International Labour Day 2021, May Day 2021: Wishes, Images, Quotes, Messages, Status, and Photos: തൊഴിലിന്റെ മഹത്വത്തെയും തൊഴിലാളികളുടെ അവകാശങ്ങളെയും ഓർമിപ്പിച്ചു കൊണ്ട് മറ്റൊരു മേയ് ദിനം കൂടി എത്തുകയാണ്. തൊഴിലാളി പോരാട്ടങ്ങളുടെ ഓർമ പുതുക്കൽ കൂടിയാണ് മേയ് 1. എട്ടു മണിക്കൂര്‍ ജോലി, എട്ടു മണിക്കൂര്‍ വിനോദം, എട്ടു മണിക്കൂര്‍ വിശ്രമം എന്ന ന്യായമായ ആവശ്യത്തിന് വേണ്ടി തൊഴിലാളികൾ പോരാടിയതിന്റെ സ്മരണ പുതുക്കലാണ് ഈ ദിനം. കോവിഡിന്റെ പശ്ചാത്തലത്തിൽ ഇത്തവണയും മേയ് ദിന റാലികൾ ഉണ്ടാവില്ല.
ലോകമെമ്പാടും ജോലി സമയം എട്ട് മണിക്കൂറാക്കി ക്രമപ്പെടുത്തിയതിന് പിന്നില്‍ 1886ല്‍ അമേരിക്കന്‍ നഗരങ്ങളില്‍ ആളിക്കത്തിയ വിപ്ലവത്തിന്റെ ചരിത്രമുണ്ട്. ചിക്കാഗോ തെരുവുകളില്‍ അന്നുയര്‍ന്ന മുദ്രാവാക്യങ്ങളുടെ അലയൊലി, അമേരിക്കന്‍ സാമ്രാജ്യത്തെ മാത്രമല്ല, ലോകത്തെ മുഴുവന്‍ പിടിച്ചുകുലുക്കി. ഇപ്പോഴും തൊഴിലാളികളുടെ സംഘടിത ശബ്ദത്തെ മുതലാളികളും ഭരണകൂടവും ഭയക്കുന്നതിന്‍റെ പിന്നിലും രക്തസാക്ഷികളായ തൊഴിലാളി നേതാക്കളെക്കുറിച്ചും അവര്‍ നടത്തിയ പോരാട്ടവീര്യത്തെക്കുറിച്ചുളള ഓര്‍മകളും തന്നെയാണ്.
1904 ല്‍ ആംസ്റ്റര്‍ഡാമില്‍ വച്ചു നടന്ന ഇന്‍റര്‍നാഷണല്‍ സോഷ്യലിസ്റ്റ് കോണ്‍ഫറന്‍സിന്‍റെ വാര്‍ഷിക യോഗത്തിലാണ്, ജോലി സമയം എട്ടുമണിക്കൂറാക്കിയതിന്റെ വാര്‍ഷികമായി മേയ് ഒന്ന് തൊഴിലാളി ദിനമായി കൊണ്ടാടുവാന്‍ തീരുമാനിച്ചത്. ചൈനയ്ക്കും റഷ്യയ്ക്കും പിന്നാലെ ലോകം മുഴുവന്‍ മെയ് ദിനം ആഘോഷിക്കാന്‍ തുടങ്ങി. ഇന്ന് എണ്‍പതോളം രാജ്യങ്ങളില്‍ മേയ് ദിനം പൊതു അവധിയാണ്.
