തൃശൂർ ചൈല്‍ഡ് ലൈന്‍ കേന്ദ്രത്തില്‍നിന്ന് തട്ടിക്കൊണ്ടുപോയ പെൺകുട്ടിയെ കണ്ടെത്തി

തൃശൂർ: ചൈൽഡ് ലൈൻ കേന്ദ്രത്തിലെ ജീവനക്കാരെ ആക്രമിച്ച് പെൺകുട്ടിയെ തട്ടിക്കൊണ്ടുപോയ യുവാവ് പിടിയിൽ. 20 വയസുള്ള ഇതര സംസ്ഥാന തൊഴിലാളിയെയും പെൺകുട്ടിയെയും തൃശൂർ പുതുക്കാട് ജംങ്ഷനിൽനിന്നാണ് പൊലീസ് കണ്ടെത്തിയത്. ഇന്നലെയാണ് ചൈൽഡ് ലൈൻ ജീവനക്കാരെ ആക്രമിച്ച യുവാവ് പതിനാറുകാരിയെ തട്ടിക്കൊണ്ടു പോയത്. ഛത്തീസ്ഗഡ് സ്വദേശികളാണ് ഇരുവരും.

ബുധനാഴ്ച അർധരാത്രിയോടെയാണ് ഇരുവരും തൃശൂർ റെയിൽവേ സ്റ്റേഷനിലെത്തിയത്. യുവാവിനോടൊപ്പം പ്രായപൂർത്തിയാകാത്ത പെൺകുട്ടിയെ കണ്ട റെയിൽവേയിലെ ഉദ്യോഗസ്ഥർ ചൈൽഡ് ലൈനിനെ വിവരം അറിയിയിക്കുകയായിരുന്നു. തുടർന്ന് പെൺകുട്ടിയെ കൗൺസിലിങ്ങിനായി റെയില്‍വേ സ്‌റ്റേഷന്‍ പ്ലാറ്റ്‌ഫോമിലെ ചൈല്‍ഡ് ലൈന്‍ കേന്ദ്രത്തിലേക്ക് മാറ്റി. പിറ്റേന്നു രാവിലെ ചൈല്‍ഡ് ലൈന്‍ ഓഫീസിലെത്തിയ യുവാവ് ബിയര്‍കുപ്പി പൊട്ടിച്ച് ജീവനക്കാരെ ആക്രമിക്കുമെന്ന ഭീഷണി മുഴക്കുകയും പെണ്‍കുട്ടിയെ തട്ടിക്കൊണ്ടുപോവുകയുമായിരുന്നു.

പെൺകുട്ടിയെ ശിശു ക്ഷേമ സമിതിയില്‍ ഹാജരാക്കാനിരിക്കെയാണ് തട്ടിക്കൊണ്ടുപോയത്. സംഭവത്തില്‍ വീഴ്ച സംഭവിച്ചതിനെത്തുടര്‍ന്ന് ഒരു ആര്‍പിഎഫ് ഉദ്യോഗസ്ഥനെ സര്‍വീസില്‍നിന്ന് സസ്‌പെന്‍ഡ് ചെയ്തിരുന്നു.