കണ്ണാടി തിളക്കമുള്ള ചർമ്മം നേടാം, ഉറങ്ങുന്നതിനു മുമ്പ് ഈ സെറം ഉപയോഗിക്കൂ: Rice Water

Rice Water For Skin: ധാരാളം പോഷക ഗുണങ്ങൾ കഞ്ഞിവെള്ളത്തിൽ അടങ്ങിയിട്ടുണ്ട്. അതിൽ പ്രോട്ടീനുകളും കാർബോഹൈഡ്രേറ്റുകളും ഉൾപ്പെടും. ഇത് ആരോഗ്യത്തിന് മാത്രമല്ല ചർമ്മ സംരക്ഷണത്തിനും ഫലപ്രദമാണ്.

കഞ്ഞിവെള്ളം ഉപയോഗിച്ച് പതിവായി മുഖം കഴുകുന്നത് ചർമ്മം തിളക്കുമുള്ളതും മൃദുവുാക്കും. അതിൽ അടങ്ങിയിരിക്കുന്ന ഫിനോളിക് ആസിഡ് ഫ്ലേവനോയിഡ് എന്നീ സംയുക്തങ്ങളാണ് ഗുണകരം. ഇവയ്ക്ക് ആൻ്റി ഇൻഫ്ലമേറ്ററി ഗുണങ്ങളുണ്ട്. ഇത് ചർമ്മത്തിലെ ചുവപ്പ് പാടുകൾ അകറ്റാൻ സഹായിക്കും. മുഖം വൃത്തിയാക്കി സുഷിരങ്ങൾ അടഞ്ഞു പോകുന്നത് തടയുന്നു. ഇത് മുഖക്കുരുവിനെ പ്രതിരോധിക്കുന്നു.

കഞ്ഞിവെള്ളത്തിൽ വിറ്റാമിൻ ബി, വിറ്റാമിൻ ഇ എന്നിവ അടങ്ങിയിട്ടുണ്ട്. ചർമ്മത്തിൽ യുവത്വം നിലനിർത്തുന്നതിന് ഇത് സഹായിച്ചേക്കും. അമിതമായി വെയിൽ ഏൽക്കുന്നത് മൂലം ഉണ്ടാകുന്ന ടാൻ കുറയ്ക്കുന്നു. കൂടാതെ കണ്ണിനു ചുറ്റുമുള്ള കറുത്ത പാടുകൾ മങ്ങുന്നതിനും സഹായിക്കും. മുഖത്ത് മാത്രമല്ല കഴുത്തിനു ചുറ്റമുള്ള കറുത്ത പാടുകൾക്കും കഞ്ഞിവെള്ളം മികച്ച പ്രതിവിധിയാണ്.

കുളിക്കുന്നതിനു മുമ്പായി അൽപ്പം കഞ്ഞി വെള്ളം ഉപയോഗിച്ച് മുഖം കഴുകുക. ഏകദേശം പതിനഞ്ച് മിനിറ്റിനു ശേഷം സാധാരണ വെള്ളം ഉപയോഗിച്ച് കഴുകി കളയാം. കരുവാളിപ്പ് അകറ്റി ചർമ്മം തിളക്കമുള്ളതാക്കാൻ ഇത് ദിവസേന ചെയ്യാവുന്നതാണ്.

കഞ്ഞിവെള്ളം സെറം

കഞ്ഞി വെള്ളം ഇല്ലെങ്കിൽ അരി കുതിർത്ത വെള്ളവും ഉപയോഗിക്കാവുന്നതാണ്. ഇതിലേയ്ക്ക് കറ്റാർവാഴയുടെ ജെല്ലും, ഗ്ലിസറിനും ചേർത്തിളക്കി യോജിപ്പിക്കാം. ഈ മിശ്രിതം രാത്രി ഉറങ്ങാൻ കിടക്കുന്നതിനു മുമ്പ് മുഖത്ത് പുരട്ടാം. രാവിലെ എണീറ്റയുടൻ തണുത്ത വെള്ളത്തിൽ കഴുകി കളയാം. | ചിത്രം: ഫ്രീപിക്