ആരെയും മയക്കും തെച്ചിവസന്തം, പരിപാലനത്തിൽ ഇക്കാര്യങ്ങൾ ശ്രദ്ധിക്കാം

പിങ്ക്, ഓറഞ്ച്, വെള്ള, ചുവപ്പ്, മഞ്ഞ എന്നീ നിറങ്ങളില്‍ ആരെയും ആകര്‍ഷിക്കുന്ന പൂക്കളാണ് കുലകളായി ഈ ചെടിയിലുണ്ടാകുന്നത്.

ഈര്‍പ്പമുള്ള മണ്ണാണ് ചെത്തി വളരാന്‍ അനുയോജ്യം. എന്നാല്‍, വെള്ളം കെട്ടിക്കിടക്കരുത്. വേര് ചീയല്‍ ബാധിക്കാന്‍ സാധ്യതയുണ്ട്. ദിവസവും ഒരു നേരം നനച്ചു കൊടുത്താൽ മതിയാകും.

പിങ്കും വെളുപ്പും നിറത്തിലുള്ള പൂക്കളുണ്ടാകുന്ന ചെടികള്‍ തണുപ്പുകാലത്ത് പെട്ടെന്ന് നശിക്കാനുള്ള സാധ്യതയുണ്ട്. അതുപോലെ അമിതമായ ചൂട് കിട്ടിയാലും ചെടി നശിച്ചുപോകും.

മണ്ണും ചാണകപ്പൊടിയും ചകിരിച്ചോറും ചേര്‍ത്ത് പോട്ടിങ്ങ് മിശ്രിതം പോളിത്തീന്‍ കവറില്‍ നിറച്ച് വീട്ടിനുള്ളില്‍ ചെടി വളര്‍ത്താം. നാലിഞ്ച് നീളത്തില്‍ വെട്ടിയെടുത്ത കമ്പുകളാണ് നടാന്‍ ഉപയോഗിക്കുന്നത്.

ആവശ്യത്തിന് സൂര്യപ്രകാശം ലഭിച്ചില്ലെങ്കില്‍ പൂക്കള്‍ കുറയും. വീടിനകത്ത് വെക്കുമ്പോള്‍ നല്ല വെളിച്ചം കിട്ടുന്ന ജനലിനരികില്‍ ചെടിച്ചട്ടി വെച്ചാല്‍ മതി.