ന്യൂഡൽഹി: കണ്ണൂർ എടയന്നൂരിലെ യൂത്ത് കോൺഗ്രസ് നേതാവ് ഷുഹൈബ് വധം തൽക്കാലം സിബിഐ അന്വേഷിക്കേണ്ടതില്ലെന്ന് സുപ്രീം കോടതി. പൊലീസ് അന്വേഷണം തുടരട്ടേയെന്ന് പറഞ്ഞ കോടതി ഹര്‍ജി വിശദമായി പരിശോധിക്കുമെന്നും വ്യക്തമാക്കി. കേസിൽ സംസ്ഥാന പൊലീസ് അന്തിമ റിപ്പോർട്ട് നൽകുന്നത് സ്റ്റേ ചെയ്യണം എന്ന ആവശ്യം സുപ്രീം കോടതി അംഗീകരിച്ചില്ല.
കേസ് സിബിഐ അന്വേഷിക്കണമെന്നാവശ്യപ്പെട്ട് ഷുഹൈബിന്റെ രക്ഷിതാക്കളാണ് സുപ്രീം കോടതിയെ സമീപിച്ചത്. കേസിൽ സിബിഐ അന്വേഷണത്തിനുള്ള ഹൈക്കോടതി ഡിവിഷൻ ബെഞ്ചിന്റെ സ്റ്റേ നീക്കണമെന്നാവശ്യപ്പെട്ടായിരുന്നു കുടുംബം സുപ്രീം കോടതിയിൽ ഹർജി ഫയൽ ചെയ്തത്.
രാഷ്ട്രീയ കൊലപാതകങ്ങള്‍ ചെയ്യുന്നവര്‍ വിഡ്ഢികളാണെന്ന് പറഞ്ഞ കോടതി സംസ്ഥാന സര്‍ക്കാരിന്റെയേും സിബിഐയുടേയും നിലപാട് തേടി നോട്ടീസ് നല്‍കി. പൊലീസ് അന്വേഷണം തൃപ്തികരമാണെന്നാണ് സംസ്ഥാന സര്‍ക്കാര്‍ കോടതിയെ അറിയിച്ചത്.
