മലപ്പുറം: മാരകമായ വെസ്റ്റ് നൈല്‍ പനി മലപ്പുറത്ത് സ്ഥിരീകരിച്ചു. ആറ് വയസുകാരനിലാണ് പനി സ്ഥിരീകരിച്ചിരിക്കുന്നത്. രോഗം ബാധിച്ച കുട്ടിയെ കോഴിക്കോട് മെഡിക്കല്‍ കോളേജിലേക്ക് മാറ്റിയിട്ടുണ്ട്. കൊതുകുകളിലൂടെയാണ് പനി പടരുന്നത്. ഈ രോഗത്തിന് പ്രതിരോധ വാക്‌സിന്‍ ലഭ്യമല്ല.
പനി ബാധിച്ച ആറ് വയസുകാരന്‍ വേങ്ങര എ.ആര്‍. നഗര്‍ സ്വദേശിയാണ്. കുട്ടിയെ തീവ്രപരിചരണ വിഭാഗത്തില്‍ പ്രവേശിപ്പിച്ചിരിക്കുകയാണ്. വൈറസ് ബാധിച്ച ക്യൂലക്‌സ് കൊതുകുകളിലൂടെയാണ് രോഗം പടരുന്നത്. മൃഗങ്ങളിലൂടെയും ദേശാടന പക്ഷികളിലൂടെയുമാണ് ഈ വൈറസ് കൊതുകുകളിലേക്ക് എത്തുന്നത്.
രോഗബാധിതനായ കുട്ടി താമസിച്ചിരുന്ന എ.ആര്‍. നഗറിലും തിരൂരങ്ങാടിയിലും മൃഗങ്ങളുടെ രക്ത സാമ്പിളുകള്‍ പരിശോധനക്കായി എടുത്തിട്ടുണ്ട്. രോഗം വരാതിരിക്കാനുള്ള വാക്‌സിന്‍ ലഭ്യമല്ലാത്ത സാഹചര്യത്തില്‍ കൊതുക് നശീകരണം ശക്തമാക്കിയിരിക്കുകയാണ് ജില്ലാ ആരോഗ്യ വിഭാഗം.
