Happy Diwali 2025 Wishes, Photos, Status: പ്രിയപ്പെട്ടവർക്ക് കൈമാറാം ദീപാവലി ആശംസകൾ

തിന്മയുടെ മേൽ നന്മ നേടിയ വിജയത്തെയും, അജ്ഞതയുടെ മേൽ അറിവ് നേടിയ വിജയത്തെയുമാണ് ദീപങ്ങൾ തെളിയിച്ചും മധുരം നൽകിയും ഏവരും ദീപാവലി ദിനത്തിൽ ആഘോഷിക്കുന്നത്

ഹൈന്ദവ ചാന്ദ്രമാസ കലണ്ടർ അനുസരിച്ച്, കാർത്തിക മാസത്തിലെ കറുത്തവാവ് (അമാവാസി) ദിവസമാണ് ദീപാവലി. 2025-ൽ ദീപാവലി പ്രധാനമായും ആഘോഷിക്കുന്നത് ഒക്ടോബർ 20 തിങ്കളാഴ്ചയാണ്. മിക്ക പ്രദേശങ്ങളിലും ഇത് അഞ്ച് ദിവസം നീണ്ടുനിൽക്കുന്ന ആഘോഷമാണ്.

ദീപാവലി ആഘോഷിക്കുന്നതിന് പിന്നിൽ രാജ്യവ്യാപകമായി നിരവധി ഐതിഹ്യങ്ങളുണ്ട്. 14 വർഷത്തെ വനവാസത്തിനും രാവണവധത്തിനും ശേഷം ശ്രീരാമൻ അയോദ്ധ്യയിൽ തിരിച്ചെത്തിയപ്പോൾ, ജനങ്ങൾ ദീപങ്ങൾ തെളിയിച്ച് അദ്ദേഹത്തെ സ്വീകരിച്ചതിൻ്റെ ഓർമ്മയായി ദീപാവലി ദിനത്തെ കാണുന്നവരുണ്ട്.

ദക്ഷിണേന്ത്യയിലാകട്ടെ ഭഗവാൻ ശ്രീകൃഷ്ണൻ നരകാസുരനെ വധിച്ച് ലോകത്തെ രക്ഷിച്ച ദിവസമായി ദീപാവലിയുടെ തലേദിവസം നരക ചതുർദശി ആഘോഷിക്കുന്നു. പാലാഴി മഥനത്തിൽ ഐശ്വര്യദേവതയായ ലക്ഷ്മിദേവി അവതരിച്ച ദിവസമായും ദീപാവലിയെ കണക്കാക്കുന്നു.

ദക്ഷിണേന്ത്യയിൽ, പ്രത്യേകിച്ചും കേരളത്തിൽ, മറ്റ് സംസ്ഥാനങ്ങളെ അപേക്ഷിച്ച് ആഘോഷങ്ങൾ ലളിതവും പ്രധാനമായും ഒരു ദിവസം ഒതുങ്ങുന്നതുമാണ്. എങ്കിലും, ദീപങ്ങൾ തെളിയിച്ചും മധുരം നൽകിയും ഈ ഉത്സവത്തെ എല്ലാവരും വരവേൽക്കുന്നു.