പത്തനാപുരം: കൊല്ലം-പുനലൂര്‍ പാതിയിലെ ആവണീശ്വരം റെയില്‍വേ സ്റ്റേഷനില്‍ ഒരേ പാളത്തില്‍ ട്രെയിനുകള്‍ നേര്‍ക്കുനേര്‍! പേടിക്കാന്‍ വരട്ടെ. യാത്രക്കാര്‍ക്ക് സംഭവിച്ച ആശയക്കുഴപ്പമാണ് സംഭവം.
കൊല്ലം-പുനലൂര്‍ പാതയില്‍ ആവണീശ്വരം സ്റ്റേഷനിലാണു സംഭവം. ഗുരുവായൂര്‍-ഇടമണ്‍ ട്രെയിനിലെ യാത്രക്കാര്‍ ആശയക്കുഴപ്പത്തെ തുടര്‍ന്ന് ട്രെയിന്‍ ചങ്ങല വലിച്ചു നിര്‍ത്തുകയായിരുന്നു. രണ്ട് ഭാഗത്തും എന്‍ജിനുള്ള കൊല്ലം-താംബരം ട്രെയിനാണ് യാത്രക്കാരെ ആശയക്കുഴപ്പത്തിലാക്കിയത്.
ആവണിശ്വരം സ്റ്റേഷനിലെ ഒന്നാമത്തെ പ്ലാറ്റ്‌ഫോമില്‍ കൊല്ലം-താംബരം സ്‌പെഷല്‍ ട്രെയിന്‍ ക്രോസിങ്ങിനായി നിര്‍ത്തിയിട്ടിരുന്നു. ഈ സമയം, രണ്ടാമത്തെ പ്ലാറ്റ്‌ഫോമില്‍ പുനലൂരില്‍ നിന്നു കൊല്ലത്തേക്കുള്ള പാസഞ്ചര്‍ ട്രെയിന്‍ എത്തുകയായിരുന്നു. തൊട്ട് പിന്നാലെ സ്റ്റേഷന്റെ ഔട്ടറിലേക്ക് ഗുരുവായൂര്‍-ഇടമണ്‍ ഫാസ്റ്റ് പാസഞ്ചര്‍ എത്തി. ഒന്നാമത്തെ പ്ലാറ്റ്‌ഫോമിലെ കൊല്ലം-താംബരം ട്രെയിന്‍ കടന്നു പോയതിനു ശേഷമേ സാധാരണയായി ഗുരുവായൂര്‍-ഇടമണ്‍ ഫാസ്റ്റ് പാസഞ്ചറിനു സ്റ്റേഷന്‍ സിഗ്‌നല്‍ കിട്ടുകയുള്ളു. പക്ഷെ രണ്ട് ട്രാക്കിലും കൊല്ലം ഭാഗത്തേക്കു ട്രെയിന്‍ കിടക്കുന്നതു കണ്ട് യാത്രക്കാര്‍ ആശയക്കുഴപ്പത്തിലാവുകയായിരുന്നു.
ഇതോടെ അപകടം സംഭവിക്കുമെന്ന് കരുതി യാത്രക്കാര്‍ ട്രെയിന്‍ ചങ്ങല വലിച്ചു നിര്‍ത്തുകയായിരുന്നു. തുടര്‍ന്ന് വൈകിയാണ് ഗുരുവായൂര്‍-ഇടമണ്‍ പാസഞ്ചര്‍ പുറപ്പെട്ടത്.
