തിരുവനന്തപുരം: എല്‍ഡിഎഫ് സർക്കാരിന്റെ ഒന്നാം വാർഷികോഘോഷ പ്രചരണങ്ങൾക്ക് ചെലവഴിച്ചത് ലക്ഷങ്ങൾ. സോഷ്യല്‍മീഡിയ വഴിയുള്ള പ്രചരണത്തിന് മാത്രം ചെലവിട്ടത് 42 ലക്ഷം രൂപയാണെന്നാണ് വിവരം. കോഴിക്കോട്ടെ ഒരു സ്വകാര്യ സ്ഥാപനത്തിനാണ് പ്രചരണത്തിനായി കരാര്‍ നല്‍കിയത്. ജില്ലയിലെ ഒരു സി.പി.എം നേതാവിന്റെ മകനുമായി അടുത്ത ബന്ധമുള്ളതാണ് ഈ കമ്പനി.

സർക്കാരിന്റെ ഭരണ നേട്ടങ്ങൾ വിവരിച്ചുകൊണ്ടുളള പരസ്യം നിരവധി ദിനപത്രങ്ങളില്‍ നല്‍കിയത് വാര്‍ത്തയായിരുന്നു. അന്ന് മലയാളം ദിനപത്രങ്ങളിൽ മാത്രമല്ല പ്രമുഖ ദേശീയ ദിനപത്രങ്ങളുടെ ഡൽഹി എഡിഷന്റെ ഒന്നാം പേജുകളിലും പരസ്യം നല്‍കി.

സർക്കാരിന്റെ ഭരണനേട്ടങ്ങളെക്കുറിച്ചുളളതാണ് പരസ്യം. ആരോഗ്യം, തൊഴിൽ, ബാങ്കിങ് തുടങ്ങിയ നിരവധി മേഖലകളിൽ സർക്കാർ കൈവരിച്ച നേട്ടങ്ങൾ എണ്ണിപ്പറയുന്നതാണ് പരസ്യം. കൊച്ചി മെട്രോയുടെ പുരോഗതിയെക്കുറിച്ചും ട്രാൻസ്ജെൻഡേഴ്സിന് മെട്രോയിൽ ജോലി നൽകിയതിനെക്കുറിച്ചും പരസ്യത്തിൽ വിവരിക്കുന്നുണ്ട്. സർക്കാരിന്റെ ക്ഷേമപദ്ധതികളെക്കുറിച്ചും പരസ്യത്തിൽ പറയുന്നുണ്ട്.

‘നമുക്കൊരുമിച്ച് മുന്നേറാം സർക്കാർ ഒപ്പമുണ്ട്’ എന്ന വാചകത്തിലാണ് മലയാളം ദിനപത്രങ്ങളിൽ പരസ്യം നൽകിയിരിക്കുന്നത്. അടിസ്ഥാന സൗകര്യ വികസനത്തെക്കുറിച്ചും കാർഷിക മേഖലയിലെ അഭിവൃദ്ധിയെക്കുറിച്ചും സ്ത്രീ സുരക്ഷ, സാമൂഹിക ക്ഷേമപദ്ധതികൾ തുടങ്ങി സർക്കാരിന്റെ ഭരണനേട്ടങ്ങളെക്കുറിച്ചും പരസ്യത്തിൽ പ്രതിപാദിക്കുന്നു.

2016 മേയ് 25 ന് നൽകിയ പരസ്യം

കഴിഞ്ഞ വർഷം മേയ് 25 ന് പിണറായി വിജയൻ മുഖ്യമന്ത്രിയായി സത്യപ്രതിജ്ഞ ചെയ്ത ദിവസവും ഇതേ മാതൃകയിൽ പരസ്യം നൽകിയിരുന്നു. കോടികൾ ചെലവഴിച്ച് പരസ്യം നൽകിയത് വിവാദമാവുകയും ചെയ്തിരുന്നു.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook

.