ഉള്ളിയും വെളിച്ചെണ്ണയും ഉണ്ടെങ്കിൽ ഹെയർ സെറം ഇനി കടയിൽ നിന്നും വാങ്ങേണ്ട

കട്ടി കുറഞ്ഞ ബലമില്ലാത്ത തലമുടിയാണോ നിങ്ങൾക്കുള്ളത്. എങ്കിൽ ഔഷധ ഗുണമുള്ള പ്രകൃതിദത്തമായ ചേരുവകൾ ഉപയോഗിച്ചുള്ള ഹെയർ സെറം നിങ്ങളെ സഹായിക്കും. അത് കരുത്തുറ്റ തിളക്കമുള്ള തലമുടി വളരുന്നതിന് അനുയോജ്യമാണ്.

ആവണക്കും വെളിച്ചെണ്ണയും

രണ്ട് ടേബിൾസ്പൂൺ വെളിച്ചെണ്ണയിലേയ്ക്ക് രണ്ട് ടേബിൾസ്പൂൺ ആവണക്കെണ്ണ ചേർക്കാം. ലഭ്യമെങ്കിൽ അതിലേയ്ക്ക് അഞ്ച് തുള്ളി റോസ്മേരി എണ്ണ ചേർത്തിളക്കി യോജിപ്പിക്കാം. രാത്രി ഉറങ്ങാൻ കിടക്കുന്നതിനു മുമ്പായി ഈ മിശ്രിതം തലമുടിയിൽ പുരട്ടാം. ആഴ്ചയിൽ രണ്ടു തവണ ഇങ്ങനെ ചെയ്തു നോക്കൂ.

കറ്റാർവാഴ ജോജോബ എണ്ണ

രണ്ട് ടേബിൾസ്പൂൺ കറ്റാർവാഴ ജെല്ലിലേയ്ക്ക് ഒരു ടേബിൾസ്പൂൺ ജോജോബ എണ്ണ ചേർക്കാം. അതിലേയ്ക്ക് അഞ്ച് തുള്ളി റോസ്മേരി എണ്ണ ചേർത്തിളക്കി യോജിപ്പിക്കുക. ഇത് മുടിയിലും തലയോട്ടിയിലും പുരട്ടി അര മണിക്കൂർ വിശ്രമിക്കാം. ശേഷം തണുത്ത വെള്ളത്തിൽ കഴുകി കളയാം.

ഉള്ളി നീര് ഒലിവ് എണ്ണ

രണ്ട് ടേബിൾസ്പൂൺ ഉള്ളി നീരിലേയ്ക്ക് രണ്ട് ടേബിൾസ്പൂൺ ഒലിവ് എണ്ണ ചേർത്തിളക്കി യോജിപ്പിക്കാം. അതിലേയ്ക്ക് റോസ്മേരി എണ്ണ ചേർക്കാം. ശേഷം തലയോട്ടിയിലും മുടിയിലും പുരട്ടാം.

നെല്ലിക്ക സെറം

ഒരു ടേബിൾസ്പൂൺ നെല്ലിക്ക നീരിലേയ്ക്ക് രണ്ട് സ്പൂൺ വെളിച്ചെണ്ണ ചേർക്കാം. ഈ മിശ്രിതം ആഴ്ചയിൽ രണ്ടു പ്രാവശ്യം മുടിയിൽ പുരട്ടി നോക്കൂ.