എബിസി ജ്യൂസ് പതിവായി കുടിക്കൂ; ചർമ്മം തിളങ്ങും, നിറം വയ്ക്കും

ഫിറ്റ്നസ്സ് പ്രേമികൾക്കിടയിൽ ഏറെ പോപ്പുലറായ ഒന്നാണ് എബിസി ജ്യൂസ്. ആപ്പിൾ, ബീറ്റ്റൂട്ട്, ക്യാരറ്റ് എന്നിവ ചേർത്തുണ്ടാക്കുന്ന ജ്യൂസിനെയാണ് എബിസി ജ്യൂസ് എന്നു വിളിക്കുന്നത്.

ചര്‍മ്മത്തിന്‍റെ ആരോഗ്യം സംരക്ഷിക്കാനും നിറം വർധിപ്പിക്കാനും ചർമ്മത്തിലെ ചുളിവുകൾ മാറ്റാനും ശരീരഭാരം കുറയ്ക്കാനുമൊക്കെ സഹായിക്കുന്ന ഒരു മിറാക്കിൾ ജ്യൂസ് ആണിത്.

ഏറ്റവും കൂടുതൽ പോഷകമൂല്യമുള്ള ആപ്പിൾ, ബീറ്റ്റൂട്ട്, ക്യാരറ്റ് എന്നിങ്ങനെ മൂന്ന് ചേരുവകളാണ് ഈ ജ്യൂസിൽ അടങ്ങിയിരിക്കുന്നത്.

ആന്റി ഓക്‌സിഡന്റ്, നാരുകൾ എന്നിവയാൽ സമ്പുഷ്ടമാണ് ആപ്പിള്‍. അതേസമയം വിറ്റാമിന്‍ എ, സി എന്നിവയടങ്ങിയ ക്യാരറ്റ് ചര്‍മ്മത്തിലെ ചുളിവുകള്‍ നീക്കാൻ സഹായിക്കും. ബീറ്റ്‌റൂട്ട് രക്തത്തില്‍ ഹീമോഗ്ലോബിന്റെ അളവ് വർധിപ്പിക്കാൻ സഹായിക്കും.

ദഹനം മെച്ചപ്പെടുത്തും, ഹൃദയത്തിന്റെ ആരോഗ്യം സംരക്ഷിക്കും, ശരീരത്തിന് ഊർജ്ജം നൽകും- ഇങ്ങനെ പോവുന്നു എബിസി ജ്യൂസിന്റെ സവിശേഷതകൾ. ശരീരത്തിലെ വിഷാംശങ്ങൾ പുറംതള്ളുന്നതിനും രക്തസമ്മർദ്ദം കുറയ്ക്കാനും രോഗപ്രതിരോധശേഷി വര്‍ധിപ്പിക്കാനും ഈ ജ്യൂസ് സഹായിക്കും.

എങ്ങനെ തയ്യാറാക്കാം

ആവശ്യമായ ചേരുവകൾ: ആപ്പിൾ, ബീറ്റ്റൂട്ട്, ക്യാരറ്റ്- 1 വീതം തയ്യാറാക്കുന്ന വിധം: ആപ്പിളും ബീറ്റ്‌റൂട്ടും ക്യാരറ്റും തൊലികളഞ്ഞ ശേഷം ചെറിയ കഷണങ്ങളായി മുറിക്കണം. ഇനി കുറച്ച് വെള്ളം ചേര്‍ത്ത് ഇവ മിക്‌സിയില്‍ അടിച്ചെടുക്കുക. ഇതിലേയ്ക്ക് വേണമെങ്കില്‍ ചെറുനാരങ്ങാനീരും ചേര്‍ക്കാം. രാവിലെ വെറുംവയറ്റിൽ കുടിക്കുന്നതാണ് ഏറ്റവും ഉത്തമം.