കോടികൾ ചിലവഴിച്ച ഉദയ്പൂർ വിവാഹത്തിന് വധു അണിഞ്ഞ ലെഹങ്കയുടെ വില അറിയാമോ?

ഇന്ത്യൻ വംശജനായ കോടീശ്വരനും ബിസിനസുകാരനായ രാമ രാജു മന്തേനയുടെ മകൾ നേത്ര മന്തേനയും ഉദയ്പൂരിൽ നിന്നുള്ള വംശി ഗഡിരാജുവും തമ്മിലുള്ള വിവാഹമായിരുന്നു കഴിഞ്ഞ ദിവസം ഉദയ്പൂരിൽ വച്ചു നടന്നത്. അംബാനി കല്ല്യാണത്തിനോട് കിടപിടിക്കുന്ന ഒരുക്കങ്ങളും ആഘോഷങ്ങളും നിറഞ്ഞു നിന്ന വിവാഹ ചടങ്ങിൽ ബോളിവുഡ് എ-ലിസ്റ്റ് താരങ്ങളും ഡൊണാൾഡ് ട്രംപ് ജൂനിയർ, ജസ്റ്റിൻ ബീബർ, ഡിജെ ടൈസ്റ്റോ, ജെന്നിഫർ ലോപ്പസ് തുടങ്ങിയ അന്താരാഷ്ട്ര ഐക്കണുകൾ വരെ പങ്കെടുത്തിരുന്നു.

വിവാഹ ചടങ്ങുകളുടെ ചിത്രങ്ങളോടൊപ്പം ഇപ്പോൾ സോഷ്യൽ മീഡിയയിൽ ശ്രദ്ധേയമാകുന്നത് വധു നേത്ര അണിഞ്ഞ സബ്യസാചി ലെഹംഗയാണ്. നടി അദിത് റാവു തൻ്റെ വിവാഹ ചിത്രങ്ങളിൽ അണിഞ്ഞ അതേ ലെഹങ്കയോട് സാമ്യം തോന്നുന്നതാണ് നേത്രയുടെ വസ്ത്രവും.

പരമ്പരാഗതമായ ചുവന്ന വധുവായി അണിഞ്ഞൊരുങ്ങുക എന്നതായിരുന്നു നേത്രയുടെ ഏറ്റവും വലിയ ആഗ്രഹം. ആ സ്വപ്നം പൂർണ്ണമാക്കുന്നതായിരുന്നു പ്രശസ്ത ഡിസൈനറായ സബ്യസാചി മുഖർജി ഒരുക്കിയ അതിമനോഹരമായ ലെഹംഗ. ക്ലാസിക് 'റെഡ് ബ്രൈഡ്' ലുക്കാണ് നേത്ര തിരഞ്ഞെടുത്തത്. നേത്ര തിരഞ്ഞെടുത്തത് തിളക്കമുള്ള ചുവപ്പ് നിറത്തിലുള്ള ലെഹംഗയായിരുന്നു. പരമ്പരാഗതമായ സരി വർക്കുകളും സൂക്ഷ്മമായ കൈത്തറികളും ഉപയോഗിച്ചാണ് ലെഹംഗ അലങ്കരിച്ചിരുന്നത്. ലെഹംഗയുടെ പാവാടയുടെ ഹെംലൈനിലും ദുപ്പട്ടയിലും അതിമനോഹരമായ ഡിസൈനുകളും ആന്റിക് മെറ്റാലിക് ത്രെഡ് വർക്കുകളും കാണാമായിരുന്നു.

ശ്രദ്ധേയമായ ഒരു സവിശേഷത, ലെഹംഗയുടെ ചോളി ആയിരുന്നു. ലോങ് സ്ലീവുള്ളതും ഹൈ-നെക്കോടുകൂടിയതുമായ ഈ ബ്ലൗസ് വേഷത്തിന് ഒരു രാജകീയ ഭംഗി നൽകി. ദുപ്പട്ട തലയിലൂടെ ഭംഗിയായി അണിഞ്ഞത് ഒരു ക്ലാസിക് വധുവിൻ്റെ പ്രതീതി നൽകി. ലെഹങ്കയുടെ യഥാർത്ഥ വില പുറത്തുവിട്ടിട്ടില്ല. എങ്കിലും സബ്യസാചിയുടെ ബ്രൈഡൽ ലെഹങ്കകൾ ഏകദേശം 4 മുതൽ 15 ലക്ഷം വരെ വില മതിക്കുന്നതാണ്.

ലെഹംഗയുടെ ഗാംഭീര്യത്തിനൊത്ത് അതിമനോഹരമായ ആഭരണങ്ങളാണ് നേത്ര തിരഞ്ഞെടുത്തത്. വലിയതും പല ലെയറുകളുള്ളതുമായ ഡയമണ്ട് നെക്ലേസുകളും (ചോക്കർ, ഹാരം), ആകർഷകമായ കമ്മലുകളും, മാംഗ് ടിക്കയും, മൂക്കുത്തിയും ചേർന്ന ആഭരണ ശേഖരം നേത്രയുടെ വേഷത്തിന് പൂർണ്ണത നൽകി. ഇഷ അംബാനിയുടെ ഡയമണ്ട് ആഭരണങ്ങളെ അനുസ്മരിപ്പിക്കുന്നതായിരുന്നു അവ.