ലോക വനിതാദിനത്തിന്റെ ഈ വർഷത്തെ ക്യാംപെയിൻ തീം പുറത്തിറങ്ങി. #PressforProgress ആണ് ഇത്തവണത്തെ ക്യാംപെയിൻ തീം. സ്ത്രീയ്ക്കും പുരുഷനും ഇടയിലെ അന്തരം കുറച്ച് ലിംഗസമത്വം ഉറപ്പുവരുത്തുകയാണ് ഇത്തവണത്തെ തീമിലൂടെ ലക്ഷ്യമിടുന്നത്.

മാർച്ച് എട്ടിനാണ് ലോകവനിതാ ദിനം. വനിതാദിനത്തിൽ തുടക്കമിടുന്ന ഈ ക്യാംപെയിൻ വർഷം മുഴുവൻ നീണ്ടുനിൽക്കും. ലോകത്തിന്റെ പല ഭാഗങ്ങളിൽനിന്നായി വിവിധ ഗ്രൂപ്പുകൾ ഈ ഹാഷ്ടാഗിലൂടെ ലിംഗസമത്വത്തെക്കുറിച്ചുളള ബോധവൽക്കരണം നടത്തും. സോഷ്യൽ മീഡിയയിലൂടെ നിരവധി പേർ ഇതിനോടകം ക്യാംപെയിന് പിന്തുണ അറിയിച്ചിട്ടുണ്ട്. #BeBoldforChange ആയിരുന്നു കഴിഞ്ഞ വർഷത്തെ ക്യാംപെയിൻ തീം.

1910 ൽ ഡെൻമാർക്കിൽ നടന്ന ഇന്റർനാഷണൽ വുമൺസ് കോൺഫറൻസിലാണ് ജർമനിയിലെ വനിതാ നേതാവും രാഷ്ട്രീയ പ്രവർത്തകയുമായ ക്ലാരാ സെറ്റ്കിൻ വനിതാ ദിനം എന്ന ആശയം മുന്നോട്ടുവച്ചത്. 17 രാജ്യങ്ങളിൽനിന്നുളള വനിതാ പ്രതിനിധികൾ പങ്കെടുത്ത സമ്മേളനത്തിലായിരുന്നു ക്ലാര ഈ ആശയം അവതരിപ്പിച്ചത്. സമ്മേളനത്തിൽ ഇതിന് അംഗീകാരം ലഭിക്കുകയും അടുത്ത വർഷം 1911 മുതൽ വനിതാ ദിനം ആചരിച്ചു തുടങ്ങുകയും ചെയ്തു.

1975 ലാണ് ഐക്യരാഷ്ട്ര സഭ മാർച്ച് 8 ലോക വനിതാ ദിനമായി പ്രഖ്യാപിച്ചത്.

Get all the Latest Malayalam News and Kerala News at Indian Express Malayalam. You can also catch all the Malayalam Lifestyle News by following us on Twitter and Facebook