scorecardresearch

ആ 30 സെക്കന്റ് ജീവിതത്തിനും മരണത്തിനുമിടയിലെ സമയമാകും; അവധിക്കായി വിളിക്കുന്നവരോട് അനുപമ ഐഎഎസ്

മഴ കാരണം അവധി പ്രഖ്യാപിക്കണമെന്നാവശ്യപ്പെട്ട് നിരവധി കോളുകളാണ് കലക്ട്രേറ്റില്‍ ലഭിക്കുന്നത്.

ആ 30 സെക്കന്റ് ജീവിതത്തിനും മരണത്തിനുമിടയിലെ സമയമാകും; അവധിക്കായി വിളിക്കുന്നവരോട് അനുപമ ഐഎഎസ്

തൃശൂര്‍: മഴക്കാലമായതോടെ അവധി പ്രഖ്യാപിക്കണമെന്ന ആവശ്യവുമായി കലക്ട്രേറ്റിലേക്ക് ഫോണ്‍ ചെയ്യുന്നവരോട് അപേക്ഷയുമായി തൃശൂര്‍ കലക്ടര്‍ അനുപമ ഐഎഎസ്. പഴയ പോസ്റ്റ് വീണ്ടും ഷെയര്‍ ചെയ്തു കൊണ്ടായിരുന്നു അനുപമയുടെ പ്രതികരണം.

പ്രിയപ്പെട്ട സഹോദരീ സഹോദരന്‍മാരേ എന്ന് അഭിസംബോധന ചെയ്തുകൊണ്ടായിരുന്നു കലക്ടര്‍ പോസ്റ്റ് ആരംഭിക്കുന്നത്.”മഴ കാരണം അവധി പ്രഖ്യാപിക്കണമെന്നാവശ്യപ്പെട്ട് നിരവധി കോളുകളാണ് കലക്ട്രേറ്റില്‍ ലഭിക്കുന്നത്. അത്തരത്തില്‍ ഒരു അവധി പ്രഖ്യാപിക്കണമെങ്കില്‍ അതിന് കൃത്യമായ നിര്‍ദേശങ്ങളും മാനദണ്ഡങ്ങളും തങ്ങളുടെ മുന്നിലുണ്ട്. നിങ്ങളാരേയും ഒരു വിധത്തിലും ബുദ്ധിമുട്ടിക്കാന്‍ ഞങ്ങള്‍ ആഗ്രഹിക്കുന്നില്ല” അനുപമ പറയുന്നു.

ആവശ്യം വരുന്ന ഘട്ടത്തില്‍ തീര്‍ച്ചയായും അവധി നല്‍കിയിരിക്കും. എന്നാല്‍ അവധി ആവശ്യപ്പെട്ട് കൂട്ടത്തോടെ ഫോണ്‍ കോളുകള്‍ വരുന്നതോടെ ലൈന്‍ ബിസി ആകുകയും കാണാതാവല്‍ പോലുള്ള അപകടങ്ങളില്‍ സഹായമഭ്യര്‍ത്ഥിച്ച് വിളിക്കുന്നവര്‍ക്ക് കോള്‍ ലഭ്യമാകാതെ വരികയും ചെയ്യുമെന്നും അവര്‍ വ്യക്തമാക്കി.

‘നിങ്ങള്‍ ഒരു ബുദ്ധിമുട്ട് നേരിടുമ്പോള്‍ ഞങ്ങളെ വിളിക്കാനുള്ള സ്വാതന്ത്ര്യം നിങ്ങള്‍ക്കുണ്ട്. പക്ഷെ ആ സ്വാതന്ത്ര്യം ഒരു ഉത്തരവാദിത്തം കൂടിയാണ്. ഒരു 30 സെക്കന്റ് പോലും ജീവിതത്തിനും മരണത്തിനുമിടയിലെ സമയമാകും. അതുകൊണ്ട് അടുത്ത തവണ അവധി ചോദിച്ച് വിളിക്കുമ്പോള്‍ ദയവായി ഉത്തരവാദിത്തമുള്ള പൗരന്മാരായി നിങ്ങള്‍ അത്യാവശ്യ സഹായം വേണ്ട ഒരാളെ ബുദ്ധിമുട്ടിക്കുകയുല്ല എന്നുറപ്പാക്കൂ” എന്നു പറഞ്ഞാണ് അനുപമ ഐഎഎസ് പോസ്റ്റ് അവസാനിപ്പിക്കുന്നത്.

Stay updated with the latest news headlines and all the latest Kerala news download Indian Express Malayalam App.

Web Title: Thrissur collector tv anupama ias facebook post on calls for leave

Best of Express