പാലക്കാട്: വാളയാറിൽ പെണകുട്ടികൾ ദുരൂഹ സാഹചര്യത്തിൽ മരിച്ച സംഭവത്തിൽ ഞെട്ടിക്കുന്ന വെളിപ്പെടുത്തലുകളുമായി അമ്മ. 55 ദിവസം മുൻപ് മരിച്ച മൂത്ത പെൺകുട്ടി ലൈംഗികമായി പീഡിപ്പിക്കപ്പെട്ടിരുന്നുവെന്ന് മാധ്യമപ്രവർത്തകരോട് പറഞ്ഞു. ഇക്കാര്യം മകൾ തന്നോട് പറഞ്ഞിരുന്നുവെന്നും   ബന്ധുവായ ഒരാളെ പല തവണ താക്കീത് ചെയ്തുവെന്നും അമ്മ പറഞ്ഞു.

മകളുടെ മരണശേഷം ഈ വിവരം പൊലീസിനോട് പറഞ്ഞിരുന്നു. മൂത്ത കുട്ടി മരിച്ച ദിവസം ടവൽ കൊണ്ട് മുഖം മറച്ച് രണ്ടുപേർ വീട്ടിൽ നിന്നും ഇറങ്ങിപ്പോകുന്നത് ഇളയ കുട്ടി കണ്ടിരുന്നു. ഈ വിഷയം മകൾ എന്നോട് പറഞ്ഞിരുന്നു. ഇക്കാര്യവും പൊലീസിനോട് അറിയിച്ചിരുന്നുവെന്നു അമ്മ മാധ്യമപ്രവർത്തകരോട് പറഞ്ഞു.

ജനുവരി 13 നാണ് ഒറ്റമുറി വീട്ടിലെ കഴുക്കോലിൽ പന്ത്രണ്ടുകാരിയെ തൂങ്ങിമരിച്ച നിലയിൽ കണ്ടെത്തിയത്. ഒൻപതു വയസുളള സഹോദരിയെ ഇതേ സ്ഥലത്ത് തൂങ്ങിമരിച്ച നിലയിൽ  മാർച്ച് നാലിന് കണ്ടെത്തിയതോടെയാണ് സംഭവം വിവാദമായത്. മൂത്ത പെൺകുട്ടി ബന്ധുവിന്റെ പീഡനത്തിന് ഇരയായെന്ന് പൊലീസിനോട് പറഞ്ഞിരുന്നതായി അമ്മ പിന്നീട് വ്യക്തമാക്കിയിരുന്നു.

ഒറ്റമുറി വീട്ടിലാണ് അഞ്ചുപേരടങ്ങുന്ന കുടുംബത്തിന്റെ താമസം. മാതാപിതാക്കൾ കെട്ടിട നിർമാണ തൊഴിലാളികളാണ്. മാതാപിതാക്കൾ പണി കഴിഞ്ഞ് മടങ്ങിയെത്തുന്നതിന് മുമ്പാണ് രണ്ട് മരണങ്ങളും സംഭവിച്ചത്. മൂത്ത സഹോദരിയെ മരിച്ച നിലയിൽ ആദ്യം കാണുന്നത് ഇളയ കുട്ടിയാണെന്ന് നാട്ടുകാർ പറയുന്നു. വീട്ടിലേയ്ക്ക് വരുന്പോൾ രണ്ടുപേർ ടവൽ കൊണ്ട് മുഖം മറച്ച് നടന്നു പോകുന്നതായി കുട്ടി മൊഴി നൽകിയിരുന്നതായും നാട്ടുകാർ പറയുന്നു. എന്നാൽ ഇതേ കുറിച്ചൊന്നും പൊലീസ് അന്വേഷിച്ചിട്ടില്ലെന്നും ആരോപണമുണ്ട്.

സഹോദരിയുടെ മരണം ഇളയകുട്ടിയെ മാനസികമായി ബാധിച്ചിരുന്നുവെന്നും അതിനാൽ കുട്ടിയെ  കൗൺസിലിങ്ങിന് കൊണ്ടുപോകണമെന്ന് വീട്ടുകാരോട് പറഞ്ഞിരുന്നുവെങ്കിലും അവരത് ചെയ്തില്ലെന്നും പൊലീസ് പറഞ്ഞു.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook

.