Miss Universe 2025: നാലാം വയസ്സിൽ കണ്ടുതുടങ്ങിയ സ്വപ്നം, മിസ് യൂണിവേഴ്സ് വേദിയിൽ തിളങ്ങിയ ഈ 22കാരിയെ അറിയാമോ?

74th Miss Universe 2025; Manika Viswakarma: 74-ാമത് മിസ് യൂണിവേഴ്സ് 2025 വേദിയിൽ ഇന്ത്യയെ പ്രതിനിധീകരിച്ചത് രാജസ്ഥാനിൽ നിന്നുള്ള മനിക വിശ്വകർമയാണ്. ലോകവേദിയിൽ ഇന്ത്യയുടെ പാരമ്പര്യവും ആധുനികതയും മനിക വിജയകരമായി പ്രതിനിധീകരിച്ചു. ഭാവിയിൽ ഇന്ത്യയുടെ കിരീട പ്രതീക്ഷകൾക്ക് കരുത്തേകുന്നതായിരുന്നു മണികയുടെ പ്രകടനം. സ്വിമിങ് സ്യൂട്ട് പ്രസൻ്റേഷൻ റൗണ്ടിനു ശേഷം ടോപ്പ് 12 റൗണ്ടിൽ നിന്നാണ് മനിക പുറത്തായത്.

അവസാന റൗണ്ട് വരെ എത്താനായില്ലെങ്കിലും വേദിയിൽ ഏറെ ശ്രദ്ധേയമായ കോസ്റ്റ്യൂമുകളാണ് മണിക അവതരിപ്പിച്ചത്. മാതൃരാജ്യത്തിൻ്റെ സാംസ്കാരിക പൈതൃകത്തിന് ആദരമർപ്പിച്ചുകൊണ്ട് നാഷണൽ കോസ്റ്റ്യൂം എന്ന വിഭാഗത്തിൽ "ട്രീ ഓഫ് എൻലൈറ്റൻമെന്റ്" അവതരിപ്പിച്ചു കൊണ്ടാണ് മനിക രാജ്യത്തിൻ്റെ പാരമ്പര്യവും സംസ്കാരവും ലോകവേദിയിൽ തുറന്നു കാണിച്ചത്.

ബോധി വൃക്ഷത്തിൽ നിന്ന് പ്രചോദനം ഉൾക്കൊണ്ടതായിരുന്ന മണികയുടെ നാഷണൽ കോസ്റ്റ്യൂം. അത് വളർച്ച, ജ്ഞാനം, ആത്മീയ ഉണർവ് എന്നിവയെ ആണ് പ്രതിനിധീകരിച്ചത്. സങ്കീർണ്ണമായ ഹാൻഡ് എംബ്രോയ്ഡറി, ലോഹങ്ങൾ കൊണ്ടുള്ള ഇലകൾ, സിലൗറ്റ് കൊണ്ടുള്ള വൃക്ഷ രൂപം എന്നിവയാണ് വസ്ത്രത്തിൻ്റെ പ്രത്യേകതകൾ. പ്രകൃതിയും പ്രബുദ്ധതയുമായി ഇന്ത്യക്ക് ആഴത്തിലുള്ള ബന്ധത്തെയാണ് ഇത് പ്രതിഫലിപ്പിച്ചത്.

രാജസ്ഥാനിൽ നിന്നും മിസ് യൂണിവേഴ്സ് വേദിയിലെത്തുന്ന ആദ്യത്തെ സുന്ദരിയാണ് മനിക. പല സ്ത്രീകൾക്കും ഇത് പ്രചോദനമായി മാറുന്നു.

രാജസ്ഥാനിലെ ശ്രീ ഗംഗാനഗറാണ് മനികയുടെ സ്വദേശം. നിലവിൽ ഡൽഹിയിലാണ് താമസം. ഡൽഹി സർവകലാശാലയിലെ മാതാ സുന്ദരി കോളേജ് ഫോർ വിമനിൽ പൊളിറ്റിക്കൽ സയൻസിലും ഇക്കണോമിക്സിലും അവസാന വർഷ ബിരുദ വിദ്യർത്ഥിയാണ് ഈ സുന്ദരി.

നാഷണൽ കേഡറ്റ് കോർപ്‌സിൽ (ഇന്ത്യ) നിന്ന് ബിരുദം നേടിയ മനിക, പരിശീലനം ലഭിച്ച ക്ലാസിക്കൽ നർത്തകിയും ദൃശ്യ കലാകാരിയുമാണ്. ലളിത് കലാ അക്കാദമി, സർ ജെ. ജെ. സ്കൂൾ ഓഫ് ആർട്ട് തുടങ്ങിയ സ്ഥാപനങ്ങളിൽ നിന്നും അംഗീകാരങ്ങൾ മനികയ്ക്ക് ലഭിച്ചിട്ടുണ്ട്.

ന്യൂറോ ഡൈവേർജൻസിനെക്കുറിച്ചുള്ള സാമൂഹിക ധാരണകളെ പുനർനിർവചിക്കുന്നതിലും, എഡിഎച്ച്ഡി പോലുള്ള അവസ്ഥകളെ കുറിച്ചുള്ള ശരിയായ അവബോധം ഉണ്ടാക്കുന്നത് പ്രോത്സാഹിപ്പിക്കുന്നതിലും ശ്രദ്ധ കേന്ദ്രീകരിച്ച "ന്യൂറോനോവ" എന്ന സംരംഭത്തിന്റെ സ്ഥാപക കൂടിയാണ് മനിക.

2024-ൽ മനിക മിസ്സ് യൂണിവേഴ്സ് രാജസ്ഥാൻ കിരീടമണിഞ്ഞു, സെപ്റ്റംബർ 22-ന് ജയ്പൂരിൽ നടന്ന മിസ്സ് യൂണിവേഴ്സ് ഇന്ത്യ 2024 മത്സരത്തിൽ തന്റെ സംസ്ഥാനത്തെ പ്രതിനിധീകരിച്ചു മനിക ടോപ്പ് 20 സെമിഫൈനലിസ്റ്റുകളിൽ ഒരാളായി ഇടം നേടി. കൂടാതെ "ബെസ്റ്റ് ഇൻ സ്പീച്ച്" സബ്ടൈറ്റിൽ അവാർഡിനുള്ള ടോപ്പ് 5-ൽ ഇടം നേടി. മിസ്സ് യൂണിവേഴ്സ് രാജസ്ഥാൻ എന്ന നിലയിൽ, വിദേശകാര്യ മന്ത്രാലയത്തിന്റെ ആഭിമുഖ്യത്തിൽ സംഘടിപ്പിച്ച ബിംസ്റ്റെക് സെവോകോണിലും മനിക ഇന്ത്യയെ പ്രതിനിധീകരിച്ചു.