിൽ ഇത് കൂടുതൽ വഷളാക്കും, ”ഡോ. നിവേദിത പറഞ്ഞു.
“ഇത് സെബോറെഹിക് ഡെർമറ്റൈറ്റിസ് (തലയോട്ടിയിൽ വെളുത്ത ഫ്ലയ്ക്ക് അവശേഷിക്കുന്ന മലസീസിയ എന്ന ഒരു തരം യീസ്റ്റിന്റെ അമിതവളർച്ച) എന്നിവയുമായി ബന്ധപ്പെട്ടിരിക്കുന്നു. സാധാരണയായി 18 മുതൽ 50 വയസ്സ് വരെ പ്രായമുള്ളവരിൽ പുരുഷന്മാരിലും സ്ത്രീകളിലും കാണപ്പെടുന്നു,” നാനാവതി ഹോസ്പിറ്റലിലെ ഡെർമറ്റോളജിസ്റ്റും ട്രൈക്കോളജിസ്റ്റുമായ ഡോ.വന്ദന പറഞ്ഞു.
മിക്കപ്പോഴും, കാർബോഹൈഡ്രേറ്റുകളും മധുരമുള്ള ഭക്ഷണങ്ങളും അടങ്ങിയ അനാരോഗ്യകരമായ ഭക്ഷണക്രമം തലയോട്ടിയിലെ ഫോളികുലൈറ്റിസ് സാധ്യത വർദ്ധിപ്പിക്കും, ഡോക്ടർ വന്ദന കൂട്ടിച്ചേർത്തു. ഉയർന്ന പഞ്ചസാരയും കാർബോഹൈഡ്രേറ്റും അടങ്ങിയ ഭക്ഷണക്രമം നിങ്ങളുടെ രക്തത്തിലെ പഞ്ചസാരയുടെ അളവിൽ ഏറ്റക്കുറച്ചിലുണ്ടാക്കും. ഇത് നിങ്ങളുടെ ചർമ്മത്തിലെ ഹോർമോണുകളെ കൂടുതൽ എണ്ണ ഉത്പാദിപ്പിക്കാൻ പ്രേരിപ്പിക്കുകയും അത് ഫോളികുലൈറ്റിസിന് കാരണമാകുകയും ചെയ്യുന്നു, ഫിസിക്കോ ഡയറ്റ് ക്ലിനിക്കിന്റെ സ്ഥാപക ഡയറ്റീഷ്യൻ വിധി ചൗള പറഞ്ഞു.
“കൂടാതെ, സമ്മർദ്ദവും ഹോർമോൺ അസന്തുലിതാവസ്ഥയും ഈ അവസ്ഥയ്ക്ക് കാരണമാകും. ധാരാളം വിയർക്കുകയും പിന്നീട് മുടി കഴുകാതിരിക്കുകയും ചെയ്യുന്നവരിലും ഇത് കാണപ്പെടുന്നു. ഇവ കൂടാതെ, എണ്ണ, ജെൽ അല്ലെങ്കിൽ ഹെയർ സ്പ്രേകൾ പോലുള്ള ഉൽപ്പന്നങ്ങൾ തലയോട്ടിയിൽ പുരട്ടുന്നത് സുഷിരങ്ങൾ (എണ്ണ ഗ്രന്ഥികൾ) അടയുകയും തലയോട്ടിയിലെ ഫോളികുലിറ്റിസിന് കാരണമാവുകയും ചെയ്യും. ബാക്ടീരിയ, ഫംഗസ് എന്നിവയുടെ വളർച്ചയെ പ്രോത്സാഹിപ്പിക്കുന്ന എണ്ണ ഉൽപ്പാദിപ്പിക്കുന്ന സെബാസിയസ് ഗ്രന്ഥികളുടെ പ്രവർത്തനത്തെയും ഇവ ഉത്തേജിപ്പിക്കുന്നു, ”ഡോ വന്ദന വിവരിച്ചു.
രോഗനിർണയവും ചികിത്സയും
എത്രയും പെട്ടെന്ന് നിങ്ങളുടെ ഡെർമറ്റോളജിസ്റ്റുമായി ബന്ധപ്പെടുക. ‘ഡെർമറ്റോസ്‌കോപ്പ്’ എന്ന ഇമേജിംഗ് ഉപകരണം ഉപയോഗിച്ച് നിങ്ങളുടെ തലയോട്ടിയിലെ പ്രശ്നം പരിശോധിക്കാൻ കഴിയും, ഡോക്ടർ വന്ദന പറയുന്നു.
ചികിത്സാ ഓപ്ഷനുകളിൽ സാലിസിലിക് ആസിഡ്, കെറ്റോകോണസോൾ അല്ലെങ്കിൽ ടീ ട്രീ ഓയിൽ എന്നിവ അടങ്ങിയ ഔഷധ ഷാംപൂകൾ ഉൾപ്പെടുന്നതായി ഡോ. നിവേദിത പറയുന്നു. “പ്രശ്നം ഗുരുതരമായ കേസുകളിൽ, ഡെർമറ്റോളജിസ്റ്റുകൾ ആൻറിബയോട്ടിക്കുകൾ നിർദ്ദേശിച്ചേക്കാം. കൂടാതെ, ഇറുകിയ ഹെയർസ്റ്റൈലുകൾ ഒഴിവാക്കുക, തലയോട്ടി വൃത്തിയായി സൂക്ഷിക്കുക, സമ്മർദ്ദം കുറയ്ക്കുക എന്നിവയിലൂടെ ഈ അവസ്ഥയെ തടയാനും നിയന്ത്രിക്കാനും കഴിയും, ”ഡോ നിവേദിത ഇന്ത്യൻ എക്സ്പ്രസ് ഡോട്ട് കോമിനോട് പറഞ്ഞു.
പ്രതിരോധം
“അഴുക്കും പൊടിയും നിറഞ്ഞ തലയോട്ടിയിൽ ഏതെങ്കിലും ഉൽപ്പന്നമോ എണ്ണയോ ഉപയോഗിച്ച് മസാജ് ചെയ്യരുത്. കൃത്യമായ ഇടവേളകളിൽ മുടി കഴുകി എപ്പോഴും വൃത്തിയായി സൂക്ഷിക്കുക. എല്ലായ്പ്പോഴും നിങ്ങളുടെ തലയോട്ടിക്ക് അനുയോജ്യമായ ഷാംപൂ ഉപയോഗിക്കുക. മുടിക്ക് ഏതെങ്കിലും തരത്തിലുള്ള കേടുപാടുകൾ ഉണ്ടാകാതിരിക്കാൻ ഡോക്ടർ ശുപാർശ ചെയ്യുന്ന ഷാംപൂ ഉപയോഗിക്കുക. മുടി കഴുകാൻ ചൂടുവെള്ളം ഉപയോഗിക്കരുത്, ”ഡോ നിവേദിത പറഞ്ഞു.
കൂടാതെ, തലയിണകൾ, തൊപ്പികൾ, ഹെൽമെറ്റുകൾ, ഹെഡ്ബാൻഡ് ഉൾപ്പെടെ നിങ്ങളുടെ തലയിൽ ഉപയോഗിക്കുന്നവയെല്ലാം കൃത്യമായ ഇടവേളകളിൽ കഴുകുക.
