ഒരു ഗ്ലാസ് കഞ്ഞിവെള്ളം മാറ്റി വച്ചോളൂ, പട്ടു പോലുള്ള തലമുടി നേടാൻ അത് ഉപയോഗിക്കാം

ചുരുണ്ട മുടി, അറ്റം പൊട്ടിപോകൽ, മുടി കൊഴിച്ചിൽ തുടങ്ങി നിരവധി പ്രശ്നങ്ങളാണ് നിങ്ങൾ നേരിടേണ്ടി വരുന്നത്. കെമിക്കൽ ചേരുവകൾ അടങ്ങിയ ഉത്പന്നങ്ങൾക്കു പകരം ചില വീട്ടുവൈദ്യങ്ങൾ പരീക്ഷിക്കൂ.

പുളിപ്പിച്ച റൈസ് വാട്ടർ പോഷകങ്ങളുടെ കലവറയാണ്. അത് ഹെയർ ഫോളിക്കിളുകളെയും മുടിയിഴകളെയും പോഷിപ്പിക്കും. പ്രോട്ടീനുകൾ, വിറ്റാമിനുകൾ, ധാതുക്കൾ, അമിനോ ആസിഡുകൾ എന്നിവ അതിൽ അടങ്ങിയിട്ടുണ്ട്. മുടിയിഴകൾ കരുത്താർജിക്കുന്നതിനും അതിൻ്റെ ഘടന മെച്ചപ്പെടുത്തുന്നതിനും റൈസ് വാട്ടർ സഹായിക്കും.

തലമുടിയെ ശക്തിപ്പെടുത്താനും ഇലാസ്തികത വർധിപ്പിക്കാനും സഹായിക്കുന്ന കാർബോഹൈഡ്രേറ്റായ ഇനോസിറ്റോളാണ് ഇതിലെ പ്രധാന ഘടകം. ഇതിൻ്റെ ശാസ്ത്രീയമായ തെളിവുകൾ പരിമിതമാണെങ്കിലും നിരവധി ബ്രാൻഡഡ് ഉത്പന്നങ്ങൾ വരെ ഇത് ഉപയോഗിക്കുന്നുണ്ട്.

തലമുടിയിൽ റൈസ് വാട്ടർ ഉപയോഗിക്കേണ്ട വിധം

ഒരു കപ്പ് അരി നന്നായി കഴുകിയെടുക്കാം. അതിലേയ്ക്ക് രണ്ട് കപ്പ് വെള്ളം ഒഴിച്ച് നന്നായി തിളപ്പിക്കാം. തണുത്തതിനു ശേഷം അത് അരിച്ചെടുത്ത് പുളിപ്പിക്കാനായി മാറ്റി വയ്ക്കാം. 24 മണിക്കൂറിനു ശേഷം അത് ഉപയോഗിക്കാം. ശിരോചർമ്മത്തിലും മുടിയിഴകളിലും പുരട്ടി 30 മിനിറ്റ് വിശ്രമിക്കാം. ശേഷം തണുത്ത വെള്ളത്തിൽ കഴുകി കളയാം

ഇക്കാര്യങ്ങൾ ശ്രദ്ധിക്കാം

ആഴ്ചയിൽ ഒന്നോ രണ്ടോ തവണ മാത്രം ഇഥ് ഉപയോഗിച്ചാൽ മതിയാകും. ഓരോരുത്തരുടെയും തലമുടിയുടെ ഘടനയും പ്രകൃതവും വ്യത്യസ്തമായിരിക്കും. അതിനാൽ ഉപയോഗിക്കുന്നത് എന്താണെങ്കിലും അമിതമാകാതിരിക്കാൻ ശ്രദ്ധിക്കാം. പാച്ച് ടെസ്റ്റ് ചെയ്തതിനു ശേഷം മാത്രം ഇത് സ്ഥിരമായി ഉപയോഗിക്കുക.