Onam Bumper 2023: തിരുവോണം ബമ്പർ; ഒന്നാം സമ്മാനം 25 കോടി, രണ്ടാം സമ്മാനം 1 കോടി വീതം 20 പേർക്ക്

Onam Bumper 2023: തിരുവനന്തപുരം: തിരുവോണം ബമ്പറിന്റെ ഒന്നാം സമ്മാനം 25 കോടി തന്നെ. ധനമന്ത്രി കെ.എന്‍.ബാലഗോപാല്‍ ഓണം ബമ്പർ ടിക്കറ്റ് പ്രകാശനം ചെയ്തു. ഗതാഗത മന്ത്രി ആന്റണി രാജു അധ്യക്ഷത വഹിച്ചു.

തിരുവോണം ബമ്പർ ഭാഗ്യക്കുറിയുടെ സമ്മാന ഘടനയില്‍ ഇത്തവണ മാറ്റം വരുത്തിയിട്ടുണ്ട്. കഴിഞ്ഞ തവണത്തേക്കാള്‍ ആകെ സമ്മാനത്തുക ഇത്തവണ കൂടുതലാണ്. ഇത്തവണ ആകെ സമ്മാനത്തുക 125 കോടി 54 ലക്ഷം രൂപയാണ്. പൊതുജനങ്ങളുടെ അഭിപ്രായം സ്വരൂപിച്ച ശേഷമാണ് ലോട്ടറിയുടെ സമ്മാന ഘടനയില്‍ മാറ്റംവരുത്താന്‍ തീരുമാനിച്ചത്.

ഇത്തവണ രണ്ടാം സമ്മാനമായി ഒരു കോടി രൂപ വീതം 20 പേര്‍ക്ക് നല്‍കും. കഴിഞ്ഞ ഒരാള്‍ക്ക് 5 കോടിയായിരുന്നു രണ്ടാം സമ്മാനം. മൂന്നാം സമ്മാനം 50 ലക്ഷം വീതം 20 നമ്പറുകള്‍ക്ക് നല്‍കും. കഴിഞ്ഞ തവണ ഒരു കോടി വീതം 10 പേര്‍ക്കാണ് മൂന്നാം സമ്മാനമായി നല്‍കിയത്. ഇത്തവണ നാലാം സമ്മാനം 5 ലക്ഷം വീതം 10 പേര്‍ക്കും അഞ്ചാം സമ്മാനം 2 ലക്ഷം വീതം 10 പേര്‍ക്കും നല്‍കും. ഇവയ്ക്കു പുറമേ 5000,2000,1000,500 രൂപയുടെ നിരവധി സമ്മാനങ്ങളുമുണ്ട്.

കഴിഞ്ഞ വര്‍ഷത്തെപ്പോലെ 500 രൂപയാണ് നിരക്ക്. സെപ്റ്റംബര്‍ 20നാണ് നറുക്കെടുപ്പ്. ഓണം ബമ്പര്‍ ടിക്കറ്റുകളുടെ വില്‍പ്പന 26-ന് മണ്‍സൂണ്‍ ബമ്പര്‍ ടിക്കറ്റിന്റെ നറുക്കെടുപ്പ് നടക്കുന്ന ദിവസം തുടങ്ങും.

തിരുവോണം ബമ്പർ സമ്മാന തുക 30 കോടി ആക്കാന്‍ ആലോചനയുണ്ടായിരുന്നെങ്കിലും ഭാഗ്യക്കുറി വകുപ്പിന്റെ ശുപാര്‍ശ ധനവകുപ്പ് തള്ളിയിരുന്നു. കൂടുതല്‍ പേര്‍ക്ക് സമ്മാനം ലഭിക്കത്തക്ക വിധത്തിലാണ് ഓണം ബമ്പർ സമ്മാന ഘടനയില്‍ മാറ്റം വരുത്തിയത്.

കഴിഞ്ഞ വർഷത്തെ ഓണം ബമ്പർ ടിക്കറ്റ് വിൽപ്പനയിൽ റെക്കോർഡ് സൃഷ്ടിച്ചിരുന്നു. ആകെ 66,55,914 ടിക്കറ്റുകളാണ് വിറ്റത്. ആകെ 67,50,000 ടിക്കറ്റുകൾ അച്ചടിച്ചിരുന്നു. തൊട്ടു മുൻ വർഷത്തേക്കാൾ 12.5 ലക്ഷം ടിക്കറ്റുകൾ കഴിഞ്ഞ വർഷം വിറ്റുപോയി.