വാഹനങ്ങളുടെ ആര്‍സി ബുക്കും പെറ്റ് ജിയിലേക്ക്; സര്‍ട്ടിഫിക്കറ്റുകളുടെ പ്രിന്റിംഗ് ആരംഭിച്ചു

തിരുവനന്തപുരം: ലൈസന്‍സിന് പിന്നാലെ വാഹനങ്ങളുടെ ആര്‍സി ബുക്കും പെറ്റ് ജിയിലേക്ക് മാറ്റാനൊരുങ്ങുകയാണ് മോട്ടോര്‍ വാഹന വകുപ്പ്. ലാമിനേറ്റഡ് കാര്‍ഡുകള്‍ ഇനി മുതല്‍ ഉണ്ടാവില്ല. എടിഎം കാര്‍ഡിന് സമാനമായി പേഴ്‌സില്‍ സൂക്ഷിക്കാന്‍ കഴിയുന്ന രീതിയിലാണ് പുതിയ ആര്‍സി ബുക്ക് തയ്യാറാക്കുന്നത്. സെപ്റ്റംബര്‍ അവസാനം മുതല്‍ ഇതിലേക്കായുള്ള അപേക്ഷകള്‍ സ്വീകരിച്ച് തുടങ്ങിയിരുന്നു.

പിവിസി പെറ്റ് ജി കാര്‍ഡിലുള്ള രജിസ്ട്രേഷന്‍ സര്‍ട്ടിഫിക്കറ്റുകളുടെ പ്രിന്റിംഗ് ആരംഭിച്ചിട്ടുണ്ട്.തേവരയിലെ കെ.യു.ആര്‍.ടി.സി. യുടെ ഉടമസ്ഥതയിലുള്ള സെന്‍ട്രലൈസ്ഡ് പ്രിന്റിംഗ് സ്റ്റേഷനിലാണ് സര്‍ട്ടിഫിക്കറ്റുകളുടെ പ്രിന്റിംഗ് ആരംഭിച്ചത്. പാലക്കാട് ഇന്ത്യന്‍ ടെലിഫോണ്‍ ഇന്‍ഡസ്ട്രീസിനാണ് പ്രിന്റിംഗിന്റെയും വിതരണത്തിന്റെയും ചുമതല.

പ്രതിദിനം 25000 കാര്‍ഡുകള്‍ വരെ പ്രിന്റ് ചെയ്യാനുള്ള സൗകര്യമാണ് തേവരയിലെ കേന്ദ്രത്തിലുള്ളത്. പെറ്റ് ജി കാര്‍ഡ് രൂപത്തിലേക്ക് വാഹന രജിസ്ട്രേഷന്‍ സര്‍ട്ടിഫിക്കറ്റ് മാറുന്നതോടെ ഇടനിലക്കാരുടെ അനാവശ്യമായ ഇടപ്പെടലുകള്‍ ഇല്ലാതാകുമെന്നതാണ് പ്രധാന നേട്ടമായി മോട്ടോര്‍ വാഹന വകുപ്പ് വിലയിരുത്തിയിരുന്നത്.

ഈ വര്‍ഷം ഏപ്രില്‍ 20ന് ആരംഭിച്ച പ്രിന്റിംഗ് സ്റ്റേഷനില്‍ ഡ്രൈവിംഗ് ലൈസന്‍സുകളുടെ പ്രിന്റിംഗും നടക്കുന്നുണ്ട്. 14 ലക്ഷത്തോളം ലൈസന്‍സുകള്‍ ഇതുവരെ പ്രിന്റ് ചെയ്ത് വിതരണം ചെയ്തതായി സീനിയര്‍ ഡെപ്യൂട്ടി ട്രാന്‍സ്പോര്‍ട്ട് കമ്മീഷണര്‍ ഷാജി മാധവന്‍ അറിയിച്ചു.