പിറന്നാളിന് വിഎസിന്റെ വീട്ടിലെത്തി പിണറായി; പ്രിയ സഖാവിനെ ഉണർത്താതെ മുഖ്യമന്ത്രി മടങ്ങി

നൂറാം പിറന്നാള്‍ ആഘോഷിക്കുന്ന മുന്‍ മുഖ്യമന്ത്രിയും മുതിര്‍ന്ന സിപിഎം നേതാവുമായ വി എസ് അച്യുതാനന്ദന് നേരിട്ട് ആശംസയുമായി മുഖ്യമന്ത്രി പിണറായി വിജയന്‍. ഇന്ന് വൈകിട്ട് നാല് മണിയോടെയാണ് തിരുവനന്തപുരം ലോ കോളേജ് ജങ്ഷനിലെ വി എസ് അച്യുതാനന്ദന്റെ വീട്ടില്‍ പിണറായി വിജയന്‍ നേരിട്ടെത്തി പിറന്നാള്‍ ആശംസ അറിയിച്ചത്.

അല്‍പ നേരം അവിടെ ചിലവഴിച്ച ശേഷം മുഖ്യമന്ത്രി പിണറായി വിജയന്‍ മടങ്ങി. പിണറായി വിജയന്‍ വീട്ടിലെത്തിയപ്പോള്‍ വി എസ് ഉറക്കത്തിലായിരുന്നു എന്ന് മകന്‍ ഡോ. വി എ അരുണ്‍ കുമാര്‍ പറഞ്ഞു. ഉറക്കമായതിനാല്‍ വിളിക്കേണ്ടെന്നും ആശംസ അറിയിച്ചാല്‍ മതിയെന്നും മുഖ്യമന്ത്രി പിണറായി വിജയന്‍ അറിയിച്ചുവെന്ന് മകൻ പറ‍ഞ്ഞു. കുടുംബാംഗങ്ങളോട് ആശംസ അറിയിച്ച ശേഷമാണ് പിണറായി വിജയന്‍ മടങ്ങിയത്.

വിഎസിന് പ്രത്യേക ആശംസാ കുറിപ്പിലൂടെ ഇന്നലെ തന്നെ പിണറായി വിജയന്‍ പിറന്നാള്‍ ആശംസ അറിയിച്ചിരുന്നെങ്കിലും വിഎസിന്‍റെ വീട്ടിലേക്ക് എപ്പോഴാണ് എത്തുകയെന്നതില്‍ വ്യക്തത ഉണ്ടായിരുന്നില്ല. മറ്റൊരു പരിപാടിക്കായി പോകുന്നതിനിടെയാണ് വി എസിന്‍റെ വീട്ടില്‍ പിണറായി വിജയന്‍ എത്തിയത്.