ഒരൊറ്റ ചെടി മതി വീട്ടിൽ വസന്തമൊരുക്കാൻ; കാറ്റ്സ് ക്ലോയാണ് താരം

കണിക്കൊന്ന പൂക്കളോട് മലയാളികൾക്ക് വല്ലാത്തൊരിഷ്ടമുണ്ട്. മഞ്ഞ പൂക്കളും പച്ച ഇലകളുമായി പൂത്തുനിൽക്കുന്ന കണിക്കൊന്ന കണ്ണിനേറെ ആനന്ദം തരുന്ന കാഴ്ചയാണ്. ദൂരക്കാഴ്ചയിൽ കണിക്കൊന്നയെ ഓർമിപ്പിക്കുന്ന കാറ്റ്സ് ക്ലോ വൈൻ ചെടികളും ഇപ്പോൾ മലയാളികളുടെ ഇഷ്ടം കവർന്നു കഴിഞ്ഞു. കേരളത്തിലെ നഴ്സറികളിലെല്ലാം ഇന്നു ഈ ചെടികൾ ലഭ്യമാണ്.

ബിഗ്നോണിയേസി സസ്യകുടുംബത്തിൽ നിന്നുള്ള ചെടിയാണ് കാറ്റ്സ് ക്ലോ. തെക്കേ -അമേരിക്ക, കരീബിയൻ കാടുകൾ എന്നിവിടങ്ങളാണ് ഈ ചെടിയുടെ സ്വദേശം. വർഷത്തിൽ രണ്ട് തവണയാണ് ഈ ചെടി പൂവിടുക. പൂ വിടർന്നാൽ ഏറെ ദിവസം ചെടിയിൽ നിലനിൽക്കുകയും ചെയ്യും. 100 രൂപ മുതൽ മുകളിലേക്കാണ് കാറ്റ്സ് ക്ലോ ചെടികളുടെ തൈയ്ക്ക് വില വരുന്നത്.

പൂച്ചയുമായി എന്താണ് ഈ ചെടിയ്ക്ക് ബന്ധമല്ലേ? പൂച്ച നഖം പോലെയുള്ള ചെറു മുള്ളുകൾ ഉള്ളതിനാലാണ് ഇവയ്ക്ക് കാറ്റ്സ് ക്ലോ എന്ന പേര് വീണത്.

ഒരൊറ്റ ചെടി മതി ഒരു പ്രദേശത്തെയാകമാനം മൂടാൻ എന്നതാണ് ഇവയുടെ മറ്റൊരു സവിശേഷത. പെട്ടെന്ന് തന്നെ പടർന്നുകയറുന്ന സ്വഭാവമാണ് ഇവയ്ക്കുള്ളത്. അതിനാൽ തന്നെ, അൽപ്പം അപകടകാരിയായും ഈ ചെടിയെ കണക്കാക്കുന്നവരുണ്ട്.

അതിനാൽ തന്നെ, കൃത്യമായി വെട്ടിയൊതുക്കാനും വല്ലാതെ കാടുപിടിക്കാത്ത രീതിയിൽ അവയെ മെയിന്റൈൻ ചെയ്യാനും ശ്രമിക്കേണ്ടതുണ്ട്. അല്ലെങ്കിൽ ഒരു പ്രദേശത്തിന്റെ ജൈവ സമ്പത്ത് തന്നെ പിടിച്ചടക്കും ഈ അധിനിവേശ സസ്യം.