scorecardresearch
Latest News

ഷാരോണിന്റെ മരണം: കൊലപാതകമെന്ന് സമ്മതിച്ച് പെണ്‍സുഹൃത്ത്

പാറശാല സ്വദേശി ഷാരോണ്‍ രാജ് മകഴിഞ്ഞ ചൊവ്വാഴ്ചയാണ് മരിച്ചത്

ഷാരോണിന്റെ മരണം: കൊലപാതകമെന്ന് സമ്മതിച്ച് പെണ്‍സുഹൃത്ത്

തിരുവനന്തപുരം: വിഷാംശം കലര്‍ന്ന പാനിയം കുടിച്ച് ചികിത്സയിലിരിക്കെ പാറശാല സ്വദേശിയായ ഷാരോണ്‍ മരിച്ച സംഭവം കൊലപാതകമെന്ന് സമ്മതിച്ച് പെണ്‍സുഹൃത്ത്. ഷാരോണിനെ കഷായത്തില്‍ വിഷം കലര്‍ത്തി കൊന്നതാണെന്നാണ് പെണ്‍സുഹൃത്തായ ഗ്രീഷ്മയുടെ മൊഴി. പ്രതിയുടെ അറസ്റ്റ് ഉടന്‍ രേഖപ്പെടുത്തും.

ഫെബ്രുവരിയിൽ വിവാഹം നിശ്ചയിച്ചിരുന്നതിനാൽ അതിനു മുന്നോടിയായി ഷാരോണിനെ ഒഴിവാക്കുകയായിരുന്നു കൊലപാതകത്തിന്റെ ഉദ്ദേശ്യം. പാറശാല സ്വദേശി ഷാരോണ്‍ രാജ് മകഴിഞ്ഞ ചൊവ്വാഴ്ചയാണ് മരിച്ചത്. സംഭവത്തില്‍ ജ്യൂസ് നല്‍കിയ സുഹൃത്തായ പെണ്‍കുട്ടിയുടെ മൊഴി ക്രൈം ബ്രാഞ്ച് തിരുവനന്തുപുരം റൂറല്‍ എസ് പി ഓഫിസില്‍ വച്ചാണ് എടുത്തത്. പെണ്‍കുട്ടിയുടെ കുടുംബത്തേയും ക്രൈം ബ്രാഞ്ച് ഓഫിസിലേക്ക് വിളിപ്പിച്ചിരുന്നു. ഷാരോണിനൊപ്പം പെണ്‍കുട്ടിയുടെ വീട്ടിലെത്തിയ സുഹൃത്തിന്റെ മൊഴിയും രേഖപ്പെടുത്തിയെന്നാണ് സ്ഥിരീകരിക്കാത്ത വിവരം. ഡി വൈ എസ് പി ജോണ്‍സണ്‍ന്റെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്.

സുഹൃത്തുമായുള്ള ഷാരോണിന്റെ കൂടുതല്‍ വാട്ട്സ്ആപ്പ് ചാറ്റുകള്‍ ഇന്നലെ പുറത്തുവന്നിരുന്നു. സുഹൃത്തിന്റെ വീട്ടില്‍ നിന്ന് പാനിയം കുടിച്ചതിന് പിന്നാലെയായിരുന്നു ഷാരോണിന് ആരോഗ്യപ്രശ്നങ്ങള്‍ ഉണ്ടായത്. സുഹൃത്തിന്റെ വീട്ടുകാര്‍ക്കെതിരെ ഷാരോണിന്റെ കുടുംബാംഗങ്ങള്‍ ആരോപണം ഉന്നയിച്ചിരിക്കുന്ന പശ്ചാത്തലത്തിലാണ് ചാറ്റുകള്‍ പുറത്ത് വന്നിരിക്കുന്നത്.

സുഹൃത്തായ പെണ്‍കുട്ടി ഷാരോണിനയച്ചിരിക്കുന്ന സന്ദേശത്തില്‍ പറയുന്നത് ഇപ്രകാരം.
“എങ്ങനെ പറഞ്ഞു മനസിലാക്കുമെന്ന് അറിയില്ല. അങ്ങനെ എന്തേലും ചെയ്യാനാണെങ്കില്‍ അത് എനിക്ക് നേരത്തെ പറ്റുമായിരുന്നു. ആരും അറിയാതെ ഞങ്ങള്‍ തമ്മില്‍ കണ്ട ഒരുപാട് സാഹചര്യങ്ങളുണ്ടായിരുന്നു.”

വീട്ടിലെത്തിയപ്പോള്‍ ഷാരോണിന്റെ സുഹൃത്ത് സജിനും ഒപ്പമുണ്ടായിരുന്ന കാര്യവും ചാറ്റിലുണ്ട്. ഷാരോണിനെ തിരുവനന്തപുരം മെഡിക്കല്‍ കോളജില്‍ പ്രവേശിച്ചപ്പോഴത്തേതും ദിവസങ്ങള്‍ക്ക് ശേഷമുള്ള മെഡിക്കല്‍ റിപ്പോര്‍ട്ടിലും വലിയ വ്യത്യാസങ്ങളാണുള്ളത്.

ഒക്ടോബര്‍ 14-നാണ് ഷാരോണിനെ ആശുപത്രിയില്‍ പ്രവേശിപ്പിച്ചത്. അപ്പോള്‍ അവയവങ്ങളുടെ പ്രവര്‍ത്തനം സാധാരണ നിലയിലായിരുന്നു. എന്നാല്‍ 17-ാം തീയതിയിലെ റിപ്പോര്‍ട്ടില്‍ വ്യക്ക, കരങ്ങള്‍ എന്നിവയുടെ പ്രവര്‍ത്തനം നിലച്ചതായാണ് കാണിക്കുന്നത്.

പെണ്‍കുട്ടിയുടെ വീട്ടുകാര്‍ക്കെതിരെ ഗുരുതര ആരോപണങ്ങളാണ് ഷാരോണിന്റെ കുടുംബം ഉന്നയിക്കുന്നത്. പെണ്‍കുട്ടിയുടെ വീട്ടില്‍ നിന്നും വന്നതിന് ശേഷം ഷാരോണിനെ തുടര്‍ച്ചയായി ഛര്‍ദിച്ചെന്നും അവയവങ്ങള്‍ പൊള്ളിനശിച്ചിരുന്നതായും വീട്ടുകാര്‍ പറയുന്നു.

Stay updated with the latest news headlines and all the latest Kerala news download Indian Express Malayalam App.

Web Title: Sharon murdered kerala police investigation

Best of Express