അങ്കമാലിയില്‍ പനി ബാധിച്ച കുട്ടിക്ക് പേവിഷബാധയ്ക്കുള്ള കുത്തിവയ്പ്പെടുത്തു

അങ്കമാലി: പനി ബാധിച്ച് ചികിത്സയ്ക്കെത്തിച്ച ഏഴ് വയസുകാരിക്ക് പേവിഷബാധയ്ക്കുള്ള കുത്തിവയ്പ്പെടുത്ത് നഴ്സ്. അങ്കമാലി താലൂക്ക് ആശുപത്രിയിലാണ് സംഭവം. വെള്ളിയാഴ്ചയാണ് സംഭവം. പൂച്ച കടിച്ചെന്ന് കുട്ടി പറഞ്ഞതിനാലാണ് കുത്തിവയ്പ്പെടുത്തതെന്നാണ് നഴ്സിന്റെ വിശദീകരണം.

സംഭവം അന്വേഷിച്ച് കര്‍ശന നടപടി സ്വീകരിക്കാന്‍ ആരോഗ്യ വകുപ്പ് മന്ത്രി വീണാ ജോര്‍ജ് ആരോഗ്യ വകുപ്പ് ഡയറക്ടര്‍ക്ക് നിര്‍ദേശം നല്‍കി.

കടുത്ത പനിയെ തുടര്‍ന്നാണ് കുട്ടി അമ്മയ്ക്കൊപ്പം ആശുപത്രിയിലെത്തിയത്. പ്രാഥമിക പരിശോധനയ്ക്ക് ശേഷം ഡോക്ടര്‍ രക്തപരിശോധനയ്ക്ക് നിര്‍ദേശിക്കുകയായിരുന്നു. എന്നാല്‍ അമ്മ ഒപി ടിക്കെറ്റെടുക്കാന്‍ പോയ സമയത്താണ് നഴ്സ് കുത്തിവച്ചതെന്നാണ് ലഭിക്കുന്ന വിവരം.

ഒപി ടിക്കറ്റെടുത്ത ശേഷം തിരിച്ചെത്തിയപ്പോഴാണ് അമ്മ വിവരം അറിഞ്ഞത്. കുട്ടിയുടെ രണ്ട് കയ്യിലും കുത്തിവയ്പ്പെടുത്തു. എന്നാല്‍ ഈ സമയം തന്നെ പേവിഷബാധയ്ക്ക് കുത്തിവയ്പ്പെടുക്കാന്‍ മറ്റൊരു കുട്ടിയെത്തിയിരുന്നു. രണ്ട് കുട്ടികളും തമ്മില്‍ മാറിപ്പോയതാണെന്നാണ് മനസിലാക്കാന്‍ സാധിക്കുന്നത്.

കുത്തിവയ്പ്പ് ലഭിച്ച കുട്ടി നിലവില്‍ നിരീക്ഷണത്തിലാണ്. കുട്ടിക്ക് ആരോഗ്യ പ്രശ്നങ്ങളൊന്നുമില്ലെന്നാണ് അറിയാന്‍ കഴിഞ്ഞത്. മുന്‍കൂറായി പേവിഷബാധയ്ക്കുള്ള കുത്തിവയ്പ്പെടുത്താലും പ്രശ്നമില്ലെന്നാണ് ആശുപത്രി സൂപ്രണ്ട് നല്‍കുന്ന വിശദീകരണം.