മാനിക്യൂർ വേണ്ട, ടാനകറ്റി കൈകൾ സോഫ്റ്റാകാൻ ഈ പൊടി മതി

സൂര്യപ്രകാശം, അന്തരീക്ഷ മലിനീകരണം തുടങ്ങി പലവിധ കാരണങ്ങളാൽ കൈ കാലുകളുടെ നിറം മാറാറുണ്ട്. ചിലർക്ക് കൈമുട്ടുകളിൽ കൂടുതൽ കറുപ്പ് ഉണ്ടാകാറുണ്ട്. വളരെ എളുപ്പത്തിൽ കൈ കാലുകളുടെ ഇരുളിച്ച മാറ്റി നല്ല നിറം വയ്ക്കാൻ സഹായകരമായ ഒരു പാക്കുണ്ട്.

വളരെ കുറച്ച് ചേരുവകൾ കൊണ്ട് തയ്യാറാക്കാവുന്നൊരു പാക്ക് ആണിത്. കാപ്പിപ്പൊടി, മസൂർ ദാൽ പൗഡർ, ബ്രൗൺ ഷുഗർ, കടലമാവ്, തൈര്, നാരങ്ങ നീര്, എണ്ണ എന്നിവ ഉപയോഗിച്ചാണ് ഈ പാക്ക് തയ്യാറാക്കുന്നത്.

ചേരുവകൾ

മസൂർ ദാൽ പൗഡർ- 1 ടേബിൾസ്പൂൺ, കടല മാവ് - അര ടേബിൾസ്പൂൺ, ബ്രൗൺ ഷുഗർ പൊടിച്ചത്- 1 ടേബിൾസ്പൂൺ, കോഫി പൗഡർ- 1ടേബിൾസ്പൂൺ, തൈര്- 2 ടേബിൾസ്പൂൺ, നാരങ്ങനീര്- 1 ടീസ്പൂൺ, എണ്ണ- 1 ടീസ്പൂൺ

തയ്യാറാക്കുന്ന വിധം

ഈ ചേരുവകളെല്ലാം നന്നായി മിക്സ് ചെയ്തശേഷം കൈകളിലും കാലുകളിലും പുരട്ടുക. നന്നായി ഉണങ്ങിയശേഷം കഴുകി കളയുക. ഒരാഴ്ച തുടർച്ചയായി ഉപയോഗിച്ചാൽ നല്ല ഫലം പ്രകടമാകും. അതല്ലെങ്കിൽ ഒന്നിടവിട്ട ദിവസങ്ങളിൽ ഈ പാക്ക് പുരട്ടാം.

ഗുണങ്ങൾ

കാപ്പിപ്പൊടി നല്ലൊരു എക്സിഫോളിയന്റാണെന്ന് ലക്ഷ്മി നായർ വീഡിയോയിൽ പറഞ്ഞു. ചർമ്മത്തിന് നല്ല നിറം നൽകും. ഗ്ലൈക്കോളിക് ആസിഡിന്റെ പ്രൃതിദത്ത സ്രോതസാണ് പഞ്ചസാര. ചർമ്മം തിളങ്ങാനും നിറം വയ്ക്കാനും സഹായിക്കും. ഗ്ലൈക്കോളിക് ആസിഡ് ചർമ്മത്തിൽ ആഴ്ന്നിറങ്ങുന്നു, ചർമ്മത്തിലെ മൃതകോശങ്ങളെ പുറന്തള്ളുന്നതിനോടൊപ്പം കൊളാജെൻ ഉൽപ്പാദനം ഉത്തേജിപ്പിക്കുകയും ചെയ്യുന്നു. സ്കിൻ ടാൻ മാറ്റാൻ സഹായിക്കുന്ന ബ്ലീച്ചിങ് ഘടകങ്ങൾ മസൂർ ദാലിനുണ്ട്. കറുത്ത പാടുകൾ അകറ്റാനും ചർമ്മം തിളങ്ങാനും കടല മാവ് സഹായിക്കും. നാരങ്ങ നീരിന് ബ്ലീച്ചിങ് ഗുണങ്ങളുണ്ട്. തൈരും നല്ലൊരു എക്സ്ഫോളിയന്രാണ്. ചർമ്മത്തിന് തിളക്കം നൽകുമെന്ന് അവർ അഭിപ്രായപ്പെട്ടു.